—¡Nenuadan, kainyubaintankanwen!— jatu wa dasibi taxniyubainabun jawen tsumabu jayamaken Josén jawen betsabu unanmanun itan 2 jatuya kaxa bedukukaun kaxa chakayamaya jawen tsumabun ninkakin jatu yuibaunabu dasibi Egipto nawabun ninka keyuaibun ja kaka Faraónen jiwe anuxun ninkadiaibun 3 Josén jawen betsabu xabakabi jatu unanmakin jabun janchawen jatu jancha wakin:

—Eadan, en Joséki. ¿En epa jiweyuamen?— jatu waya jabun ichakawanibuwen taea jaki datechakayamai juinti metexekechakayamatan jawa yuiama jaxpa ja dapi mapuabun 4 januxun jatu daewakin yuikin:

—Dateama nedi bekanwen— jatu wa beabu Josén ana jatu yuikin:

—Eadan, en matun betsa Joséki, ja man ea ichakawakin Egipto anu jau ea iyununbun peiwen man ea jatu inanidan. 5 Eskaki, matu yuinun ninkakanwen. Man ea jaska waniwen taexun bebunkidi Diosun matu ea mekemakatsi jatun ea yunuai itsawakin matu ea amaniki, en matu jiwemaxanunan. Jaskawen taea bika tenebauni ibubis sinatanameyamakanwen, man ma ea jatun esclavo dayadu wamabianiwen taeadan. 6 Na buni pakeimadan, ma 2 año keyuaki. Jaskabia 5 año dayakin man piti banabia jawa beneamaken jania man tsekatiduma iyukunkainxanikiki, buni pikuidan. 7 Na mai pakea anu jiweyuxun jati texenixun nukun bababu nun pa waxanun bebunkidi jaska Diosun unankin ea matu yunumakin itsawaniki, en matun jiwea medabewaxanunan, jaska nun shinantidumajaidabiakenan. 8 Ea jaska wakinan, matun man ea akamaki, na mae anu nichinkinan. Jaska wakinan, nukun mekenika Diosun ea aniki. Januxun jabiatundi Faraónen yusinika inun jawen jiwe anu dayanika tsuma inun jawen xanen ibu Egipto jidabi yunuti mekenika Diosun besti ea jaska waniki. 9 Ea jaska waniwen taexun ana nenu ebe mapuama jawaidabain nukun ibu yuitankanwen: “Min bake José jiweaki. Eska jawen jancha mia yunushinaki. Diosun nenu Egipto xanen ibujaida ea wani jawaidakidan ea uinyuwe”, mia washianki, akin ea jaska yuixuntandikanwen. 10 Eskakididan, na nenu udama jiwei bekanwen, mae betsa Gosen anu ea dapi jiweidan, mia inun, min bakebu inun, min bababu inun, min inabu inun, minabube dasibi texeamadan. 11 Nenu man juama man nuitapatidubuki. Jaskaken matunabuya bekanwen. Nenuxun piti shadabu matunabuya matu pimakin en jawa matu nuitapawama ixanaii. Na bunidan, 5 año kayuikiaki, en epa akin yuikinan. 12 Na jaska en matu yuiaidan en betsa Benjamín inun ibubis man ea uinkin ninkaii, jaska en matu jancha waidan. 13 Na dasibi Egipto anu jaska en xanen ibui kushipai en matu yuiai man uinxu nukun epa yuiditankanwen. Menan buxun en ibu ea iwexunditankanwen— jatu watan

14 jaska jatu jancha wakin menetan jawen betsa kayabi Benjamín ikua kaxaya jabebis Benjamínbe teikukua kaxabukuntan 15 januxun jawen betsa Benjamín jenebain betsabudi tantsu akubauni jatube ikukunan kaxai keyui nesetan ana dateama jawen betsabuya janchaibun

16 Josén betsabu beabu Faraónen jiwe jawendua anua jaki chaniaibu ninkatan Faraónen jawen tsumabubetan ninkai benimaibun 17-20 Faraónen José kenaxun yunukin:

—Min betsabu yuiwe, jau pitiya besti jatun mai pakea Canaán anu chintunbainshinxun matun epa inun matunabu jau jatu itanunbunan. Jatun asnoki piti butidubuki. Janua nukun asno tadantiyadi buxun jaki jatun ainbuaibu inun jatun bakebu inun min ibudi jaki iwetidubuki. Jaskabidanaibu na Egipto mai pakea anu janu yunu jamen ikai mai pepa en jatu yunuxanaii. Jawa jatun mabuwen nuiama jau benunbunan, nenuxun jamapai shadabu en jatu yunuaidan, jabu ibu wamakin jabuna wamakinan— aka

21 januxun Israelin bakebu jatu jaska wamakin José jawen betsabu jaska Faraónen yunuxu jawen asno tadantiya inun bai tanabainkin pikubainti jatu pewamaxuntan 22 januxun jawen betsabu tibi tadi chaipa bena bestibu tibi inankin januxun Benjamín besti 300 plata pei jexe inun 5 tadi chaipa inantan 23 januxun jawen ibu bumakin 10 asno mabu pepa jaki bexea inun 10 asno yuxan piti jaki bexea inun, misi inun piti betsa ja jukin pikubidanxanai jawen epa pewamaxuntan 24 januxun Josén jatu nichinkin nemakin:

—Buidan, bai tanabaini matunmebi ja iki detenameama butankanwen— jatu wa

jabu buaibun 25 Egipto anua kainbaini bui Canaán anu janu jatun epa jiweanu jikitushitan 26 jaska jatu washianbu jatun epa yuikin:

—José mawani dabanen nun imisdan, jiwea en bechitanaii. Ja min bakedan, dasibi Egipto mai pakea jidabi jatun xanen ibuki— akabu jaska shinantidumajaida e itan pes jawa yuiama tsaua jatun jancha besti jatu ikunwantidumaken 27 jaska jakidi janchashina jawen bakebun jaska Josén jatu yuishina inun yunushina banabimabu jawen asno tadantiya Josén yunua buxunshinabu uin chanima jatun jancha ikunwain benimai tse iki 28 jatun epan yuikin:

—Menan janun en mawanun en bake jiwea man ea yuiaidan, menan ea jaki nukumakin uinmadi bukanwen, janun en mawanunan— itan