—Minabu pewatan Betel anu jiwei kawe. Janu jiwea min Esaú anua paxaya en miki nukua min namaya en mibe janchani anu ja mishki chi tapu januxun min ea kenwantidu axanwen— aka 2 jaska wa datekin jawenabu inun jawen tsumabu Jacobun yuikin:

—Matu anua dami yushin tibi man jaya kainmakanwen. Janua nashi chuki petan pepanun, ika matun tadi betsa sawetan 3 janu Dios jiwea mae Betel anu bunankanwen. En nuitapakaini kai janida en kapanan Diosun ea unankin medabewakin ea jancha wani janida en kaya ebe kakunkainmiski, ea jaska wamiswen taexun Dios kenwankin mishki chi tapu wakin mishki ichawakin maspu watan en chaxuwan bake textexun en menu keyuxuni kaidan— jatu wa 4 januxun jatun yushin dios dami tibi betsa betsapa kenwankin damiwamisbu inun, jatun dami oro mane pau Jacob inanbu mae Siquem dapi ji xukua naman pukinxun ana uintimawakin Jacobun dasibi maiwatan 5 jatu jaska wamabaini taxnibainaibun mae tibi anua Diosun jatu datemabaunaiwen taexun Jacob jawenabube detekatsi ibiai datekin jawen bakebube chibanma inibukiaki.

6-7 Janu jawen betsaki datei paxai kai uxaki janu Dios jaki nukuni ja mae Luz nawabun kenanibu anu Dios jaki nukua uinshinkin kena bena wakin: “Betelki”, ani anu ana Jacob jawenabuya jadi kai jikitan januxun chi tapu wakin mishki ichawakin maspu watan Dios kenwankin Jacobun chaxuwan bake tesenxun menu keyuxuntan ana jabiadidi kenakin: “Betelki”, anikiaki. 8 Jabianuadi Jacobun ewa Rebeca jatun yumewani jawen tsuma Débora ma yuxabujaida mawaken Betel mae dapi ji xukua naman mai watan jabianuadi kaxa chakayamatan jawen taexun kenakin: “Nui pae ji xukuaki”, anikiaki.

9 Padán-aram anua ana Jacob chintuinmaken Dios ana jaki nukuxun jau jaskanunbadinun Diosun jawen kushipawen duawakin pe yuikin 10 eska wanikiaki:

13 janua Dios Jacobube janchatan kaken 14 jabianudi Jacobun mishkiwen unanti wakin dabekin nichintan jaska watan Dios kenwankin uva vino inun piti xeni jene inankuinkin jaki maxu akin maukanikiaki, ja mishki Diosuna wakinan. 15 Jaska watan ma anixun ana jabiadidi kenakin: “Betelki”, anikiaki, nukun janchawen kenadan: “Diosun Jiwea Maeki”, akinan.

16-17 Betel anua kainbaini mae betsa Efrata ma kemai buaibun Raquelin bake bima tuya kai bai namakia bake kainun ika kainchakai bika tenejaidaya jatun bake imaitun yuikin:

“Dateama iwe, min iki peaidan, juni bake betsa min kaiainan”, aka 18 mawakatsis ikamabia ma mawai Raquelin shinankin yuikin: “En juni baken kenadan: ‘Ben-oníki’, nukun janchawenan: ‘En isin nui bakeki’, atan mawaken jakia jawen epa Jacobun jawen kena bechipaiama kena betsa wakin: ‘Benjamínki’, nukun janchawen: ‘Duapa bakeki’ ”, jatu wa

19-20 jaskatan Raquel mawa Efrata bai kexa maiwatan jawen tsumabubetan Jacobun mishki keyatapa jawen unanti wakin jawen mai mamaki nichinibukiaki. Na jabia eskatian Efrata mae jawen kena bena Belén wanibu chaima anu na unanti uindiatidubuki.

21 Janua Jacob jawen kena bena Israel jawen ain jaska wabaini ana chipekekaini kakin janu manaundixun uinbaunti jawen kena Éder dainbaini kaxun jatun tadi jiwe jatu puntematan 22 janu jiweyuaya jawen bake iyua Rubén kaxun jawen epan esclava ain Bilhá ati wakin june chutaken Israel banabimabu ninkatan jaki sinatajaidanikiaki.

Jacobdan, 12 juni bakeya inikiaki. 23 Jawen ain Lían juni bakebudan, jawen tue benadan, Rubén inun, Simeón inun, Leví inun, Judá inun, Isacar inun, Zabulón jati binikiaki. 24 Jamen jawen ain betsa Raquelin juni bake dabedan, José inun Benjamín inikiaki. 25 Raquelin esclava Bilhán juni bake dabedan, Dan inun Neftalí inikiaki. 26 Janua betsa Lían esclava Zilpá anua juni bake dabedan, Gad inun Aser inikiaki. Jacob Padán-aram anu kani jiwexun dasibi jatu bawadan, jadia kainibukiaki.

27 Mamré jawen kena betsa dabe Arbá inun Hebrónan, janu Abraham inun Isaac jiwea mapupaunibu anu Jacob jawen epa Isaacki ana nukutushinikiaki. 28-29 Janua Isaac 180 badiya mestebujaida mawaken jawen yushin jawen xenipabuki dasishinken jawen bake dabe Esaú inun Jacobun jawen yuda mai wanibukiaki.