Jacobun juni bake Judá inun jawen babawan Tamar eskanibukiaki, na janchadan
38
Ja jaskaitian Judán jawen betsabu jenebaini Adulam mae anu ka juni betsa Hirá anu jiwetushimaxun 2 jadixun Canaán nawa juni betsa Súan ainbu bake bechipaikin bikin ainwantan 3 bake bawa juni bake kainxuntan jawen ewan kenakin: “Erki”, akimaken 4 ana bake bawa ana juni bake kainxundiatan jawen ewan ana kenakin: “Onánki”, adiaimaken 5 Quezib anuxun ana bake bawa ana juni bake kainxuntan kenakin: “Seláki”, anikiaki.
6 Judán bake iyua Er ewaken jawen epan ainbu betsa Tamar iwexun ainwanma 7 Erin Diosun yunua chibanma jamebi jawen shinanen jiwe chakaiwen taea Jehová Diosun bechipaiama tenanken 8 januxun jawen juni bake betsa Onán Judán yuikin:
—Min betsa mawaimawen taexun nukun beya chibankin mian juni bake min betsa min bawaxuntiduki. Min betsan ain bitan juni bake bawaxunxanwen, min ja dabia jawenabu keyuama jau ipakexanunbunan— aka 9 Onánen shinankin:
—En juni bakebu bawaxuna ena itidumaki— ikin jawen juchi bake bawaxunkatsi ikama jawen betsan ain Tamar ainwanbiaxun chutabiakin juda juaya tsekaxun chakawakubainaya 10 jaskai Onán jawen betsa debuima bake waxunkatsi ikama jaki dakekunkainaiwen taexun Jehová Diosun bechipaiamajaida jadi tenanikiaki. 11 Ja jaskaimabun Judán shinankin:
—Selá en bake maxku Tamar janubi en ana ainwanma jawen betsabu keskai ana mawadiatiduki— ixun padankin Tamar yuikin:
—Min epan jiweanu kaxun en bake maxku Selá jau ewayunun beneuma jiwexun manayutanwen. En bake maxku Selá ewaya en mia inan min benewaxanaidan— aka jawen jancha ninkatan Tamar ka jawen epan jiwe anuxun manai jiweyuken 12 jaska wa kayamaken Súan ainbu bake Judán ain bini ma mawaken Judá kaxai nesetan jawen chaxuwan dani mextei kanun ika Timnat anu jawen jaibu Adulam nawa Hirábe yubakaken 13 bebunkidi ninkatan tsuanda Tamar yuikin:
—Uian, min kuka Judán Timnat anu jawen chaxuwan dani mextei kaikiaki— ixun yuia 14 januxun ninkatan Tamarin shinankin:
—Selá ma ewabiaken en kuka Judán en benewanun ea ja bimama itiduki— itan jawen bene mawaima unanti jawen bachi pekatan bachi betsa sawekin bachi tuax betsawen mayabukutan betsawendi debepukutan jawaida jawen kuka kaikidi binukain Enaim mae jikiti xui anu Timnatkidi bai ka kexanu tsauxun manaya 15 Judá jawen jaibu Hirábe kakin ja ainbu jininipa chutamisbu keska debepukua tsaua uin:
—Ja ainbudan, mawa chutati pedukain— ikain shinanbain 16 jaki nukuxun jawen babawanma dabanen unanma jabe yubakakin yuikin:
—¿Min ea chutamatidumen?— aka
—¿Ea chutakatsidan, jawa min ea inantidumen?— aka
17 —En inabu anua chaxuwan bake en mia bematiduki— aka
—Min ea yunudiamadan, ¿jawa unanti min ea bashixunai?— aka
18 —¿Jawa unanti mia bashixunpa?— aka
—Min jawen unantiwamis sello teutiya inun min mestenti keneya min tsumamis ea bashixunyuwe— aka ja ea akin yuiai inantan chutatan unanma bake bawatan kaken 19 jaska wabainaya benikaini kaxun jawen bachi tuax debepukukaina pekatan ana jawen bene mawaima unanti bachi ana sawetan jawen epan jiwe anu kaken
20 —Ja ainbun en mabu ea bian en jushianki. Jau ea inanun ea mebinxunkin chaxuwan bake buxuntanwen— iwanan, Judán jawen jaibu yunua ja mae anu ka ainbuki nukuama 21 Enaim mae anua junibu jatu yukakin:
—¿Na mae Enaim anua ainbu bai kexa tsaua chutamisbudan, jani kamen?— jatu wa kemakin:
—Nenu ainbu chutanamemisbudan, jayamaki— akabu 22 janua ana chintunkain Judá jawen jaibun yuikin:
—Ainbudan, en jaki nukuama itanaii. Jabianuxundi junibun ea yuikin: “Nenu ainbu chutanamemisbudan, jayamaki”, akin ea yuikanxuki— aka 23 Judán yuikin:
—Chaxuwan bake en yunubia min jaki nukuama ixuki. Jau jabiaskanunwen, en mabu bishianyanan, ana kaxun nun jatu yukabauna nuku kaxe watidubukidan. Mebinun ixun ja ainbu benayamananwen— akima 24 janua 3 uxe kaken januxun betsabu bexun jaki chanikin Judá yuikin:
—Min babawan Tamar atiai chutanameima ma tuyaimaken chanikanikiki— akabu ninkatan sinatakin Judán yuikin:
—¿Jawakin ea jaska washinamen? Achixun kuakin tenantankanwen— jatu wa 25 buxun jawen babawan achiabu jatu nemakin yuikin:
—Ja dukun jatun ea akima jawen unanti en jayaki. En kuka Judá uinmatankanwen. Ea yuixunkin: “Eska en jayaki, min jawen ea unanti watidudan, jawen mabudan. Na jawen unantiwamis sello teutiya inun jawen mestenti keneya tsumamis ea bashixunima tsuanada ibuan unantiduki, jatun ea akimadan”, ea axuntankanwen— jatu wa 26 janua jawen mabu buxun jawen jancha yuixunkin jawen unanti mabu buxuanbu uintan dakekin Judán yuikin:
—En bake Selá en Tamar bimamawen taexun ean en chakabuwaimaki. Jaskawen taexun en babawan Tamarin ea padainmaxun jatun pekainmaikiki— jatu wa menupananbun jatu nemaimaxun ana jabe jiwekin meama inikiaki.
27-28 Jaska waima jawen bake janu kaiaintian juni bake tsupibu dabe kainkatsi iki isin kaiin bake betsa ja dukun jawen meken dukun taxnima bake jatun kainmaitun ja dukun unantiwakatsi yumen tashipa menexkin yuikin:
—Na dukun kainwanxuki— atan 29 jaska wabia janua ana mexekiken ja dukun ikama jawen betsa dukun taxniaya bakeishta jancha wakin:
—¡Jabaa! ¿Jaskai mian min betsa maemai dainbidan min taxniai?— aka jaskaxuwen taexun jawen ewan kenakin: “Fareski”, atan 30 janua jawen betsa ja kachu taxnia yumen tashipaya menexekeya kaian kenakin: “Zérahki”, anikiaki.