—Jatun saku tibi xekiwan matawaxun jabiabu tibikidi pei nuku inainbu jatu ana nanexunkin keyutan ja maxkun sakuki jawen peiyabi en plata mane kencha chaxakapa nanexuntanwen— aka jaska Josén yunua jatu nanexunshina 3 penamajaida jatun asnoya jatu nichian 4-5 mae anua kainbaini chaima buaibun Josén jawen jiwe mekenika xanen ibu ana yunukin:

—Buaibu chibanbain jatuki nukutan jatu yuikin: “Matu pewabia ¿jaskakin en xanen ibun plata mane kencha man yumetsukidanai? Jaki nuxumis inun jawen mukayakin jatu unanmis yumetsunkin man chakabujaidakidanxuki”, akin jaska jatu yuitanwen— aka 6 chibanbain jatuki nukuxun jaska Josén yuia jabiaskadi jawen jiwe mekenika xanen ibun jatu yuia 7-9 jabundi yuikin:

—Xanen ibuun, ¿jaskakin jadi min nuku jancha wai? Nun mia jaska watidumajaidaki, na min yuiai keskadan. Nukun mae Canaán anua nukun saku medanua pei nun bechima nun ana mia bexunbiashinawen taexun min xanen ibun jiwe anua jawen kencha chaxakapa nun yumetsutidumajaidaki. Nun juni pepabuki— iwanan —Nuku jadatutunda jawen kencha nun yumetsukidanxudan, jatun nun bexu jawen sakukia man bechiadan, jadan, jau mawanunwen. Januxun nuku dasibi nuku dayadu esclavo wabainwen— akabu

10 —Jaska man chaniaidan, en matu akaii. Jadatuda man kencha jayadan, ja besti en esclavo waii. Jamen matu jatididan, chakabuma man unanuma inun butidubuki— jatu wa 11 jawaida juni tibitun jabun saku asno kamakia butetan tsaunxun depexunabu 12 januxun Josén tsumapan jatu uinanbaunkin iyuatun saku anua dukun benabidankin jatun badi kaini pakea tibiwen tanakin jatu benanbidankin iyuabun saku anua dukun jatu uinankin keyutan januxun atimas maxkujaida Benjamínen saku anu mane kencha chaxakapa bechitan sananbaunai 13 jawen betsabun uin juinti metexekechakayamatan juni tibitun jatun tadi ushnitan asno kamaki jatun saku ana duntanxun neabaini ana mae ewapa anu ana chintunkaini bui jikitan 14 Josén jiwe anu Judá inun jawen betsabu ana jikikain José kaindiamaken ja naman sapakain beti ika maniabun 15 Josén jatu yukakin:

—¿Man jaska kainamen? ¿En juni mukaya unanepama dabanen man ea jaska wabainamen? Tsua ea keska jayamaki— jatu wa 16 Judán kemakin:

—Xanen ibujaidatuun, jadakidi nun mia yuitima kaya min nuku waii. Jaska wakin nun jawa yumetsuama ixu jaskatan nukumebi nun petidumaki. Jaskaken nun chakabuwaniwen taexun Diosun nuku unanti waxuki, nuku kupinun ixunan. Min kencha chaxakapa tsuanda saku anua min tsumapan bechixuwen taexun ja bestima nuku dasibidi min dayadu esclavo nuku wadiwe— aka

17 Josén kemakin:

—En matu jaska wamajaidaki. Ja jatun sakukia kencha en tsumapan bechixu ja besti en dayadu esclavo en waii. Jamen matudan, unanuma matun epan jiwe anu budikanwen, tsuan matu jawawamakidan— jatu wabia

18 Judá naxukukin Joséki kemaxun jancha mae wanikawen ana yuikin:

—Xanen ibuun, ¿eska nun mibe janchaima june en mia yuiai min ea ninkatidumen, eki sinatamadan? Faraón keska min xanen ibu kushipajaidakidan. 19 Nukube janchai taekin mian nuku yukakin: “¿Man epa jayamen? ¿Man ana betsa jayamen?” akin min nuku yukaimaki. 20 Chanima mia yuikin: “Nukun epa inun nukun betsa maxku nun jayaki. Nukun betsa maxku jabias xankinki nanea mawaniken ja mesti jiweaki. Anibubiatun nukun epan nukun betsa maxku bawaniki. Jaskawen taexun nukun epan nukun betsa maxku bechipaijaidaikiki”, akin nun mia yuiwanimaki. 21 Nun mia jaska waiwen taexun: “Matun betsa maxku ea uinmakin eanu iwexankanwen”, akin min nuku yunuimaki. 22 Jakia nukun mia yuikin: “Ja nukun betsa maxkun jawen epa jenetidumaki. Jawen epa jenebaina jawen nui manui mawatiduki”, nun mia aka 23 “Matun betsa maxku nenu man iweamadan, man ana ea uin nenu jutidumaki”, min nuku waimaki. 24 Ka nukun epaki nukuxun min jancha nun yuia 25 ninkaimaxun nuku yuikin: “Ana piti eskadabes nuku bixuntankanwen”, nuku wa 26 “Nun katidumaki. Nukun betsa maxku nun iyuama ja xanen ibube janchakin piti nun mia bixuntidumaki. Min jaska shinainan, nukun betsa maxkube nuku nichinwen”, nun wa 27 en epan ana nuku yuikin: “En ain juni bake dabe besti ea kainxuni man unaiin. 28 Jawen iyua ea kaxuniken en ana uianma ean shinain: ‘Yuinaka piananbun ma ea pianimenkain’, ikin en shinanpakeaii. 29 Janua jawen maxkudi man iyua ichakawatidubuki. Jadi ea ichakanwanbun man ana ea iwexunamawen taea manujaidai ja dabewen nuikunkaini en mawaxanaii, matuwen taeadan”, nuku akimaki. 30-32 Jaska bebunkidi jaska wakin en epa ean yuikin: “Min bake Benjamín en ana iweama en ea chakabu ixanaii, niti ikamadan”, akin en yubashinaki. Jawen bake nun ana iyuxunama nukun epa anu nun kaken unain nukun epa chanima mawaxanikiki, jawen bake ja bechipaijaidakin putaisma manuidan. Jaska wakin en epa en tenantiduki, juinti nishmajaidawenan. 33 Jaskawen taexun en betsa maxkuwen taeadan, ea awe, jawen xantukun bashikin dayadu esclavo wakinan. Janua en betsa maxku jawen betsabube ea yunuxunwen, jau jatube katanunan. 34 En betsa maxku jawen epa anu kamaken ja besti en bashitidumaki, en epa nuitapajaidai en uinkatsi ikamaki— anikiaki, jancha mae wanikawen jancha wakinan.