Juni dabetun nama Josén jatu unanxunikiaki, na janchadan
40
Ana betsatian jatun xanen ibu uva vino dau jayamenkain ixun juxkexun metan peken amamis xanen ibu inun, betsadi misi wamis xanen ibudi ja dabetun jatun xanen ibujaida Faraón dayai pexunama 2-3 jaskaibun ja dabeki xanen ibu Faraón jatuki sinatakin bichiti jiwe capitánen jiwe janu jatu bichimis anu jatu yunua jatu bichimabu anudi José bichidiaimabu anu 4 bichiti jiwe xanen ibun jau Josén jatu mekekubainun yunuima jatu medabewakubainaya xaba ichapa kaya5 janua vino juxkexun mexunmis xanen ibu inun misi wamis xanen ibu meshu medan ja dabe uxa namakin ja dabetun nama betsa dabe uinshinaya 6 penaya José jikixun ja dabe shinan chankanma punu nukabu jatu uinkin 7 yukakin:
—¿Jaskai man pes punu nukamen?— jatu wa
8 ja dabetun yuikin:
—Nun uxa namachakashinai shinain tsuan nuku unanxunkin xabakabi nuku yuitima nun tsaua ikaii— akabu
—Man namashinaidan, Diosun matu unanmatiduki. Jani man namashinai ea yuikanwen, ninkanunan— jatu wa 9-11 ja dukun uva vino juxkexun mexunmis xanen ibun José yuikin:
—Ea en namashinaidan, mia yuinun ea ninkawe. Ea bebun uva taxu nishi ewashinaki. 3 mebi teshpa tibiki jawen jua tuei uva taxu nishi peketan ja jua anua jawen bimi ewai jushiain xanen ibujaida Faraónen kencha tsumaxun bimi tsekatan kenchaki tsinixun en tsuma en inan akai uxa jaska namakin en uinshini ikaii— aka 12-15 Josén ja dukun yuikin:
—Ja 3 mebi teshpadan, 3 xabaki. Ja 3 xaba kaya min xanen ibu Faraónen na bichiti jiwe medanua mia kainmatan ana jawendi chintunwankin min ana xanen ibunun mia yunuxanikiki. Jawen uva vino ana juxkexuntan min ana mexunxanaii, uatian min axunkubainmis keska wakinan— atan —Faraónen mia ana bechipaiaya ekidi shinankin ewen nuikin xanen ibujaida Faraón ekidi ea yuixuindaxanwen, nenua jau eadi kainmadiaxanunan. Eadan, en nawa betsaki, Hebreodan. Enabun mai pakea anua ea june iwenixun en jawa chakabuwamabiaken ea jamen bichiyamabuki— akaya
16-17 misi wamis xanen ibun Josén jaska wai ninkatan pewai jawen jancha bechipaikin José yuikin:
—Enadi en uxa namakin uinshinai mia yuidianun— atan —3 chichan ewapaki misi betsa betsapa mata matsaumekidan en Faraón bexuanyan jabiatiandi ja misi peiyabu bexun piaibun jaska uxa namakin en uinshinaii— aka 18-19 Josén jadi yuikin:
—Ja 3 chichan ewapadan, 3 xabaki. Ja 3 xaba kaya Faraónen min dayakidi ana shinantan mia danankin bechipaiama jatu yunua min yuda jiki tenextan mia duntanbu min mawa peiyabu bexun min nami mia pikin keyuxankanikiki— jatu wakin yuishinken
20-22 ma 3 xaba kaya Faraónen baditian jawen tsumabu dasibi ichawatan nawamakin ja vino juxkexuntan mexunmis xanen ibu inun misi wamis xanen ibu bichiti jiwe anua kainmaxun Josén yuishina keska vino mexunmis xanen ibu Faraónen ana xanen ibu wa ana Faraón vino juxkexuntan mexuni ana xanen ibuaya janua Faraónen ja junin misi wamis xanen ibu jatu tenanmakin tenexmatan jatu duntanmanikiaki. 23 Jakia jaskaitian vino juxkexuntan mexunmis xanen ibun jaska Josén yuishina ana shinanma jakidi jakimanikiaki.