—¿Matudan, man janiamen?— jatu wa

—Harán anu nun jiweaki— akabu 5 ana jatu yukakin:

—¿Nahorin bake Labánan, man unain?— jatu wa

—Nun unaiin— akabu

6 —¿Jaskadamen? ¿Jawa isin teneamamen?— jatu wa kemakin:

—Peki. Uinwen. Janu jawen ainbu bake Raquel jawen chaxuwanbube ma nenu juikiki— akabu 7 januxun Jacobun jatu yuikin:

—Uian, badi kadiamaki. Eskatian chaxuwan bichitimaki. Ana unpax jatu amaxun ana jatu pimakin basi anu jatu bukanwen— jatu wa 8 jabundi kemakin:

—Jaska chaxuwan dasibi ichai keyudiamaken nun jaska watidumaki. Jakia dasibi jabun nun jatu mekemisbun ichatan ja mishki ewapa jawen bepua bepentan nun jatu amamiski— akabu 9 jatube janchai menediamaken ja chaxuwan uinika Raquel jawen epan chaxuwan iwei juaya 10 Jacobun uinkin jawen kuka Labánen ainbu bake Raquel inun jawen chaxuwan bechitan kaxun unpax bana kini bepenxun jawen kukan chaxuwan besti amaxuntan 11 Raquel dapi kaxun jawen beya chibankin yukakin tantsu atan benimajaidai kaxakin 12 yuikin:

—En min epan daiski. En Rebecan bakeki— aka Raquelin ninkatan kushikaini kaxun jawen epa yuia 13 Jacobkidi ninkatan: “En puin bakeki”, ika kushikidan jaki nukuxun ikuxun tantsu axun jawen jiwe anu iyua Jacobun jawenabukidi chanikin jaska jatube jiwemis jatu yui keyuaya 14 Labánen Jacob yuikin:

—Min enabu kayabiki, min nami inun min xaudan, en jimi keskadan— akima jatube dayai Jacob jiwekin jatu medabewakin chaxuwan mekei uxe bestichai nichianyan

15 januxun Labánen Jacob yuikin:

—Chanima min enabuki. Ea anua jawauma min ebe dayashinaki. Jamen min ana dayatidumaki. Ana en mia dayamakubaina, ¿jati en mia pakatidumenkain? Ea yuiwe— akaya 16 Labánen ainbu bake dabedan, ja dukun iyuatun kena Lía inun maxkun kena Raquel inikiaki. 17 Ja iyua jawen bedu besti atimapa duakabiwen taea jawenduamaken jakia jawen bake maxku besti jawen yuda jidabi jawenduajaidaken 18 Jacobun Raquel bechipaijaidakin jakidi yuikin:

—Min bake maxku Raquel min ea bimaxanun 7 año nichin en mia dayaxunaii— aka

19 kemakin:

—Peki. Mia besti min enabi kayabiki. Juni betsa en inankatsi ikamaki. En mia bimaxanaii. Ebe jiwekin ea dayaxunyuwe— aka

20 Jacobun Raquel bechipaijaidaiwen taexun ainwankatsi ikin Labán dayaxunkin: “7 año jawen ibu en dayaxunaidan, Raquel en bixanaidan, jatixuinda badimaki”, ixun Jacobun shinankubainikiaki. 21 Janua 7 año dayaxuntan Jacobun Labán yuikin:

—Mia yubatan ainbu binun ika en dayakunkainshina ma en keyuxuki. En ainan, ea bimadiwe— aka

22 januxun jawen bake beneyawakatsi ikin Labánen jabe jiweabu dasibi kenaxun piti ichapawaxun jatu pimakin nawamakin 23 meshu medan Jacob padankin jawen bake iyua Lía iwexuna Jacobun unanma jabe iki taenikiaki, ainwankinan. 24 Januxun jawen bake Lía beneyawatan jawen epan jawen dayadu esclava betsa jawen kena Zilpá Lía inanikiaki, jau medabewanun jawen dayadu wamakinan. 25 Janua penaya Jacob bestentan Lía bechitan Jacob Labánki sinatakin yuikin:

—¿Min ea jaska wa en ishiain? Raquel bikatsi en mia dayaxunshinaki. ¿Jaskakin Raquel ea inanma Lía ea inankin min ea jaska wakin padanmen?— aka 26 Labánen kemakin:

—Iyua beneyawadiama maxku dukun beneyawadan, jaska nukun beyamaki. 27 Jaskaken iyua dukun ainwanyuwe, 7 día beyawai min ma ja bestibe jiweken Raquel dikabi nun mia inandiaxanaidan. Jaska min ea yubanidan, ana 7 año min ea dayaxunxanaii, en mia inainan— aka 28 jaska wa ninkatan Jacobun Lía besti ainwan 7 día jabe jiweken jawen bake maxkudi Labánen Jacob bimadia ainwandianikiaki. 29 Januxun jawen bake Raquel beneyawatan jawen dayadu esclava ainbu betsa jawen kena Bilhá Labánen Raquel inanikiaki, jau medabewanun jawen dayadu wamakinan. 30 Jacobun Raquel bidiatan bechipaijaidakin jakia Lía mawaida bechipaiama dananbiai ana jawa yuiama Raquel bima ana 7 año nichindiai dayaxundianikiaki.

31 Jacobun jawen ain Lía dananbiakin mekubainaya Jehová Diosun uinkin Lía medabewakin bake bimakin jakia Raquel jau bake biamayunun Jacobun chutabiakubainaya bakeuma wakin nemayukubainikiaki. 32 Januxun Lían bake bia tuya juni bake kainxun yuikin: “En benen ea danan duakabia en punu nuka Jehová Diosun ea uinkiki. Jaskaken en bakewen taexun en benen ea bechipaixanikiki. Jaskawen taea en baken kenadan, Rubénki”, akima 33 janua ana ja kachu bake bia juni bake kainxun yuikin: “En benen ea dananbiaya Jehová Diosun ninkakin juni bake betsa ana ea bimaimaki. Jaskawen taea en baken kenadan, Simeónki”, akima 34 ana ja kachu bake bitan juni bake ana kainxun yuikin: “Juni bake dabe inun besti ma en bia en ma kainxunaki. Ikis en benen jawen taexun ea bechipaitiduki. Jaskawen taea en bake betsan kenadan, Levíki”, ana akima 35 jaskatan ja kachu ana bia juni bake ana kainshinxun yuikin: “Ea jaska waya Jehová Dios en ma kenwaiin. Jaskawen taea en baken kenadan, ‘Judáki’ ”, ikima Lían bake ana biyuama inikiaki.