4 Jacobun jawen ain dabe jau benunbun jawen tsuma yunua jatu yuixuntana janua jatun jiwe anua Raquel inun Lía janu chaxuwan mekei dayai anu bui Jacobki nukuabu 5-13 jatu yuikin:

—Matun epan ea pewama en uinkubainaii. Ja dukun eki benimaniki. Natian ikis eki sinatai en uiaiin. Jakia en epan mekenika Diosun ea medabewakubainikiki. Matun bedubi dayaxunchakayamakin matun epa en duawakubainmiski. Jakia matun epan ea ichakawakin ea pakakin bestikima maewa akeakekin ea padankatsi ikaya Diosun nemamiski. Labánen ea yuikin: “Chaxuwan bake keneya minaki”, ea wabianiken yuxan dasibi keneya taxnikunainaibu janua shinan betsa watan Labánen ana ea yuikin: “Chaxuwan bake shiwaya minaki”, ea wadiaya yuxan dasibi shiwaya taxnidiakubainikiki. Jaska wakin Diosun matun epan inabu ea mebinmakin ea inankubainikiki. Daka en uxa namaya chaxuwan chutanameaibu en uianyan chaxuwan bene shiwaya inun keneya inun meshupa bestibun yuxan chutaibun Diosun nai tsuman ea yuikin: “Jacobuun”, ea aka: “En nenuki”, en wa: “Uian, dasibi Labánen mia ichakawai en uinmiski. Jaskawen taexun bene shiwaya inun keneya inun meshupa bestibu en bake bimakubainaii. Betel anuxun jaska Diosun en mia yuini en eaki. Jabianuxundi mishki unanti wakin benitan xeniwen daxu atan janua min ebe yubakaniki. Jaskawen taea benitan na mae anua paxadiwe. Jadia min kaini anu inun kadiwe”, ea wakin jaska Diosun ea yuishinaki— jatu wa 14-16 ninkatan jawen ain Raquel inun Lían shinankin yuikin:

—Nukun epan jiwe anu nun ana jawawen nuitidumaki. Chaxuwan inan keska wakin nuku nawa keska wakin nukun epan nuku mia inani inun janua jawen chaxuwan mia yununi min biankubaina jawena ma keyudiaikiki. Jaskawen taexun ina tibi inun mabu dasibi Diosun nukun epa mebinxun mia inankubainai nukuna inun nukun bakebunaki. Chanimaki. Jaskawen taexun jamapai shadabu Diosun mia yuishina ixunwen— akabu

17-19 jaskashinxun Jacob ana Canaán anu chintunkatsi jawen jamapai pewanun ikaya Labánen jawen chaxuwan dani mextei kaken Raquelin jawen epan kenwanti mankan dami yumetsukaini janua Padán-aram anua Jacobun jawen inabu dasibi bini inun, jawen tsumabu inun, jawen mabu ichawatan jawen ain dabe inun jawen bakebuya camello kamaki jatu katsaunbainkin Canaánkidi jawen epa Isaac jiwea anu jatu dasibi iyui 20-21 kakin jawa jatu banabimama paxai Arameo nawa Labán Jacob jaki chaniama padanbainkin jawenabu dasibi jatun mabuya iyui jene Éufrates ma pukebaina Galaad Matikidi Jacob besusi paxai junekainikiaki.

22 Janua Jacob paxai jaska kainshina ma 3 xaba ma kaya Labán yuiabu ninkatan 23-24 jawenabubetan Labánen Jacob chibankin 6 xaba chibankubaini jaki nukudiama uxa namaya Diosun Labán yuikin:

—Uindawe. Mimebi Jacob kunyan akin jawa chakabu yuiyamaxanwen— aka 25 janua bestenkaini kai Galaad Matikidi kaya ja matikin Jacobun jatun tadi jiwe nichinkin punteshina dakaken Labán jawenabuya kai jaki nukutan jatun tadi jiwedi mati anu jabundi nichinkin puntediatan 26-30 Jacob anu kaxun Labán jaki sinatakin yuikin:

—¿Jaskai min jaskakidanshinamen? Ea padankin en ainbu bake dabe min ea iwenshinaki, detenametan jatu achibidanai keska wakinan. Ea jawa yuiama ea padantan june min paxashinaki. ¿Jaskada shinain min jushianmen? Bebunkidi jukin min ea yuia mimawati arpa inun tun tun atiwen nawakin benimakin en mia nichinpanan min june paxai jushianki. Mia nichinkin en bake dabe inun en bababu benimakin jatu tantsu apanan min ea jatu junenbidanshinaki. ¿Jaskada min unainsmapajaidamen? En kushipawen en mia chakabuwapanan min epan mekenika Diosun ea yuikin: “Uindawe. Mimebi Jacob kunyan akin ja akin jawa yuiyamaxanwen”, ea wa en ninkabidanshinaki. Min epan mae anu kabiai jui peama ¿jaskakin en mankan dami xunska min ea yumetsukidanshinamen?— aka 31 Jacobun kemakin yuikin:

—Datei jawa shinanma min kushipawen min ainbu bakebu min ea mebintidu shinain miki chaniama en jushianki. Jaska min ea watiduken june en paxakidanshinaki— iwanan, 32 Raquelin jawen epan kenwanti mankan dami yumetsubiakidanshinken Jacobun jawa unanma ana yuikin:

—Jadatutunda min mankan dami beshian min bechiaya ja enabu jau mawanunwen. Enabu anua en mabu dasibi uin keyuwe. Janiada min mabu bechitan butanwen— aka 33 ja dukun Jacobun dani tadi jiwe anu jikitan bena keyutan janua Lían dani tadi jiwe anudi jikitan bena keyudiatan janua jawen dayadu esclava ain dabetun dani tadi jiwe anudi jikitan benakin keyudiatan jawen mankan dami jania bechiama jamen bena keyutan atimas Raquelin dani tadi jiwe anudi jikidiatan 34 mankan dami beanshina camello kabekanti medan adua Raquelin adui jaki tsauaya jawen epa Labánen jawen mabu dasibidi uinkin mebaunkin ana januadi bechiamaken 35 Raquelin jawen epa bepadankin yuikin:

—Epaan, eadan, eki sinatayamawe, jimi iki tsaua en jaska benitimakidan— aka jaska wa benabaunkin Labánen jawen kenwanti dami jabu tibi anua bechiamaken 36-37 janua Jacob sinatakin Labán chitekin yuikin:

—¿Jawai e iskidan ea chibanshinxun en mabu dasibi itimaska wakin mebaunkin jawa mabu mina min ma bechiamen? Minabu inun enabun bebun manchinwen. ¿Jadatutun nun pewaimenkain? ¿Min miamenkain? ¿En eamenkainan? Nukunabun jau nuku yuinunbunan. 38 Ma 20 año en mia dayaxunaya min inabu yuxan tuyatan kaunmama ikunkainimaki. Ja inun, min chaxuwan bene enawakin en piama ikunkainimaki. 39 Jawa inawan mina mia bian en mia bexuanma ipauniki, en mia meke pewaxunadan. Jakia ena en mia nichinxunpauniki. 40 Xabatian inun meshu medan yumetsubainabun ea pakamakin min ea yunui dakaimaki. Badidi badin ea kuamiski. Meshu medan matsin ea aka ikinin iki en uxaismaki, matsi teneidan. 41 Jaska tenekubaini mia dayaxuni 20 año min mae anu en jiweshinaki. Janua 14 año min ainbu bake dabe binun ika jamen ea en dayama ikunkainiki. Janua ana 6 año min inabu bi en mia dayaxunkunkainshinaki. En mia dayaxunaya betsa tibi min ea maewaxunkubainmiski, ea jawen pakakinan. 42 En epa Isaac inun en juchi Abraham jatun mekenika Dios en jayamaken mais jawauma min ea nichinkeanshinaki. Jakia min ea chakabuwai Diosun uinxun en mia pe dayaxunai uindiakubainshinxun jaskawen taexun ekidi janchakin Dios ewen nuikin mia nemashinaki— aka

43 jaska wa ninkatan Labánen yuikin:

—Jaskamaki. Ea ninkawe. Ja min ain dabe min iweshinadan, en bakebuki. Jawen bakebudan, en bababudiki. Ja min inabu dasibidan, enaki. Dasibi min beshianan, enaski. Jakia en ainbu bake dabe inun jawen bakebudan, en ana jawa jatu waxuntidumaki, medabewakinan. 44 Jaskawen taeadan, mia inun eadan, yubakanamenanwen. Nuku dabe uinkin jawen jau Diosun nuku unanpakexanunan— aka 45 Jacobun ninkatan jawen unantiwanun ixun mishki bixun dabekin nichintan 46 jawenabu yuikin:

—Mishki ichawakin maspu keyatapa wakanwen— jatu wa ichawakin manchinxunabu jawen padananantimawakin mishki manchianbu dapixun piaibun 47 Labánen ja mishki manchinxu kenakin: “Jegar Sahadutáki”, anikiaki. Jakia Jacobun jabias mishki manchin jatundi kena betsa wakin: “Galaadki”, adianikiaki. 48 Januxun Labánen ana yuikin:

—Na mishki nun ichawakin maspuaxudan, unanuma nun paxkakaina mia inun ea nukun unantiki— iwanan, jaskawen taexun Jacobun enabun kenakin: “Galaadki”, anibukiaki.

49 Labánen ana yuikin:

—Nun paxkakaina nun ana uinananmaken jau Jehová Diosun nuku dabe uinpakexanunwen. 50 En ainbu bakebu min ea jatu ichakawan kasmakin min jatu danankin ainbu betsa biayadan, juni betsan mia nematidumabiaken: “Nun yubakaiwen taexun min jaskaya Diosun unainkiki”, jakimayamaxanwen— aka jaskawen taexun ja mishki maspu kenakin: “Mispáki”, nukun janchawen yuiadan, “Jakixun Diosun Uinbauntiki.” 51-53 Januxun Labánen ana jancha wakubainkin:

—Uian. Na mishki maspuabu inun mishki keyatapa en nichinxudan, jabuwen nun yubakai nukun shinanmatiki. Ea inun mia namakis nia keska nun axuki. Ea miki sinatakin mia chakabuwakatsi ikin ja dabe en binuama ixanaii. Miadi eki sinatakin ea chakabuwakatsi ikin ja dabe min binuamadi idiaxanaii. Nun ma yubaka jaska jaya jadatutunda nun chakabuwakin kaneaya ea kasmai mian nun kaneayadan, min juchi Abrahamnen mekenika Dios inun en juchi Nahorin mekenika Dios jabiastun nuku betsa kupixanikiki— aka jaska wa Jacobun ninkatan jawen epa Isaacun mekenika Dioski datekin yuikin:

—Peki. Jaska nun yubakai keska ipakenanxanwen— iwanan, 54 Dios benimawakin mati anuxun jawen kenwanti piti pewakin chaxuwan bake tesenxun xui keyutan misiyabi jatu pimanun ixun jawenabus kena ichabu jatubetan pitan matikin jabiadi uxashini 55 penaya Labán bestentan jatu jenebainkatsi jawen beyawen jawen bababu inun jawen ainbu bake dabe tantsu axun jancha pepawen yuikin jatu duawatan jawen mae anu chintunbidanibukiaki.