3 jatun epan jancha ninkatan xekiwan bitanun ika Egipto anu Josén 10 betsabu buaibun 4 jakia Josén betsa maxku jabe nanea Benjamín jatun epa Jacob yaushikin jatube nichianma yuikin: “En jatuki dateaii. Benjamín jadi ea ichakawantidubuki”, inikiaki.

5 Canaán mai pakea anudi dasibi bunidiaibube Israelin bakebun xekiwan jatubetan bi budiaibun 6 José Egipto mai pakea jidabi xanen ibukin jatun besti peiwen taexun xekiwan jatu inanyan jawen betsabundi binun ixun yukai bua jaki nukutan jatun beya chibain José naman beti ikabu 7 Josén jatu uinkin jawen betsabu jatu unanbiakin unanma itsakin inun jabun Hebreo jancha unanma itsadiakin jatun jancha mae wanikabetan Egipto jancha bestiwen jatube janchakin sinatai keskakin jatu yukakin:

—Matudan, ¿jania man bekanxumen?— jatu wa jabun kemakin:

—Nukudan, nukun mai pakea Canaán anua xekiwan binun ika nun mia anu juxuki— akabu

8 Josén jatu unanbia jabun José unanbumaken 9 jaska namani Josén jawen betsabukidi shinantan jatu datekin jatu unanti wakin yuikin:

—Jaskamaki. Man chanichakaii. Jadatuda mae babu nuku detexanun ixun nuku unanti wai man bekanxuki— jatu wa

10-11 —Jaskamaki, xanen ibuun. Matun xekiwan peiwen matu bianun ika besti nun juxuki, nun min tsumabudan. Nukudan, nun juni bestichaitun bakebuki. Nun juni pepaki, nun unanti naismadan, juni chakabumadan— abiabu 12 Josén ana jatu yuikin:

—Man jaskakidi ea yuiaidan, jaskamajaidaki. Jadatuda nun mae babubu nuku detexanun ika nuku unanti wai man bekanxuki— jatu wa 13 jabundi ana kemakin:

—Nun jaskamajaidaki, nukudan, nun 12 betsabuki, junibusdan, Canaán anu juni bestichai jiweatun bakebudan. Uian, nukun betsa maxku jawen epa anuki. Jakia betsadan, ma nuku benuxuniki— akabu

14-16 jaska wabiabu Josén ana jatu yuikin:

—Jaska en matu jancha wai keskadan, matudan, man unantinan nikabuki. Jaskakenan, jawen matu unanti wakatsidan, Faraónen kushipawen chanima en matu jancha waii. Nenuadan, man kayuamaki, jau matun betsa maxku man iyutanunbunan. Jaskawen taexun matu bestichai kaxun itanwen. Jakia matudan, na jiwe medan en matu bichiyuai januxun manayukanwen. Jaska chanima kaya man yui ikimenkain matun jancha en matu unanxanunan. Faraón xanen ibu kayabiwen taea matun betsa maxku juamaken man unantinan nikabu en matu unanxanaii— jatu watan

17 ja bichiti jiwe anu jatu dasibi bichishina ma xaba dabe inun besti kaya 18-20 Josén ana jatu yuikin:

—Diosun kushipaki en meseaii. Jaska en matu yuiai keska ikanwen, man jiwenunan, chanima man juni pepamenkain. Matu bestichai bichiti jiwe anu bashikukanwen. Jatidi xekiwanyan bukin jau matunabun pinunbun jatu buxundikanwen. Ana jukinan, matun betsa maxku ea uinmakin iwexankanwen, man jaska wabidanaya matun jancha en ikunwanxanaii. Jamen matun betsa maxku man iweamadan, ana piti biama man mawaxanaii— jatu wa jabun yuikin:

—Min nuku jaska waidan, peki— ikaibun 21 jancha maewanika ma kaken jabu besti jatun jancha xabakabi yuinamei:

—Nukunan, nukun betsa José nun ichakawaniki. José: “Ea jaska wayamakanwen”, iki nuitapakin nuku jaska wabiaya nun ninkama iniki. Jaskawen taexun ikis nukundi nun bika tenediaii— ikaibun 22 januxun Rubén iyuatun jatu yuikin:

—Uinkanwen. En matu yuibia: “Ja bedunan ichakawayamanankanwen”, en matu wabia man ea ninkama iniki. Uian, José tenanibuwen taexun manakukin nukudi chakabuwakin Diosun nuku bika tenemaikiki— jatu waya

23 jatun Hebreo janchawen jawen betsabu Josén jatu jancha wama jatun jancha maewanikabetan José jawen betsabube janchakin jakia jatun jancha ninkajaidabiaya:

—Nukun jancha ninkamaki— ikaibun 24 jatu ninkatan ana jatu jancha wama nui José dabekekain dintu betsa medan jikia kaxai nesetan jatu anu ana jua jancha maewanikan medabewaya ana jatube janchakin Josén Simeón katutan jatu dapaxkamabainai uiainbun Josén Simeón jatu metaux amatan jawen jiwe medan jatu bichimatan 25 januxun Egipton janchawen jawen tsumabu yunukin yuikin:

—Jatun saku tibi xekiwan matawaxun june jaki jatun pei nanexun jatu tibi ana inanwen. Ja inun, bukin jau ja pikubaintanunbun pitidi jatu inankanwen— jatu wakin yunua jatu axuanbu 26 Jacobun bakebun jatun asnoki xekiwan saku katsauntan bexetan kainbaini bukin 27 janu niti itan uxaibu anuxun jatun asno pimakin betsan jawen saku depetan uinkin saku medan jawen pei bechitan 28 januxun jawen betsabu yuikin:

—¡Ejee, uian! En pei ea ana nanexuna en bechiaidan, en saku medanuadan— jatu wa dasibi datejaidai saki saki iki yuinamei:

—¿Jaskada nuku wai ikimenkain, Diosunan?— ika 29 ana bui Canaán anu jatun epa Jacobki nukuxun Egipto anu jaska jatu washianbu 30-34 chanikin:

—Ja juni Egipto xanen ibudan, nukuki sinatai keskakin yuikin: “Man unantinan nikabuki”, nuku wa: “Nun 12 juni bakebuki, juni bestichaitun nuku bawadan. Canaán anu nukun betsa maxku jawen epabe jiweaki. Betsadan, ma nuku debuwanibuki”, nun aka nuku ana yuikin: “En jancha ninkakanwen. Jaskawen taexun man juni pepabu en matu unanxanaii. Matudan, nenu bestichai bashikuyukanwen. Jakia jatiditun xekiwan buxun matunabu buniaibu pimayutankanwen. Janua matun betsa maxkudan, ea uinmakin iwetanxankanwen. Jaskawen taexun man juni pepabu unanti naisma en matu unanxanaii. Man ja iwei ana juaya matun betsa en jatu metaux amaima en matu taxnimaxunxanaii. En matu jaska waya na mai pakea anu bea jawama man nipakexanaii”, nuku washianki— akin jatun ibu yuiabu 35 jakimamadi jatun saku apatan pewakin depetan uian akeakebaunkin jatun pei tibi bechiaibu jatun epa dikabitun uin e iki dasibi datejaidaibun 36 jaska uinkin Jacobun shinankin jatu yuikin:

—Ea nuitapawakin man ea bakeuma waii. José yama inun Simeón jayamadiki. Ikis en jawen jenea bake Benjamín iyukatsi man yuixuki. Jaska wakin bakeuma wakin man ea nuitapawa chakayamaii. ¿Jawai ean besti en bika teneai?— ikaya

37 Rubénen jawen epa yuikin:

—Egipto anu Benjamín min ebe nichian mia mekexunbaintankin jadidixun en mia ana iwexunxanaii. Jakia en Benjamín chintunwanmaken jawen taexun ea kupikatsi ikin en juni bake dabe min tenantiduki— aka 38 Jacobun yuikin:

—En bakedan, en matube nichianmajaidaki. Jawen betsa José mawaniwen taexun jawen ewan ja besti bitan jaya ea mawaxuniken jaskawen taea matube kai bai namakia yutekakenan, ¿eadan en jaskaxanai? Matun ibu mestebu man ea tenanxanaii, nui paewenan— jatu waimaken