Josékidi Potifarin ain chanichakanikiaki, na janchadan
39
Ismael nawabun José bibainkin Egipto anu iyuabu Egipto nawa Potifarin peiwen taexun jawen dayadu esclavo wakin José binikiaki. Egipto nawa xanen ibujaida Faraónen jiwe ewapa jawendua anu mekenikabu yunumis jatun xanen ibu Potifar jatun capitán inikiaki. 2 José jawen tsuma Potifarin jiwe anu dayaxunaya Jehován medabewaya José jawama pe dayakunkainikiaki. 3 José dayai Jehová Diosun medabewakin pepawamaya jawen tsumapan chanima kaneama uin 4 jawen shinan chankankin jawen tsumapan José bechipaijaidakin duawakin jaki chiti ikatsi dasibi jawen tsumabu inun jawen jiwe anuadi mekexunika wakin jawen bai inun jawen inabu uinika wakin katunikiaki. 5 Januxun José jaska yunuimawen taexun Jehová Diosun Potifar duawakin dasibi jawen jiwe anua inun jawen bai anua pepawakin medabewakubainaya 6 jawen xanen ibu Potifarin jawen tsumabu betsa ana yunuama José bestitun jau jatu uinun yunuima jawada jayawen ana nuikin shinanma jawen pitiwen besti nuikunkainikiaki, ana jawa meama jiweadan.José jawenduawen taexun dasibibun uinkin bechipaiaibun 7 betsatian jawen tsumapan ainen José jawendua uinkin jawen kemui bechipaikin chutamakatsi ikin yuikin:
—En mia bechipaiaii. ¿Mibe janchapa?— aka
8-9 Josén nemakin:
—Miwen kemukin en mia meamaki. Uian, ea uinika waxun en tsumapan jawen jiwe inun jawen bai ea yunuimaki, jawena dasibi en meke pewaxununan. Nenu ea inun en tsuma nun jabias keskaki. Jawena dasibi yaushiama ea mekemakin ea yunuyuimaki. Jakia mia besti ea yunuamaki, min jawen ainan. Jaskai eiskauan emebi chakabui en daketapatidumaki, Dioskidi chakabuidan— aka 10 jakia Josén ainbu jaska wabia jawen jancha ninkama jaki patapakin chutamanun ixun jawenchains xaba tibi bikawakubainbia jawa meama ikunkainaya 11 xaba betsatian jiwe medan janu tsua jayamaken José dayanun ika jikiaya 12 jawen tsumapan ainen José jawen tadi chaipa saweawen tsumaxun yuikin:
—Natian en mia chutamakatsis ikaii. Ea chutawe— abia mekatsi ikama jawen tsuma datei kainkainkin jawen meken anu jawen tadi jenexunbaini taxnikainaya
13 jawen tadi tsuma jenexunbaina ainbu naxuku paepakin 14-15 jawen tsuma betsabu jemaintin anu dayadubu kenaxun jatu yuikin:
—Uinkanwen. En benen Hebreo nawa bikin dayadu esclavo waimatun ea dakewakin nukuki jatu kaxemaikiki. Ea chutanun ika jikikain jawen tadi pekaya en bis ichakayamaya datekin jawen tadi beama kainkidanxuki— jatu watan 16-17 janua Josén tadi adua ibaikin jawen bene Potifar juai yuikin:
—Ja Hebreo nawa min peiwen bimatunan, ea chutanun ika en dintu medan jikiaya ebe jikikain ea mepaia 18-19 datei en bis bis ikaya datekin jawen tadi benubidani jawaida kushikidanxuki— aka jawen ainin jancha ninkatan Joséki Potifar sinata chakayamakin 20 achixun bichiti jiwe anu jatu bichimaken Egipto xanen ibujaida Faraónen yunua axuanma kaneaibu jatu bichimisbu anu José jatube bichiti jiwe medan jiweyuken 21 januxundi Jehová Diosun José ana medabewakin duawakin bichiti jiwe xanen ibu José pe uinmakin bechipaimaya 22 bichiti jiwe xanen ibun José katukin jau medabewanun yunutan jaska washina ja jabe bichiabu dasibibu mekekin Josén jatu yunuxunkubainikiaki. 23 Jehová Diosun José medabewakin jamapai Josén jaska wakin pepawakubainwen taea bichiti jiwe xanen ibu jawen dayawen ana jawen nuiama jaki chiti ikunkainikiaki.