José 17 badiyatun jawen epan esclava ain dabe Bilhá inun Zilpán juni bakebube jawen epan jatu yunua jawen chaxuwan nimakin pimai jadixun jawen betsabu mapuchakaxun chakabu akaibu José jawen epaki chanikidankidanikiaki.

3 Israel anibukin José bawaimawen taexun ja besti bechipaijaidanikiaki, jawen juni bakebu betsa mawaida jatu bechipaiamadan. Jaskawen taexun tadi jawendua chaipa daya tadima Israelin José jatu wamaxuna 4 jatun epan jaska waxunkin José bechipaijaidai jatu binujaida jawen betsabun uinkin José dananibukiaki, jaska wa nia uin jabe pe janchanameamadan.

5-8 Janua ana betsatian José uxa namashinkin jawen betsabu yuikin:

—Uxa namaidan, en eska shinaiin. Matu yuinun, ninkakanwen. Bai anu nun dayakin xekiwan mextexun neaxun nun manchinkubainaya en xekiwan nea jamebi benikauan niken janua matun xekiwan neadi benibidan juxun kenwain ena daxukua icha ena naman tininbainbaina en uinshinaii— jatu wai ninkatan ana jaki sinatakin yuikin:

—¿Nuku binui xanen ibutan min nuku yunuxanai uinshinkin min nuku yui ikai?— akin Josén nama inun jawen jancha bechipaima José danankubainibukiaki, xaba tibidan.

9 Janua ana betsatian José ana uxa namakin uintan bestenkauan jawen betsabu ana yuikin:

—Uian. En ana uxa namashinaii. Matu ana yuinun ea ninkakanwen. Badi inun uxe inun 11 bishi ea naman xukua ea kenwain tininbainbaina ea dasedea en uinshinaii— jatu wabidan 10 janua jawen epa anudi juxun jabias jawen betsabu yuixu jawen epaki chaniaya jawen epan kunyan akin yuikin:

—¿Min nama min nuku yuikubainaidan, jaskaxanun ixun min nuku yui ikai? ¿Ea inun, min ewa inun, min betsabun mia kenwain nun daka beti ika dakaxankanai? ¿Min nukun xanen ibu daka ikunkainxanai?— akaya 11 jawen betsabun danain jaki sinataibun jakia jawen epan besti Josén jancha jakimama shinanxunkubainikiaki.

12 Janua betsatian jatun epan chaxuwan pimanun ika basi pepa benai Siquem anu Josén betsabu bushianbun 13 janua chipu jau Josén jatu uintanun Israelin yunukin:

—Siquem anu min betsabun nukun inabu pimai bushianbuki. Jatu uintanwen, jani jaskakanimenkainan— aka

—Peki. Jaskakenan, en jatu uin kaii— ikaya

14 —Min betsabu inun nukun inabudan, ¿jaskadamenkain? Jatu uintanwen, juxun ea banabimayuxunan— iwanan, jaska janu Hebrón napanpa anuxun José yunua kai Siquem anu José jikitan 15 jatu benakubauni jamakidi benui kaya juni betsa jaki nukuxun yukakin:

—¿Min jawa benakubaunai?— aka 16 kemakin:

—En betsabu en benai ikaii. ¿Min jatu uinshinamen, janixun inabu pimakanimenkainan? Ea yuiwe— aka 17 yuikin:

—Ma nenu ibainshinabuki. “Dotánkidi bunankanwen”, ikaibu en ninkashinaki— aka

jawen betsabu chibain Dotánkidi jatuki nukui kaya 18 José jatuki kemadiama José chai juai jawen betsabun bechitan:

—¿Jaska watan nun tenain?— ika yubakatan 19-20 jatun shinan tibiwen yuinametan:

—Tua juaii, uxa namatan nukuki chanimisdan. Tenantan kini medan putanankanwen. Jawen epa yuikin: “Yuinaka piananbun José pishianki”, nun aki buxanunbunan. Januxun jawen nama nuku yuimis jaskaxanimenkain, nun uinxanunbunan— ikaibun 21-22 Rubénen jaskaibu jatu ninkatan José jatu nemaxunun, iwanan, yuikin:

—Tenankin jimi chakawama nenu na tsua jiweabumanu ua na kini medan putanankanwen, deteamadan— jaskatan José detepaiaibu jatu nemakin chipu jawen epanu iyuxunkatsi Rubénen jaska shinanikiaki.

23 Janua jawen betsabuki José nukutushiai jawa jancha wama achixun jawen tadi chaipa jawendua pekantan 24 kini keyatapa metu anu putabu 25 jawen betsa Rubén paxkakainken jawen betsabu pi manixun uinkin Ismael nawabun camellowen xeni ininipa jawen iti inun jawen puxati dau Egipto anu jatu inantanun ika Galaad anua beaibu jatu bechitan 26-27 Judán jawen betsabu yuikin:

—José jamen detetanan, nun jawa bitidumaki. Jaskakenan ua Ismael nawa beaibu jatu inantan pei binankanwen, jau dayadu esclavo wabaintanunbunan. Josédan, nukun jimiwen taexun tenanyamanankanwen— iki yubakai maniabun 28 Ismael nawa xukua betsa mabu inanananmisbu Madián nawabu bei jatuki nukuaibun jatube janchatan kini medanua José metsunxun kainmabidan jatu inankin 20 pei jexe juxupa plata ewapa kadujaidawen taexun José jatu inanbu Egipto anu iyui buaibun

29 Rubén jatu dapaxkabaintani ana kini anu kemaxun uian José jayamaken nuijaidai juinti nishmajaidatan jawen beyawen taexun jawen tadi ushnitan 30 jawen betsabu anu kaxun jatu yuikin:

—José kini medan man putadan, ana jayamaki. ¿Man jaska waxumen? Jaskawen taea ¿eadan, jaskaxanpa?— jatu wa jaska wakanxu Rubén yuitan 31-32 januxun jatun epa jawen bepadankatsi chaxuwan bene pishta tesentan Josén tadi jawen jimiwen idumawatan jawaida nexebain jatun epanu buxun padankin yuikin:

—Na tadi nun bechishinaki, janu tsua jiweabuma anuadan. ¿Jabia min baken tadimenkain? Uinwen— akabu 33 uinkin unantan Jacobun yuikin:

—En bakenaki. Yuinaka piananbun pikin en bake José ea daki pianshinabuki— itan 34 juinti nishmajaidatan jawen tadi ushnitan pekaxun nishi tadi tima bexa sawea uxa ichapa jawen bakewen nuichakayamai kaxajaidaya 35 jawen juni bakebu dasibi inun jawen ainbu bakebu dasibitun nesewapaiabu jatu ninkama yuikin:

—Ea nemakin nesewayamakanwen. En bake Joséwen nui sain isi en jaki nukui mawadiaidan— ika kaxa jeneyuama inikiaki.

36 Jabiatiandi Madián nawabu, jabias Ismael nawabudan, José iyui Egipto anu jikishinxun peiwen taexun jabundi pei bikatsi José Potifar inanibukiaki, jau jawen tsuma wakin esclavo wanunan. Egipto nawa xanen ibujaida Faraónen jiwe ewapa jawendua anua detenamenikabu xuku betsa mekemis Potifar jatun xanen ibu inikiaki.