—Ana buxun xekiwan eskadabes nukun peiwen bitankanwen, nukunadan— jatu waya 3-5 Judán yuikin:

—Jawen kushipawen ja junin nuku nemakin yuikin: “Matun betsa maxku man iweamadan, ea anu ana beyamaxankanwen. Jakia matun betsa maxku iwekin piti man ana biyutiduki”, akin nuku yuimaki. Min nukun betsa maxku nukube yunuama piti bi nun katidumaki. Jakia min nukube nichianyan nun katiduki— aka 6 Jacobun ana jatu yuikin:

—Ea chakabuwakin ¿jaskakin man jadi yuimamen, ja juni: “Nun betsa maxkuyaki”, akinan?— jatu wa

7 —Ja junin nuku unanti wakin nukunabukidi nuku yuka chakayamakin yuikin: “¿Matun epadan, jiweamen? ¿Matun betsa ana jayamen?” nuku wa jaska nuku yuka nun banabima bestimaki. Nun daka jaskatan bebunkidi unain nuku jadi yunuaidan: “Matun betsa iwexankanwen”, ikaidan, jamen jaska bebunkidi unantan nuku yukai nukun betsakidi nun jawa yuiama ikeanimaki— akabu

8-9 jaska watan Judán jawen epa Israel ana yuikin:

—Jaska shinankin min nuku nichiainan, nun jiweyunun ja nukun betsa maxku ebe nichinwen. Ean mekebaini nun jabe jawaida kaintiduki, jau mia inun, nukunabu inun, nukun bakebu man mawayamanunbunan. Benjamín ninkamas mia mebinbain en iyushina en mia chintunwanxuanmakenan, ea axanwen, jawen taexun kupikinan. 10 Min bake nukuki yaushiama jawaida min nuku yunushinadan, nun ma dabeki katani jushian ikeanaii— aka 11-14 jatun epan ana jatu yuikin:

—Jaska en matu yunutidumabia en jawawen jaskatimaki. En matu jenexunai ea iyunditankanwen. Matun saku medan matun mabu pepa jamen inanti buxuntankanwen, isin puxati dau inun, buna bata inun, jawen nis wati inun, xeni jene jawen iti inun, tamawan dabe nuez inun almendradan. Ana pei betsa butankanwen. Saku medan matu inainma pei jexedan, jabiadi ana buxuntankanwen. “Min kaneimamenkain. Nukun pei biama min jakimaimamenkain”, atankanwen. Januxun matun betsa maxku iyukin ja xanen ibu uinmatankanwen. Janua Dios kushipa dasibi binua matuwen nuiaya ja Egipto xanen ibun Simeón inun Benjamín eanu ana chintunwanxanimenkain. Man en bake ea mebin keyubaina en bakeuma ixanimenkain. Jaska en shinainan, en jaskayuaidan— jatu wa

15 janua Jacobun bakebun mabu pepa inun pei jatu ana inainma inun ana pei betsa bukin jatun betsa maxku Benjamín iyui Egipto anu bui jikitan Josén besuudi mapuabu 16 Josén Benjamín jatube nia uinkin jawen jiwe anu dayamisbu mekenika Egipton janchawen yuikin:

—En jiwe anu ja junibu iyuxun ina awa betsa detetan ea bawaxuntanwen, badi manananbi en jatu pimai kaidan— aka 17 Josén yunua chibankin jawen jiwe anu jatu iyuaya 18 jatu jaska wabaina Josén betsabu datekin shinain:

—Tsuanda nukun pei nukun saku medan ana nuku mistuxunimawen taexun nuku iyuxun yuikin: “Man yumetsukainimaki”, nuku akin jawen tsumabu nuku achimaxun nukun asno mebinkin nuku jawen dayadu esclavo watiduki— ikainkin 19 Josén jiwe anu ma kene beputiki kemaxun Josén jiwe mekenika 20-22 yuikin:

—Xanen ibuun, mia yuinun nuku ninkawe. Ja dukun piti nun biwanimatianan, chanima xekiwan nukun peiwen nun bimaki. Janua ana kai bai puchinin uxakin nukun saku depexun ja medanu nuku tibitun pei nun bechimaki. Tsuanda nukun saku medan pei nuku nanexuna nun unanma ikimaki. Jakia saku medanua pei dasibi bechimaxun nun mia ana bexunxuki— akabu 23 jaska wabu Josén jiwe mekenikan jatu yuikin:

—Ea jaska yui jawen dateyamakanwen. Eanan, matun peidan, en matu bixuinmaki. Jaskakenan, matun mekenika yushinen matun epa mekemistun matun saku medan pei matu mistuxunimamenkain— akin jatu jaska watan jawen jiwe mekexunmistun meketi jiwe anua jatun betsa Simeón jatu kainmaxuntan 24 Josén jiwe ewapa anu jatu iyuxun unpax jatu inan juchukiaibun januxun jatun asno jatu pimaxunaya

25 —Xanen ibuan jawen jiwetanxun nuku pimaikiki— ikin bebunkidi unantan badi manananbi jabetan pikin ja mabu inankuin inankatsi beshinxun pewabun 26 José jikiaya inankuinti mabu buxuanbu ja naman beti ikabu 27 Josén jatu yukakin

—¿Man jaska pe juxumen? ¿Jamen matun ibu anibu man ea yuimadan, jadan jaskadamen? ¿Jiwediamen?— jatu wa 28 ja naman beti ixun yuikin:

—Min tsuma nukun epadan, pe nuku jiwexunyuaki— akabu 29 Josén jatu uinbaunkin jawen betsa maxku Benjamín jabe nanea uinkin jatu yukakin:

—Man ea yuimadan, matun betsa maxkudan, ¿jamen?— itan Benjamín besti yuikin: —¿Min miamen? Atimas en mia uiainan. Jau Diosun mia pepawakubainxanunwen— atan 30 jawen betsa kayabiwen nuijaidai kaxakatsis iki jawaida jawen dintu medan jikikain kaxa chakayamai 31 nesetan bechuki betekede ikidan jawen besu pekidan jawen tsumabu yunukin:

—Piti nexedikanwen, nun pinunan— jatu wa 32 Josén jatubetan pinun ika jamesti jawen tapu medibi ma pewaxuna inun, jawen betsabuna tapu betsa jaki tsauaibu ma jatu pewaxundia janua Egipto nawabu Josébetan pimisbu tapu betsadi jaya jabun beyawen taexun jabias tapukixuns Egipto nawabu Hebreo nawabubetan pisbuma tapu medibi tibi sedekin paxkaken 33 Josén besuudi jawen tsumabu jatu yunua jawen betsabu tsaunkin iyua dukun ja dapi tsaunxun ja kachu jatun badiwen betsabu tibi tsaundiabainkin jawen jenekin maxku tsaunkin keyuaya e iki keyutan unanxubida jabu besti yuinamei:

—¿Jaskatan iyua inun namakiabu inun maxku unankin nuku jaska waimenkain?— ikaibun 34 Josén jatu yunukin jau tapuki piti jatu inanbaununbun jawen tsumabu piti paxkamakin jawen betsabu tibi jatu inanmabaunkin januxun Benjamín besti nexe nexe amakin 5 kenchati piti matajaida wamaxun inan jatubetan pi mabex aki jabu Josébe benimaibun