—Ja chipash en ainwankatsis ikai jawen epa ea yukaxuntanwen— aka

5 janu jawen puibu jayama chai buxun jatun inabu pimai buabun Siquemnen jawen ainbu bake chutaxu yuiabu jawen juni bakebu bediabumaken Jacob ja mesti ja ikatsi ikama teneyunikiaki, jawa yuiamadan. 6-7 Janua jawen puibu bexun Dinakidi ninkatan shinankin:

—Nukun pui Siquemnen chutakin nukun ibubube nuku ichakawashinakiaki. Tsua jaskatimajaidaki— itan jaskawen taea juinti nishma jaki sinatajaidaibun jabe janchanun ika Hamor jawen bake Siquembe Jacob anu kaxun 8-10 jatu yuikin:

—En bake min bakewen kemukin bechipaijaidaikiki. Jau ainwanun en mia yukaxuniyuaii, eskatian nun enanamenunbunan, yuda bestichai keskaidan. Eskaidan, nukun ainbu bakebu bixankanwen, matunadi nun bidiakubainunbunan. Nukube man jiweaya nukun mai pakea matunadi idiaxanikiki. Nenu jiwekanwen, janu jiwea dayakin mabu ichawakin ana mae ewawakubainxankanwen— jatu wa 11-12 januxun jawen bake Siquemnendi jatu yuikin:

—Matu daewakin jawada man ea yuka en matu inanxanaii. Inankuin jamapai shadabu man ea yuka en matu inantiduki. Jaskawen taexun matun bake chipash ea inankanwen, jau ea benewanunan— jatu wa

13-17 jatun beyawen taexun jatun pui nawa inantiduma shinankin jatun pui ichakawashinawen taexun Jacobun juni bakebun jatu padankin Siquem inun jawen epa yuikin:

—Man jaskabu nukun pui nun matu inantidumajaidaki, man nukun beya keskamadan, matun jina kubichi mextekeumadan. Nun jaska matu inain nun dakekatsi ikamaki. Jaskawen taexun nun matu yunuamaki. Jakia jaskakatsidan, ja dukun nuku keskai juni tibi matun jina kubichi man mextekeaya nukun puibu matu inantan matunadi nun bitiduki. Jabias yudabu xukua keskai nun matube jiwetiduki. Jakia man nukun jancha ninkama matun jina kubichi mexteamaken nukun pui matu mebinbaini nun kainkainxanaii— akabu 18 jatun jancha Hamor inun jawen bake Siquemnen ninkatan:

—Jaskadan, peki— ikaibun 19-20 Jacobun ainbu bake bechipaijaidai mexteabu isinki dateama jawen jina kubichi Siquemnen jatu bimatan janua jawen epabe ichamisbu jemaintin anu Siquem kaxun xanen ibu keskakin jawenabu juni dasibi kena ichaibu jatu yuikin:

21-23 —Ja junibudan, nukuki sinatabumaki. Jaskawen taexun nukun mai pakea anu jatube jiwenankanwen, jabube biakanain nun dasikubainunbunan. Uian, jatun jancha ninkanankanwen, nun jaska jatu chibanyan nukube jiwexankanikikidan. Nukun mai pakea ewapawen taea nuku inun jatube nenu nun jiwetidubuki, jatun inabuya jatubetan pimaidan, nukun ainbu bakebube nun jatube biananankubainunbunan. Jamen nukun jina kubichi nun mexteamaken yudabu bestichai keskai nukuki dasitan nukube jiwekatsi ikabumakiaki. Jakia nun jabu keskai juni tibitun nukun jina kubichi nun mexteaya jawenabui yuda xuku bestichai keskai nukube jiwexankanikiaki. Nun jaskaya jatun inabu inun jatun mabu nukuna ixanimenkain. Jatun jancha ninkanankanwen, nun jaska jatu chibanyan nukube jiwexankanikikidan— jatu wa 24 Hamor inun Siquemnen jancha jati badiyabu dasibi jabu detenamei butidubu keskabun jatu ninkatan jabun kemakin:

—Jaskakenan, peka— ikaibu januxun jabun jina kubichi mextebaunkin jatu keyushinabu 25 jatu jaska washinabu xaba dabe inun besti kaya juni dasibi isin tenejaidaibun Jacobun bake dabe Simeón inun Leví Dinan pui kayabibun nupe chaipaya ka ja maewan anu jikixun jiwe tibi june jikikunkaunkin juni dasibi jatu dete keyunibukiaki. 26 Hamor inun jawen bake Siquem detediatan jatun jiwe anua jatun pui Dina mebikinanbainkin iyuabu kaya 27 janua jatun pui Dina Siquemnen ichakawashinawen taea Jacobun juni bake betsabu ja jatun betsan jatu tenankanxu anu jabudi buxun jiwe tibi anua jatun mabu bianbaunkin 28 jiwe dapikea inun bai anua ina shadabu bamakin jatu ichawatan 29 jatun mabu dasibi biantan jatu tsuma wabainkin jatun bakebu inun jatun ainbuaibu dasibi jatu ichawabainkin ja maewan dasibi anua jatu iyukin jatu yumetsubainibukiaki.

30 Jawen bakebun jatu jaska waxuwen taea jatuki sinatakin Jacobun jawen bake Simeón inun Leví jatu ja akin yuikin:

—Ea chakabuwakin nawa betsa betsapa man ea jatu mesewamaxuki, Canaán nawabu inun Ferezeo nawabudan. Nukudan, nun eskadabeski. Jakia jabudan, ichapajaidabuki. Jabu dasitan nuku dete keyukin nuku yamawaxankanikiki, ea inun enabu nuku texe jeneamadan— jatu wa

31 jawen bakebun ninkatan jatun ibu yuikin:

—Jaska wakin nukun pui dasibituna jininipa wakin beya wakin nuku bexpa bechitidubumaki— anibukiaki.