3 Januxun mae Seír anu Edom mai pakea anu jawen betsa Esaúki ma juaikidi jau kaka buxuntanunbun Jacobun jawen tsumabu eskadabe yunukin 4-5 jau eska yuixuntanunbun Jacobun jatu yunukin:

—En betsa Esaú eska yuitankanwen: “Min tsuma Jacobun mia yuikin: ‘Nukun kukabe en jiwetani atimas en ana miki nukuyuaii. Eadan, en eska jaya en juaii. Ninkawe. Ina awa inun, asno inun, chaxuwan inun, juni inun ainbu dayadu esclavo midima en jayaki. Min ekidi pe shinanun’, iwanan, ‘Min en xanen ibuki, akin mia yuikin bebunkidi mianu en jancha en mia bumaii’ ”, akin en yunuai jabiaskadi en jancha en betsa Esaú ea yuixuntankanwen— jatu wa 6 buxun Esaú yuitan ana chintunbidan Jacob yuikin:

—Min betsa Esaúki nukuxun nun yuia nuku ninkatan 400 junibuya miki nukui ja kayabi juikiaki— akabu 7 ninkatan jawen betsa padaniwen taea shinain datejaidakin Jacobun jawenabu inun jawen inabu paxkakin jawenabu betsa inun jawen chaxuwan inun, jawen ina awa inun, jawen camello jati paxkakin xuku dabe watan 8 shinankin: “Ja dukun mani betsaki dukun Esaú nukutushitan jatu deteaya uintan mani betsa paxatishadaki”, ika 9-12 janua bika tenei Diosbe janchakin: “Jehová Diosuun, min en juchi Abrahamnen Dios mekenika min ikunkainiki. Min en epa Isaacun Dios mekenika min idiakunkainaii. Jaskawen taexun ea yuikin: ‘Min mae anu ana kawe. Minabu anu ana kawe. Min jadi ka jadixun en mia duawaxanaii’, akin min ea yubaimaki. Chanima min ea duawaii. Nenua kaidan, en mestenti bestiya en kaniki, na Jene Jordán pukeidan. Jakia na eskatian yuda mani dabeya Jene Jordán en ana pukei kaii. En jaska kainaya en betsa Esaú eki sinatai ea mekewe. Juxun ainbu bakeya dasibi tenainkiki, ika en jaki dateaii. Min ea yuikin: ‘En mia duawakin min bababu en pa waxanaii, mashiti tsuan tanatiduma wakinan’, akin min ea yubayamaki. Jaskawen taexun en betsa Esaú anuxun mekekin ea ichakawamayamawe”, atan 13 janu uxashini bestenkauan Esaú jawen daewakin ja inankuinkatsi jawen inabu katukin 14 200 chaxuwan yuxan inun, 20 chaxuwan bene inun, 200 cabra yuxan inun, 20 cabra bene inun, 15 30 camello yuxan bakeya inun, 40 ina awa yuxan inun, 10 ina awa bene inun, 20 asno yuxan inun, 10 asno bene katuxun 16 ina shadabuya jawen tsumabu tibi mekemakin jatu paxka akeaketan jatu yuikin:

—Matunan, bebunkidi paxku pukekanwen, ina xukuabu tibiya benanta bukubainidan— iwanan, 17 bebunkidi inabuya jawen tsumabu yunukin:

—En betsa Esaú matuki nukuxun matu yukakin: “¿Matun xanen ibu tsuamen? ¿Man jani kai? ¿Na inabudan, tsuanamen?” ikayadan, 18 Esaú yuikinan: “Eska waxankanwen. Min tsuma Jacobunaki. Min jawen xanen ibu Esaúdan, ja bexuinkiaki. Uian. Nuku ichun Jacobdi chipu ma judiaikiki”, akin yuixankanwen— jatu wa 19 jawen tsumabu inabu tibiya ana ja kachu jabias jancha jatu yuitan januxun jawen jenekin jatu yuikin:

—Esaú matuki nukuaya jabu dukun en jatu jancha waxu keska jabiadidi yuixankanwen. 20 Jancha menekin yuikin: “Uian. Nuku ichun min tsuma Jacob chipu ma juikiki”, akin jaska yuidiaxankanwen— iwanan, shinankin —Inankuinti ea bebunkidi yunukin en betsa en daewaii. Chipu jawen besu en uian ea dananmamenkain— ikin 21 jawen tsumabu inankuinti jabu dukun bebunkidi yunua paxku pukei buaibun janua ja kayuama meshu medan bai puchinin niti ika uxa ishin

22-23 yamenapun bestenxun jawen ain dabe inun, jawen esclava ain dabedi inun, jawen 11 bakebu jatu bestenwanxun paxku jawen kena Jaboc jatu pukemaxun ja inun, jatun mabuya jawen tsumabu inabu dasibidiya pukematan 24-25 Jacob besti niti iken juni betsa juxun maemakatsi ikin meshu medan jabe tsumanametan tin anun ixun ashinkin penaya juni betsan Jacob maematiduma juni betsan kishtinkin Jacob kishtux atan 26 yuikin:

—Ma penaikiki. Ea jenewe— aka Jacobun yuikin

—Min ea pepawama en mia jeneamaki. Min kushipawen ea pepawawe— aka

27 —¿Jadakidi min kenamen?— aka

—En Jacobki— aka

28 —Dios inun junibu binunkatsi ikunkainkin min ma jatu maemaki. Jaskawen taexun jabun mia ana Jacobwen kenabuma ixankanikiki. Jakia mia kenakin: “Israelki”, akin mia kenaxankanikiki— aka Israel nukun janchadan, “Diosbe min ma binunameaki”, aka 29 januxun Jacobun yukakin:

—Miadan, ¿jadakidi min kenamen? Ea yuiwe— aka

—¿Jaskai en kena min yuka ikaii?— iwanan, jawen kena yuiama januxun Jacob jawen kushipawen pepawa bestitan kaya 30 Jacobun shinankin:

—Ja junidan, Diosdaka. Diosbe en beisinanbiaxu en mawama ixuki. Jaskawen taexun na nenua en jabe achinameshinai: “Penuelki”, akin en kena bena waii, nukun janchawen yuiadan, “Diosbe en beisinaxuki”— ikadan. 31 Janua penaya badi juaya ja kishtux akawen taea tidi ikaini Jacobundi paxku jawen kena bena Penuel pukebaini kai 32 janua Jacob Diosun kishtux aniwen taexun natian Israelin enabun yuinaka betsa betsapa jawen kishi punu chichia pisbumakiaki.