6-7 Jaska jiwea shinan betsatan jawen ain dabe inun besti inun, jawen 7 juni bake inun, jawen ainbu bake tanama inun, jawen dayadu esclavo inun, jawen inabu inun, jawen mabu dasibiya Canaán anua Esaún jawen betsa Jacob dapaxkabainikiaki. Jacobun enabu inun, jawen tsumabu inun, jawen inabu midimaken Esaúna jabiaskadiken jabetan jania jatun inabu jatu pimatima ana jabe jiwekatsi ikama uintan medibi jiwetanun itan jaska Canaán anua dasibi betsa betsapa bishian jaya maei kanikiaki, jawen betsa Jacob jenebainidan.

8 Janua surkidi kai Esaú, jawen kena betsa Edom mati matipa anu Seír anu jiwei kanikiaki. 9 Jaskabaini jadia Esaún bakebun bakewa panibukiaki, Edom nawabuidan, mati matipa Seír anu jiwekubainidan. 10 Esaún juni bakebun kenadan, jawen ain Adán juni bakedan, Elifaz inikiaki. Basematin juni bakedan, Reuel inikiaki. 11 Januxun Esaún bakebun babaya wadan, Elifazin juni bakebudan, Temán inun, Omar inun, Sefó inun, Gatam inun, Quenaz jatu bawanikiaki. 12 Januadi Elifaz janubi jawen esclava ain Timnáki bakewadan, juni bake Amalec kainikiaki. Ja jabun bababudan, Esaún ain Adá anua inibukiaki. 13 Janua Esaún juni bake Reuelin bakewa Náhat inun, Zérah inun, Samá inun, Mizá jati Basematin jawen juni bababu inibukiaki. 14 Sibónen baba ja ainbu bake Anán bake Oholibamá bitan Esaún jaki juni bakebu jatu bawa Jeús inun, Jaalam inun, Coré inibukiaki.

15-16 Esaún ain Adán juni bake iyua Elifazin juni bake bawadan, jati Edom anu xanen ibu tibi inibukiaki, Temán inun, Omar inun, Sefó inun, Quenaz inun, Coré inun, Gatam inun, Amalecdan, jati Adán juni bababu inibukiaki. 17 Esaún ain betsa Basematin juni bake Reuelin juni bakebudan, jati Edom anu xanen ibu idianibukiaki, Náhat inun, Zérah inun, Samá inun Mizádan. 18 Anán ainbu bakedan, Oholibamá Esaún ain betsa jawen juni bakedan, jati Edom mai pakea anu xanen ibu inibukiaki, Jeús inun, Jaalam inun, Corédan. 19 Ja ainbu tibiki Esaún, jawen kena betsa Edom jatu juni bake bawa jati jawen juni bakebu inun jatun bababu Edom anu xanen ibubu inibukiaki, jatunabu jiwemaidan.

20 Janua Horeo nawa Seír jabianudi jatube nashui ika jiweatun juni bakebudan, Lotán inun, Sobal inun, Sibón inun, Aná inun, 21 Disón inun, Éser inun, Disán jatibudan, Edom mai pakea anu jabudi xanen ibui jiwenibukiaki. 22 Seírin juni bake Lotánen juni bakebudan, jati inibukiaki, Horí inun Hemamnan. Lotánen puidan, Timná inikiaki. 23 Janua Seírin juni bake betsa Sobalin juni bakebudan, jati inibukiaki, Alván inun, Manáhat inun, Ebal inun, Sefó inun, Onamnan. 24 Janua Seírin juni bake betsa Sibónen juni bakebudan, Aía inun Aná inibukiaki. Ja Anánan, janu tsua jiweama anu kaxun jawen epan asno mekexun pimaxunkin unpax chacha betsa betsapa jabamis bechitanikiaki. 25 Ja Anán juni bake betsan kenadan, Disón inun jawen ainbu baken kenadan, Oholibamá inikiaki. 26 Janua Disónen juni bakebudan, Hemdán inun, Esbán inun, Itrán inun, Querán inibukiaki. 27 Seírin juni bake betsa Éserin juni bakebudan, Bilhán, inun, Zaaván inun, Acán inibukiaki. 28 Seír jawen jenea juni bake Disánen juni bakebudan, Us inun Arán inibukiaki.

29 Janua Seír mai pakea anu Horeo nawa xanen ibu tibidan, jati inibukiaki, Lotán inun, Sobal inun, Sibón inun, Aná inun, 30 Disón inun, Éser inun Disánan jawen betsabube jiwei xanen ibuidan.

31 Jabu dukun Israelbu xanen ibudiabumaken ja nawabu xanen ibukin dasibibu yunukin taewanibukiaki, Edom mai pakea jidabi anudan. 32 Beorin juni bake Bela Edom mai pakea jidabi xanen ibu inikiaki, jawen mae Dinhaba anuxun jatu yunukubainidan. 33 Bela mawaken Zérahn juni bake Jobab xanen ibunikiaki, jawen mae Bosrá anuxun jatu yunukubainidan. 34 Janua Jobab mawaken mai pakea Temán anua jabianudi Husam xanen ibu inikiaki, dasibibu yunuidan. 35 Janua Husam mawaken Bedadnen juni bake Hadad jawen xantukun xanen ibuaya Madiánen detenamenikabu Moab mae anu beaibube detenamekin jawenabubetan jatu maemanikiaki, jawen mae Avit anuxun jatu yunukubainidan. 36 Janua Hadad mawaken jawen xanen anu xanen ibui Samlá inikiaki, jawen mae Masrecá anuadan. 37 Janua Samlá mawaken jawen xantukun xanen ibui Saúl inikiaki, jawen mae Rehobot, jene kexa jiweadan. 38 Janua Saúl mawaken jawen xantukun Acborin juni bake Baal-hanán xanen ibunikiaki. 39 Janua Baal-hanán mawaken jawen xantukun Hadad xanen ibunikiaki, jawen mae kenadan Pau anuadan. Hadaden ainan jawen kena Mehetabel inikiaki. Jawen epa Matred inun jawen juchi Mezaab inikiaki.

40-43 Ja yudabu tibi Esaún enabu, jawen kena betsa Edomnan, pai eskanibukiaki, xukuabu tibi inun mae tibi inun kena tibidan. Jatun kena tibidan, Timnán enabu inun, Alván enabu inun, Jeteten enabu inun, Oholibamán enabu inun, Elán enabu inun, Pinónen enabu inun, Quenazin enabu inun, Temánen enabu inun, Mibsarin enabu inun, Magdielin enabu inun, Iramin enabudan, jati inibukiaki, Edomnen bababu xukua tibidan.