—Epaan, ¿min miamenkain? Mia yuinun ninkawe— aka Esaún yuikin:

—Epaan, min ea kena en juxuki. ¿Jawamenkain? Ea yuiwe— aka 2-4 ana jawen epan yuikin:

—Uinwen. Ma en mestebujaidai anibujaidaki. Jatianda en matu mawaxunxanai en unanmawen taexun en jancha ninkawe. Min piaya kaxun chaxu tsakaxun bexun yuchiyabi ea bawaxunwen, jaska en bechipaimis keska piti nuwepadan. Pitan en juinti benimakin min en bake iyua jau Jehová Diosun mia duawakubainxanun en mia pepakidi jancha waidan, en mawadiamadan— iki 5 Isaac Esaúbe janchai jawen ibu Rebecan ninkaken januxun Esaún chaxu jawen ibu tsakaxuni kaya 6-10 janua Rebeca jawen bake maxku Jacob anu kaxun yuikin:

—Uian, min epa Esaúbe janchai en ninkaxuki. Min epan yuikin: “Chaxu tsakatanxun yuchiyabi ea bawaxunwen, jaska en bechipaimis keska piti nuwepa wakinan, jaska pitan en juinti benimakin Jehován nuku uianyan mia duawakin en kushipa pepa en mia yunuxanaii, en mawadiamadan”, akai en ninkaxuki. Jaskaxunwen taexun en jancha ninkawe. En mia yunuai mia dukun kaxun min ina cabra bake jadatuda dabe jawen nami babupa katutan achixun ea bexunwen, jawen nami yuchiyabi min epa en bawaxunaidan, jaska manuai keskadan, jaska min epanu min buxuan pitan benimakin mia besti jawen kushipa pepa mia yunui jau janchanunan, Jehová Diosun jau mia duawaxanunan, min epa mawadiamadan— aka 11-12 januxun Jacob datekin jawen ewa yuikin:

—Uian, en betsa Esaú dani ichapa jayaki. Eadan, en dani jayamaki. Jaskawen taexun en epan ea metiduki. Mexun: “Ea padainkiki”, ixun pepa ea inanma kupikin ea yuputiduki, pepawamadan— aka 13 Rebecan ana yuikin:

—Mia chakabuwakatsi ikaya miwen taexun: “Ea kupiwe”, akin en mia yuixunxanaii. Jaska en mia yunuai bitanwen. Nukun ina cabra bake babupa dabe ea bixuntanwen— aka 14 kaxun dabe achixun bexuan jaska jawen epan bechipaimis keska jawen ewan cabra nami chaxu nami nuwe keska wakin yuchiyabi bawaxuntan 15 januxun jawen tadi jiwe medanu jikikain jaya chai katanshina jawen bake iyua Esaún tadi bixun jawen bake maxku Jacob sawemaxun 16 cabra bake bichi Jacobun punyanki meyabutan texuanudi bichi betsadi teyabua 17 nami yuchiyabi inun misi bawaxuna inan 18 Jacob jawen epanu kaxun yuikin:

—Epaan, en ma juaii— aka jawen epan yuikin:

—En nenu dakaki. Judiwe. ¿Min jadatu en bakemen?— aka 19 Jacobun padankin yuikin:

—En Esaúki, min bake iyuadan. Min ea yunua kaxun ma en tsakatanxuki. Benitan tsauxun chaxu nami en mia bawaxunxu piwe. Jaskawen taexun min kushipa pepa ea yunui ekidi janchadiwe— aka

20 —¿Jaskatan min jawaida chaxu tsakaxumen?— aka ana padankin yuikin:

—Min jaibu medabenan Jehová Diosun chaxuki ea nukuma en tsakaxuki— aka 21 januxun jawen ibuan yuikin:

—¿Jaska min en bake Esaúmenkain? Mia menun nedi juwe— aka 22 Jacob ja dapi ka mekin yuikin:

—Min jui Jacobki. Jakia min meken min Esaúki— aka 23 jawen meken dani ichapa Esaú keskawen taexun Isaacun Jacob unanma jawen pepa yaushiama yunukatsi 24 Isaacun ana yukakin:

—¿Chanima min en bake Esaúmen?— aka

—Jabia min bake en eaki— aka 25 atimas jawen epan yuikin:

—Peki. Chaxu nami min ea bawaxun bexuan ea inanwen, ja dukun pitan en kushipa pepa en mia yunuaidan— aka Jacobun nami bawaxuna inan pitan uva vinodi inan 26 pikin akin keyutan ana yuikin:

—Epaan, ana ea dapi juxun ea tantsu awe— aka 27-29 Jacob jawen epa dapi kaxun tantsu akai Isaacun Esaún tadi itsa xetetan:

“Esaúki”, ixun jawen kushipa pepa yunui jakidi janchai:

30-31 Isaacun Jacob jawen kushipawen pepawakin meneaya Jacob jawen epa anua dama taxnikainaya chipu unanma ni anua jui jawen betsa Esaú jikitan nami jawen epa tsakatanxun yuchiyabi bawadiabidan bexunxun yuikin:

—Epaan, en ma juaii. Benitan tsauxun chaxu nami en mia yuchiyabi bawaxunxu piwe, jaskawen taexun min kushipa pepa ea inainan— aka 32 jawa unanma yukakin:

—¿Min tsuamen?— aka

—En Esaúki, min bake iyuadan— aka 33 shinain datei bene bene ikin yuikin:

—Jaska min judiama juni betsan nami yuchiyabi bawaxun ea bexuan pitan en kushipa pepa inankin en yunuxuki. ¿Tsua en axumen? Tsuada en kushipawen en pepawaxu Diosun pepawadiaxanikiki, medibi wakinan. Jaska en jakidi en janchaxu mebinkin en betsa watidumaki— aka 34 jawen epan jancha jaska yuia ninkatan Esaú nuijaidai kaxa chakayamakin yuikin:

—Epaan, eadi min kushipa pepa ea yunudiawe— aka 35 januxun jawen epan ana yuikin:

—Min betsa daki juxun ea padantan min kushipa pepawati june jatun mia bianxuki— aka

36 —En betsa jaskawen taea pekidi kenanibuki, Jacobdan, Mebinanan. En min bake iyuabiaken ea dukun en xanen ibuxanai ea mebiniki. Na jabiatian min ea kushipa pepawatidu ana ea mebinxuki, dabeki ea bextekinan. ¿Ea kushipa pepawati betsa min ana jayamamen?— aka 37 Isaacun Esaú ana kemakin:

—Uian, min betsa Jacob min xanen ibu en waxuki. Mikidi inun minabu jawen tsumabu ixanunbun en jaska yunudiaxuki. Yunu ichapa inun uva vino ichapa jayai jau pe jiwexanun en kushipa pepa en ma yunukin keyuxuki. Jadatu betsawen en mia ana pepawatidu jayamaki— aka 38 jaska wa ninkamas bika wakin ana yuikin:

—Epaan, ¿kushipa pepawati bestichai min ana jayamenkain? Eadi pepawawe— atan ana kaxa chakayamatan neseaya 39 ana yuikin:

41 Jawen ibuan Jacob pepawakin jawen kushipa pepa yunushinawen taexun Esaún jawen betsa Jacob danankin yuikin: “En epa ma mawa kemaikiki. Samama mawaya jawen nui kaxai nesetan en betsa en tenanti shinaiin”, ikai 42 june janchai tsuanda ninkaxun Esaún jancha jawen ibu Rebeca yuiabu ninkaxun jawen bake maxku Jacob kenaxun yuikin:

—Mikidi Esaún shinankin miki sinatai jamebi daenun ika miki yubakaikiaki, jawen kushipa inun jawen pepa min bianshina manakukinan. 43-45 Jaskawen taexun mia yuinun en jancha ninkawe. Harán anu en pui Labánen jiwe anu paxatanwen. Min betsa miki sinatai maindiamaken jadixun manayutanwen. Miki sinatai maiin min jaska waima jakimaya juni betsa en yunua ea mia iwexunxanikiki. Na jabianua mia inun min betsabe detenamei man mawaya janu en bake dabe en matu benukatsi ikamaki— atan 46 janua Rebeca jawen bene Isaac anu kaxun yuikin:

—Hitita nawa ainbu en bechipaiamaki, Esaún ain dabe keskadan. Jabiasdiai Jacobun Hitita nawa ainbu nenu Canaán anu jiwexun ainyain en bechipaiamawen taea en juinti nishmai sinai jaska en jiwetidumaki— aka