—Egipto mai pakea anu kayamaxanwen. Janida en mia yunuai anu besti min katiduki. Natian na jabia mae anu besti jiweyuwe. Jaskai janu Filisteo nawabu dapi min jiweken mia mekekin en mia duawayuaii. Mia inun minabu paibu na mai pakea jidabi en matu ibu wamaxanaii. Min epa Abraham en yubani keska wakin jabiaskadi en mia yubaii. En yunua Abrahamnen en jancha dasibi chibankin akubainiwen taexun minabu en pajaidawaxanaii, bishiti tsuan tanatiduma keska wakinan. Jaska bestima minabuwendi na mai jidabi anu yudabu xukua tibi dasibibu en jatu duawapakexanaii— aka

6 Guerar maewan anu Isaac jatube jiweyui jikishinken 7 junibun jawen ainkidi yukakin:

—¿Tsuamen, ja ainbudan?— akubainabu Isaacun shinankin: “Rebeca jawenduajaidaki.” Ean jatu yuikin: “Jadan, en ainki. En jatu wadan, jawen taexun ea tenanxun Rebeca bitidubuki”, iki datekin jatu padanun ixun jatu yuikin: “En puiki”, jatu waimaken 8 jatu jaska waima uxa ichapa kaya jawen ain june chutakubaini ana menu ixun ikuaya janua Filisteo nawa xanen ibu Abimélec dintu medan junexun uinti xui bestichai medan uianyan Isaac inun Rebeca menameai bechixun 9 jau iwexununbun jawenabu yunua Isaac jua jaki sinatakin yuikin:

—Jaskakenan, Rebecadan, min ainki. Min jabe menameai dama en matu uinxuki. ¿Jawai: “En puiki”, min ikimamen, nuku yuidan?— aka Isaacun kemakin:

—“En ainki”, akin en matu yuia: “Tsuanda Rebeca bikatsi man ea tenantiduki”, ixun shinankin: “En puiki”, akin en matu yuimaki, jawen taexun man ea tenantidu matu padainan— aka 10 ana Abimélecin yuikin:

—¿Jaskakin min nuku jaska waimamen? Nukun juni betsan Rebeca ainwantan chutaya Diosun nuku uianyan min nuku chakabuwakeanshinaki— atan 11 Abimélecin jawenabu dasibi jatu unanmakin yuikin: —Tsuanda na juni Isaac inun jawen ain bikawakin chakabuwaya en jatu tenanmaxanaii, kupixunkinan— jatu anikiaki.

12-14 Janua Isaac jabianudi jiweyua jatube dayakin jawen tsumabu yunua bai ewapa waxun xekiwan banaima ichapajaida tsekaibun Jehová Diosun duawakubaina Isaac xanen ibukin jawen jawada ana bikubaini jawen chaxuwan ichapajaida jayai inun, jawen ina awa ichapajaidadi jayai inun, jawen dayadu esclavo ichapajaidadi jayadiai jatube jiwekin Isaacun jati ichawai xanen ibujaidakunkainaya janua Filisteo nawabun uin kemui yuinamei jaki sinatai:

—Yuu, ja junidan, ¿jaskai nuku anu juima xanen ibujaidakin nuku binuimenkain, mabu ichapa jayaidan?— ikaibun 15 jabianudi Abraham jiweatian jawen chaxuwan amanun, iwanan, jawen tsumabun unpax wamakin banakin kini ichapa pukinxunibu Abraham mawayamaken Filisteo nawabun jawen unpax kini dasibi maiwen bepukin buanibuken 16 janua ana jaska watima Abimélecin Isaac yuikin:

—Nenu juima kushipakunkainkin min nuku binuaiin. Jaskaken nukun mai pakeanua kadiwe, nuku jenebainidan— aka

17 janua Isaac jawenabu inun jawen tsumabube kainkaini ka Guerar anu manankidi chaima napanpa anu maetan januxun jatun tadi jiwe nichintan janu jiweyuaibun 18 jabianudi jawen epan tsumabun unpax jatu pukinmani bepunibu anu Isaacun epan tsumabu anixun unankin ana pesakin taewaxunibukiaki. Ja Abrahamnen kenaniwen taexun jabiadidi Isaacun ana kenanikiaki, unpax kini tibidan. 19 Isaacun tsumabun napaku anu unpax kini bena wakin nawasanabu jamebi jene jabai matamisken 20 ja napanpanan unpax kini benawaimabu uinkin Guerar nawa jatun inabu mekenikabun Isaacun inabu mekenikabu kunyan akin jatu yuikin:

—Nukunaki. Matunamaki— jatu wabu jaskaibuwen taexun Isaacun ja unpax bana jenebainkin kenakin yuikin: “Yaushinamei ja ikaibu unpaxki”, anikiaki. 21 Janua ana napanpa manankidi maexun unpax kini ana benawakin ana jatu pukinmakin ana jatu unpax bechimaimaken jawen taexundi ana jatu kunyan adiakin yuikin:

—Nukunaki. Matunamaki— jatu ana akubainaibun jaska jatu waibuwen taexun Isaacun ana jatu jenemabainkin kenakin: “Sinatadabeaibu Unpax Kiniki”, anikiaki. 22 Janua ja kachu chai benanta maeimaxun unpax kini ana jatu benawamaken pukinkin unpaxki pesabu ana tsuan jatu kunyan aki sinatamawen taea jiwekin kenakin: “Mae Jawama Ibuumaki”, iwanan, “Natian Jehová Diosun na mae nuku inan nenua nun paxanaii”, jatu wa

23 janua chai basi benai Isaac dasibibu iyui Isaac Beerseba unpax bana kini anu kaken 24 meshu medan Jehová jaki nukuxun Isaac yuikin:

—Dateyamawe. En min epa Abrahamnen mekenika Dioski. Jawada en yunua Abrahamnen chibankin akubainiki. Jaskawen taexun jaibuwakin en mia duawadiaxanaii, minabu ichapa mia pa waxunkinan— atan kaken 25 januxun Isaacun mishki chi tapu wakin mishki ichawakin maspu watan ja mamakixun daewakin jau benimanun, iwanan, chaxuwan bake tesenxun menu keyukin Jehová Dios kenwantan janu jawen tsumabu jatun tadi jiwe dasibi puntematan januxun jawen tsumabu unpax kini benawamakin jatu yunua pukinkubainkin unpax bechinibukiaki.

26 Janua betsatian Abimélec Isaacbe janchanun ika Guerar anua juai jawen jaibu Ahuzat inun, jawen detenamenikabu xanen ibu Ficol jatu iyua 27 Isaacun jatu yukakin:

—Ea bechipaiama eki sinatakin man ea mae mebinkubidana nenudi en juimaki. ¿Ea ana jaska wanun ixun man ea uin bekanxumen?— jatu wa 28-29 jabundi Isaac kemakin:

—Miadan, Jehová Diosun duawakin mia medabewakubainai nun uinmiski. Mia shinain yuinamei yubakai: “Isaacbe yubakai kananwen, nun jabe jaibunamexanunan”, ishian nun juxuki, eskakidi yubakaidan. Nukuki sinatakin man nuku chakabuwama inun nukundi matu ana bikawamadan, nun jaskakidi yukatiduki. Min nuku anu jiwea mia duawakin nun mia jawa wama unanuma nichinmaki. Natian Jehová Diosun mia duawakin jeneama nun uindiaii— akabu 30-31 ninkatan Isaac benimakin piti ichapa ainbu bawamaxun jatu inan pikin mabex akin keyutan uxashini penaya bestentan Isaacbe ana yuinamei:

—Jehová Diosun nuku uianyan yubakai nun janchashinawen taea ana ichakanikapakeyamananxanwen— aka Isaac jatube janchai menetan jatu nichian ana jabe sinatanameama jabe jaibunametan unanuma bui penibukiaki.

32 Janua jabias xabatian jawen tsumabu bexun Isaac yuikin:

—Unpax bana kini wakin nun pukinxu ma jeneki nun pesaxuki— akabu 33 januxun Isaacun ja unpax kini kenakin “Sebáki”, anikiaki. Jaskawen taexun ja mae kenakin “Beersebaki”, ani jabiaskidi jeneama kenamisbuki.

34 Esaú 40 año jayatun Hitita nawa ainbu dabe binikiaki, ainwankinan, Beerín ainbu bake Judit inun Elón ainbu bake Basematdan. 35 Ja ainbu dabe jawenabumatun jatun beyawen taexun Isaac inun Rebeca jatu bika tenemakubainibukiaki.