—Na Canaán mai pakea anua ainbu biyamaxanwen. Jakia Padán-aram anu min epa betsa Betuelin enabu anu kaxun ja mae anua min ewan pui Labánen ainbu bake betsa ainwantanxanwen, jadixun Dios kushipa dasibi binuatun mia duawakin mia pa wa minabu xukua ichapajaida inunbadixankanikikidan. En epa Abraham yuini keska wakin mia inun minabu pepawakin na mai pakea janu nun jiwea anu Abraham yubani anu nenu nukunabuma anu jiwei nun mae akeakemis anu Diosun jatu ibu wamaxanikiki— axun 5 jau jaskakaintanun jawen bake Jacob mae betsa anu nichian Padán-aram anu Rebecan pui Labán Arameo nawa Betuelin juni bake anu kaxanaikidi Isaacun yununikiaki.

6 Januxun pepawakin Isaacun jau Jacobun Canaán nawa ainbu biyamanun Padán-aram anu kaxun jau ainbu betsa bitanun nichian kai Esaún Jacob jaska waibu ninkashina 7 jawen epa inun jawen ewan jancha Jacobun ninkabaini Padán-aram anu kashinken 8 Canaán nawa ainbu dabe Esaún ainwaniken jawen ibu Isaacun bechipaiamaken Esaún unainwen taea 9 Abrahamnen juni bake betsa Ismael, jawen epa betsadan, janu kaxun Ismaelin ainbu bake Mahalat Esaún ainwanikiaki, Nebaiotin puidan. Janua bitankin jawen Canaán nawa ainbu dabeki dasiwaima janus jatu jiwemapaunikiaki.

10-11 Beerseba anua kai mae Harán baiwen Jacob kai bai puchinin kaya ma badi kaken janu uxakatsi niti itan jaki tedatamekatsi mishki tunku mania betsa bitan jaki isdatamea daka 12-14 uxa namakin uianyan tapaiti chaipa mai anua naiki kepia Diosun nai tsumabu ja tapaitiwen inabainbaini inun butubidanbidanaibu anu Jehová ja dapi nixun uinmakin yuikin:

—Eadan, en Jehováki. En min juchi Abrahamnen mekenika Dios inun en min epa Isaacun mekenika Dioski. Mia yuinun en jancha ninkawe— iwanan —Na min janu dakanua mai pakea mia inun minabu en mia yunukin ibu wama minabu na mae anua papakei mai ichapa jawen mishpu kuduti tsuan tanatiduma keskai nortekidi inun, surkidi inun, badi juaikidi, inun badi kaikidi mebinanantan ibu wai jiwea akeakexankanikiki. Mia inun minabuwen taexun xukua dasibi mai jidabi anu manibaunabu en jatu pepawapakexanaii. 15 Mibe putanameama janida min kaya medabewakin en mia mekekubainxanaii. Na mai pakea anu min ana jiwexanun en mia ana nenu iwexanaii, chintunwankinan. En mia yuixu en mia axundiama jakimama en mia jeneama ipakexanaii— aka

16-17 janua Jacob uxa bestentan shinain datekin yuikin:

—Chanima na mae anu nenu Jehová Dioski. En jaska unanma ikaki. Nenu na mae anu Dios jiweken en jaki mesei dateaii.

—¡Jabaa! Nenudi nai anu Diosun jiwe janu jawen jikiti xuiki— ika

18 ana uxashini bestentan penamajaida benikauan mishki tunku jaki tedatameshinai bixun ja unanti wanun ixun ja mishki dabekin benitan Dios kenwankin xeniwen jawen beya chibankin mishki daxu anikiaki. 19 Jaskaken uatian ja mae ja dukun nawabun kenakin: “Luzki”, anibu januxun Jacobun kena bena maewakin: “Betelki, Janu Dios Jiwea Maedan”, anikiaki.

20-22 Januxun Jacobun Dios yubai janchakin eska wanikiaki:

—Janida en kaya Dios ebe kakin ea medabewakin piti inun tadi ea inankin unanuma en epa anu ea ana iweken chanima wakin Jehová en mekenika Dios xabakabi en waxanaii. Na mishki en benixudan, Diosun jiwe ixanikiki— iwanan, Dios yuikin:

—Diosuun, jawada ea inankin 10 min ea inan bitan bestichai mia inankuinkin jawen en mia kenwanpakexanaii— akin jaskai Jacob Diosbe janchanikiaki, yubakaidan.