Jacob inun Esaú daenamenibukiaki, na janchadan
33
Janua Jacob kai xadakunkaini kakin jawen betsa 400 junibube chai juai Jacobun bechitan januxun dabe inun besti jawenabus xuku wakin jawen ain Lía jawen bakebuya inun, jawen ain betsa Raquel jawen bakeya inun, jawen esclava ain dabe jatun bakebuya jatu paxkatan 2 jawen esclava ain dabe jatun bakebuya tadi xuku watan bebun jatu mapuntan januxun Líadi jawen bakebuya ja kachu tadi mapundiatan Raquel jawen jenekin jawen bake Joséya chipu tadi nichintan 3 jatu jaska watan jawaida Jacob jatu binubaini bebunkidi kai jawen betsaki nukui kakin daewai jawa buama kai uinmai jawen beyawen taea main beti iki 7ki beukunkaini jawen betsa anu kaya 4 jaskakunkainaya unudiadi ana jaki sinatamadi uinmadiai kushidiakidan Esaú Jacobki nukutan ikukunain teikukutan tantsu aka benimai jabia dabe kaxanibukiaki. 5 Jaskai menetan Esaú bewenikitan jatu uinbaunkin ainbu jawen bakebuya bechikin Jacob yukakin:—¿Na mibe beaibudan, min tsuabumen?— aka
—Enabuki. Diosun ea jatu inankubainshinaki, min tsuma en eadan— akaya 6 janua jawen esclava ain dabe jatun bakebube bua main danti itan beti ikaibun 7 janua Lía jawen bakebube kadiai main danti itan beti idiaibun janua chipu jawen jenei José jawen ewa Raquelbe ka main danti itan beti idia jaska maniabun 8 Esaún ana Jacob yukakin:
—Na min inabu inun min tsumabu dasibibu mia bebun en uinkubidani en miki nukuaidan, ¿min jawen jawayuai?— aka
—Nun ana sinatadabeyamanun mia daewakin en inabu dabukun en mia bexuaiin, nun ana chakabui jiweyamaxanunan— aka
9 —En betsa kayabituun, jaskamaki. Ichapa en ma jayadiki. Jawada min jaya min beaidan, minaki. Ea paxkaxun inanyamawe— aka
10-11 —Jaskamaki. Min ea bechipaiaiwen taexun na inankuin en mia bexunxu biwe. Min ewen benimai en mia uinxuki, jaska Dios en uiain keskadan. Diosun ea duawamiswen taea ichapa en jayaki. Jaskawen taexun ea dananma en inankuin biwe— akin jawenchains yunu yunu aka atimas shinan betsa watan bitan 12 januxun Esaún yuikin:
—Nenua kadinuwe. En bebuai chipu ea ichun kawe— aka
13-14 —En betsaan, min unaiin. En bake mishtin kushisma inun en inabu yuxanendi jawen bake chuchu amaibuwen en nuiaii. Xaba bestichai jikinun ika nun jawaida kushikainaya en inabu ea mawaxuntidubuki. Mia dukun bebudiwe, eadan, en inabu kai uinkubaini inun en bake mishtin buaibu unanxubida en jatu iyuaidan. Seír anu en miki ana nukui kaidan, bebudiwe— aka
15 —Peki. ¿En junibu dabukun mia bashixunpa, jau mia medabewakubainunbunan?— aka
—Min ea medabewatidubia ewen nuiyamawe, emebi en kaidan— aka 16 jaska wa jawen 400 junibube Seírkidi Esaú ana chintunkidanshinken
17 janua jawen shinan betsa watan ana jadi jiweakidi kama texkikaini Jene Jordán pukebaini Sucot anu Jacob jawenabube kaxun jiwe watan badi kaya janu inabu bichiti jiwe ichapa jatu wama ji mebi mexketantankin dakenxunbaunibukiaki. Jaskawen taexun ja mae kenakin: “Sucotki”, nukun janchawen kenadan: “Ji mebi keneki”, amisbukiaki.
18 Janua Jacob Padán-aram anua jui jawa chakabuma pe Canaán mai pakea anu Siquem mae dapi jawenabube jiwetushinikiaki. 19 Janua mae ibu wanun ikin Siquemnen epa Hamorin enabu anua 100 pei jexe kadujaidawen taexun ja mae ibu wakin pakatan janu jatun tadi jiwe jatu puntemabauna janu maniabun 20 januxun mishki chi tapu wakin mishki ichawakin maspu watan januxun Dios kenwanti chi tapu waxun kenakin: “El-elohé-israelki”, nukun janchawen kenakinan: “Diosdan, Israelin mekenika Dioski”, anikiaki.