—Eadi bakewawe, en bake biamas mawatidukidan— aka 2 jaska wa jaki sinatakin Jacobun Raquel yuikin:

—¿Min jaskada shinain ikai? En ea Diosmaki. Diosun besti mia bimatiduki. Eanan, en mia jaska waxun bimatidumaki— aka 3 Raquelin ana yuikin:

—Uian, nukun beya chibankin en dayadu esclava Bilhá mewe, jaki min ea bakewaxuna en bake ixanikikidan— atan 4 januxun Bilhá yunua Jacobun bikin nanta ainwantan Bilháki bakewa 5 Bilhán Jacob juni bake kainxuna 6 Raquelin dachukin yuikin: “Diosun ea uinkin ea unankin en shinan pewen taexun en yukai jancha ea ninkaimaxun ikis en juni bake ea inanxuki. Jaskawen taea na bake kenadan, Danki”, aka

7 januxun Raquelin dayadu esclava Bilhán ana ja kachu bake bia Jacob juni bake kainxuna 8 Raquelin ana dachukin yuikin: “En betsa maemanun ika en jabe ja imis en ma binuaiin. Jaskawen taea ja bakeishtan kenadan, Neftalíki”, jatu wanikiaki.

9 Januxun Líandi ana bake biamawen taexun unankin jawen dayadu esclava Zilpá Jacob yunudia bikin nanta ainwandiatan 10 Zilpáki bakewa bake bia Jacob juni bake kainxuna 11 Lían dachukin yuikin: “Jaska en pepajaidaidan, enaki. Jaskawen taea bakeishta jawen kenadan, Gadki”, jatu wa

12 janua Lían dayadu esclava Zilpán ana ja kachu bake bia Jacob juni bake ana kainxuna 13 Lían yuikin: “En jati bake jaya en benimaiwen taea ainbuaibu ewen benimakin ea kenwanxanaibu en benimaii. Jaskaken bakeishta jawen kenadan, Aserki”, jatu anikiaki.

14 Janu xekiwan tsekakin mexteaibutian Lían bake Rubénen bai anu kaxun xeati bimi batapa bechixun bexun jawen ewa inanken januxun Raquelin uintan Lía ea akin yuikin:

—Min baken xeati bimi batapa mia bexuanan, eskadabe ea inanwen— aka 15 inankatsi ikama jaki sinatakin Lían yuikin:

—Ja dukun en bene min ea mebiniki. ¿Ikis en baken bimi batapa ea bexuan min ea mebindiakatsis ikai?— aka Raquelin jawen bimi xeanun ixun

—Jaskakenan, na meshu medan jau mibe iki kanun Jacob en mia anu yunuaii. Jaskaken min baken bimi mia bexuan ea dabukun inandiwe— aka jaska yubaiwen taexun inanken 16 janua badi kaya jawen bai anua Jacob juaya Lía ka jaki nukuxun yuikin:

—En baken xeati bimi ea bexuan Raquel en inanxuwen taexun en mia yubayuxuki. Jaskawen taea na meshu medan ebe iyuyuwe— aka Jacobun ninkatan jawen jiwe anu meshu medan ka jabe ixun chutaken 17 Lían jaskakidi Dios ea akimakidi Diosun ninkatan jawen nuikin Lía ana ja kachu bake bima Jacobun juni bake ana kainxuna Lía ma 5 juni bake jayatan 18 yuikin:

—En dayadu esclava en bene en yunuyamawen taexun Diosun ea manakuxuki. Jaskawen taea jawen kenadan, Isacarki— akimaxun

19 jabianudi ana bake betsa Lían bima Jacob juni bake ana kainxuna 6 juni bake jayatan 20 Lían yuikin: “Diosun ea pepawakin ea duawaxuki. En ma 6 juni bake kainxunawen taea janu en bene ewen nui ebe jiwexanimenkain. Jaskawen taea ja bakeishtan kenadan, Zabulónki”, anikiaki.

21 Chipu jawen jenekin Lían ana bake bia ainbu bake kainxun kenakin: “Dinaki”, anikiaki. 22-24 Januxun Diosun Raquelkidi shinankin jawen janchawen bake bikatsi ea akai ninkamisxun jau bake binun medabewakin Raquel bake bimaima juni bake kainxun yuikin: “En bakeumawen taexun ea yuanmisbu en dake ea mainwankin Diosun en chakabu tede akin ea juni bake inanshinaki. Ana juni bake betsa Jehová Diosun ea inanxanimenkain. Jaskawen taea na en juni baken kenadan, Joséki”, anikiaki.

25-26 Janua Raquel jawen bake José kainmaken Jacobun jawen kuka Labán yuikin:

—Ea jenediwe, nichinkinan, en mae anu en epa jiwea anu en kakatsi ikaidan. En mia pe dayaxunkunkainmiswen taexun en ain dabe inun en bakebube ea yunukin ea nichindiwe. Jaskadada en mia dayaxunmis min unanjaidaii. Jaskawen taexun ea nemayamawe, en kainkainaidan— aka 27-28 ninkatan Labánen kemakin nemakin:

—Miwen taexun Jehová Diosun ea duawai en uinmiski. Min ea bechipaikin ea ana dayaxunkin jaska min ea yukai keska en mia pakakin axunxanaii— aka 29-30 Jacobun ana yuikin:

—En mia dayaxunaya min inabu ma papakeai min uiaiin. En mia anu judiamaken eskadabes min jayaniki. Ikis inabu ichapajaida min jayaki. Janua en mia dayaxunaitian Jehová Diosun mia duawamiski. Natian jaska min ea yuiaidan, ¿jatian en bakebu en tadi medibi dayaxuntidumen?— aka

31-32 —Jawa min bechipaiai en mia jawen pakaidan— aka

—Peiwen ea pakayamawe. Min cabra inun min chaxuwan ichawatan namakis nikaunkin katukin pakebaunkin keneya inun meshupa inun shiwaya ja en katua min ea yunua ena ixanai nun unantiduki. Jawen min ea pakatiduki. Min ea jaska waxuna min inabu en ana yumewakin mia ichapa waxuntiduki. 33 Chipu mia juxun en inabu uinbaunkin mina uindiakin jadatu mina en yumetsua min uintiduki. Enadan, keneya inun, shiwaya inun, meshupa en bikatsis ikaii. Jaskaken juxupa ena anu nashui ika uinkin ja en mia yumetsunshina min unanxanaii. En mia jaska waxuna en juni chakabuma min unanxanaii— aka 34 Labánen yuikin:

—Peki. Jaska min shinain nun akubainxanaii— itan 35-36 kaxun inabu keneya inun meshupa inun shiwaya paxkaxun jawen juni bakebu mekemakin xaba dabe inun besti kain jikianu Jacobun chaxuwanyan Labánen jatu nichinken januxun Jacobun Labánen inabu mekexunkin ana taewanikiaki.

37 Januxun Jacobun ji sidi ichapa mextexun dadis akin pusteya wakin juxupa inun meshupa watan 38 janua unpax chaxuwanen akaibu anu besuudi nichinkin seu wa akeakea anua unpax aki beabu juxupabusbia chutanamekin 39 ji sidi shiwaya uinkin bake bia bake meshupa inun shiwayabu ichapa taxnikubainibukiaki. 40 Chaxuwan bake meshupa inun keneya inun shiwaya Jacobun paxkakin Labánen chaxuwan juxupabu besuudi mapunkin jawena wa 41 unpax amati anua chaxuwan kushipa chutanameaya Jacobun jawaida ji sidi ichapa betsebain nichian ja chaxuwan janua uinkin ji sidi pusteya dapikea chutanamekin bake kushipa juxupa pawakubainibukiaki. Jatu jaska wa akeakekubaina juxupama taxnikubainibukiaki. 42 Januadi chaxuwan babu chutanamediaibun ji pusteya ja dapi Jacobun nichianma bake nanea chaxuwan bake juxupa babu imana taxnidiakubainibukiaki, jaskaken chaxuwan juxupa babubu Labánenadan. Janua chaxuwan keneya inun meshupa inun shiwayabu kushipabu jawen dais Jacobna inikiaki. 43 Jaskawen taea Jacob jawena ichapa jayakunkainikiaki, inabu inun, juni inun ainbu tsumabu inun, camello inun, asno midima jayaidan.