—En chakabuwen taexun min nuku aka en uinyama ja shinankin en mia yuiaii. Min tsumabuki sinatakin ea inun misi wanika xanen ibu nuku dabe mekenika capitánen jiwe anu min jatu nuku yunua nuku bichimabu ea inun misi wanika xanen ibudan, xaba betsatian jabias meshu medan uxa namakin nukun nama betsa tibi uinshinkin jawen shinan nun unanma xanen ibun mekenika dayadu esclavo Hebreo nawa bedunantun nukun nama tibi nun yuikin nukun nama tibi xabakabi yuikin nuku unanmashinken xaba dabe inun besti kaya jabiaskadi Hebreo nawan nuku yuishina keska wakin min ana ea chintunwanyamaki, en namayama keska wakinan. Ja inun, misi wanika xanen ibu min jatu tenexmayamaki, jaska jawen nama yuiyama keska wakinan— aka

14 jaska wa ninkatan Faraónen jawaida bichiti jiwe anu jatu yunua buxun José kainmabidan Faraón anu iyukatsi maxtekin kexniyabi maweden akin pewatan tadi bena sawematan Faraón anu uinmakin ja bebun iyuabu 15 Faraónen José yuikin:

—En uxa namashinai en jatu yuka tsuan ea xabakabi yuitidubumaki. Mianan, namabu min jatu unantan yuitidukiaki. ¿Chanimamen?— aka

16 Josén kemakin:

—Peki, jaska min ea yuiaidan. Emebi en unanmatidumaki. Jakia min nukun xanen ibujaida en mia yuinun en mekenika Dios kushipa dasibi binuatun ea unanma en miki chanitiduki, ewen taexun jau mia medabewanunan. Min jaskada uin namashini ikimenkain ea yuiwe— aka

17-24 —En uxa en namashinaidan, en eska shinaiin. Nilo jene kexa ka nixun en uianyan 7 ina awa xua jawenduajaida jene medanua nexekebidan basi piaibun janua chipu jabiatidi jaska Egipto anua awa en uinsma atimapa imanajaida mapekediabidan ja ina awa xuajaida pikin keyubiatan jawa ana xuama dasibi jabiaskas imana atimapa mapuabu uinkubidan en bestean ishin janua ana uxakain ana nama betsa uinkin eska en uinshinaii. 7 xekiwan jawen xai bestichaiki ewai jawen bimi ewapabu jawendua mexkan dakaken janua chipu xai betsa jabiatidi estekidia niwe ichapa bekin xana waya kainbidan jawen bimi xepan bimi ewapabu xeakin keyuaibun bestentan bika tenekin penaya juni mukayabu en jatu kena beabu en namashinai en jatuki chanibia tsuan taska unankin xabakabi ea yui pewabuma en iki ikaii— aka

25 ninkatan Josén jawen xanen ibujaida Faraón kemakin yuikin:

—Ja nama dabe min uinshinaidan, jabias nama min uin ishiaiin. Eska min uin ishiain mia xabakabi yuinun ninkawe. Min mai pakea jidabi anua eska Dios kushipajaida dasibi binuatun mia axunkatsi mia unanmanun ika ishinkiki. Ninkawe, mia yuinunan. 26 Ja 7 ina awa xua jawenduadan, 7 badiki. Ja 7 xekiwan taxu ewapabudan, jabias badidiki. Ja nama dabedan, jabias namaki. 27 Jamen ja 7 ina awa atimapa imanadan, uatian 7 badi idiaxankanikiki. Jabiaskadi ja 7 xekiwan niwe estekidia bekin xana wadan, 7 badidiki. Ja badi jaskaitian 7 año piti beneamaken minabun buni tenekubainxankanikiki. 28 Na namapan mia uinma shinainan, jaska miki chanishinaki. Dios kushipajaida dasibi binuatun jaska uatian kainmaxanai min xanen ibuken mia unanmashina xabakabi en mia yuiaii. 29 Januxun mia xabakabi eska waxanikiki, mia yuinun ninkawe. Na Egipto mai pakea jidabi 7 año xekiwan midima jamen iyuxanikiki. 30 Janua 7 año kaken ana piti beneama buni paepa tenexankanikiki, dasibibun yunu keyukunkainidan. 31 Jaska jiwekin jawa piti jayama buni tene chakayamaibuwen taexun ja 7 año jaskaitian man jiwexun xekiwan ichapawaxun pikubaini man ana shinanma ixanaii, bunidan. 32 Januxun Dios kushipajaida dasibi binuatun jaska wakatsis ikin mia uinmashina samama taewaxanaiwen taea mia dabeki namapan uinmashinaki. Uindawe.

33 —Na jabiatian min nukun xanen ibujaidawen taexun menan juni betsa unanepa anika benabaunkin bechitan yunudiwe, jau min mai pakea jidabi anu piti mekekin bebunkidi mia pewaxunkubainunan. 34-35 Nukun xanen ibu Faraóneen, ja juni katutan min eska watiduki, mia yuinun. Xanen ibu bexmas tibidi katutan jatu yunuwe, mai pakea jidabi piti dayaibu tibi anua jau uinbaununbunan. Ja 7 año xekiwan bimichakayamaitian xekiwan xemekin ichawakin 5 maspuaibu tibi anua uinbaunkin bestichai tibi mina mia waxuntidubuki. Januxun mia aduxunkin janu piti meketi jiwe mia waxuntan ja medan ja xekiwan ikai bipakekin jau mia jatu mekemaxunkubainxanunbunwen, minabun pixanaidan. 36 Min jatu jaska wamaken Egipto anua ja 7 año yudabun buni tenechakayamaibutian unanepakin min bebunkidi jatu adumaimawen taea minabun ja piti pi mawama jiwexankanikiki— aka

37 jaska wakin Josén jatu yuia Faraónen jawen xanen ibu bexmas yununikabubetan ninka pewatan 38 Faraónen jatu yuikin:

—Na juni keskadan, ¿jania jaska juni nun jaki nukutidumen, Diosun yushin jayadan?— jatu atan 39 José yuikin:

—Tsua mia keska unanepa jayamaki, Diosun dasibi unanmakin yuimamisdan. 40-41 Jaskawen taexun Egipto mai pakea jidabi anuxun jabia mia en mia katuaii. Min en yunua akai enabun mia ninkatan en jiwe ewapa jawendua anu inun en mai pakea dasibi anuxun mia uinkin jau dasibibun min yunua chibankubainxanunbunwen, jamen eadan, en xanen ibujaida bestikidan, mia binuadan— atan

42 januxun Faraón xanen ibujaidatun jatun besuubi jawen meichikiti metseketan José sawematan januxun jawen tsumabu yunukin jau tadi pe jawendua chaxa chaxa ikai sawemakin inun oro teuti teumakin jatu jawendua wamatan 43 Faraónen jatu jaska wamatan jatu yuikin:

—Ja caballo tadanti dabe en jaya ja jawendua bexmas en José ibuwamaii. Chipu jawena ixanikiki. Jaskaken na jabiatian jau uin taewabaunun en matu yunuaii. Man jaska taewamabaintanunbun ea ninkakanwen. José jawen tadantiki nia kaya bebun kushibainkin jui kushipawen jancha wakin yuda mapuabu jatu yuibainkin: “Bai tapinxunbaini ja kai bebun danti ixunbainkanwen, jau jadi kanunan. Jatu akubauntankanwen”— jatu wa jaska jatu yunua ninkatan José imabaunabu dasibi Egipto mai pakea anu xanen ibui taekin uinkubaunikiaki.

44 Jaskakauntani chintunkidanaya Faraónen José yuikin:

—Mia min jaskabia eadan, en xanen ibujaida Faraón bestiki. Jaskawen taexun jau mia chibankin kaneyamanunbun enabu jatu yunupakexanwen, Egipto jidabi anuabudan, min jatu yunuama tsuan jawa watidumakidan— atan

45 Egipto janchawen José kena benawakin: “Safenat-panéahki”, anikiaki, nukun janchawen yuiadan: “Dios Jiweatun Janchamamiski”, akin kenakinan. Jaska watan Egipto maewan betsa jawen kena On anuxun jatun mekenika dios jawenabu yukaxunmis Potiferan ainbu bake Asenat José bimakin ainwanmaima jaskai José xanen ibukin Egipto mai pakea uinkubaini jiwekunkainikiaki.

46 Ja José jaskaidan, 30 badiya Egipto xanen ibujaida Faraón anu iyuabu xanen ibu washina januxun Josén Faraón yuikin: “Jaska min ea yunushinadan, natian mia taewaxunkin en ma aki kaii, dasibi Egipto uinun ikadan”, ikaini 47 janua ja jaska chanima 7 año xekiwan midima jamen ikaya 48 7 año jatun mae tibi anu xekiwan dayai taekin ichawaibu anu Josén tsumabu buxun jatun mae anu xekiwan ichawakin año tibi manchin betsa bikubainkin januxun mae ewapa betsa betsapa anudi xekiwan jabiadi aduti jiwe medan ichawadiakin jatu mekemakeake mekekubainaibun 49 jati xekiwan ichawaibu tsuan jati tanatiduma mashiti keska adukin jatida adutan Josén ana tanatiduma jenenikiaki.

50 Janua buni tekidiamatian Josén juni bake dabe wanikiaki, jawen ain Asenatkidan. 51 Ja dukun bakewaima kaian Josén yuikin: “En epa jakimai inun, jawenabu jakimai inun, jaska bika betsa betsapa en binukubidanshina Diosun ea jakimawaimawen taea en baken kenadan, Manaséski”, akima 52 januxun ja kachu jawen bake kaian, shinankin yuikin: “Nenuxun ea ichakawabianibu anuxun Diosun ea pawaiwen taea en baken kenadan, Efraínki”, anikiaki.

53 Ma 7 año ka yunu midima jamen ishian Egipto anua binukainkidanaya 54 janua jaska Josén yuini keskai 7 año buni pakei taeaibun mai pakea betsa betsapa tibi jiwebaunabu buniaibun jakia Egipto anu besti piti adu jayaken 55 janua Egipto nawabudi buni taebaunkin jatiditun Faraón xekiwan adu yukabu xanen ibujaida Faraónen jawenabu dasibi jatu yuikin:

—Ea yukama José anu buxun jaska matu yunuai keska jabe janchakin yukatankanwen— jatu wa 56-57 jatu jaska waimaken mae betsa betsapa anu buni pabauni pikuaya januxun Josén jawen piti aduti jiwe anua Egipto nawabu xekiwan peiwen jatu inankatsi bepeanyan jawen tsumabun jatu inankin taewanibukiaki. Jatu jaska waya buni pikukunkainaya janua mai pakea tibi anuabudi jawa pitima Egipto anu besti piti jaya chaniaibu ninkatan yuda xukua betsa betsapatun janua binun ika José anu bebidan bebidanibukiaki, jatun mae anu jawa piti jayamawen taeadan.