Abrahamnen Queturá ainwantan juni bake bawa jati inibukiaki, na janchadan
25
Abrahamnen ana ainbu betsa jawen kena Queturá bitan 2 janua jawen bakebu jaki bawa jawen juni bakebu Abrahamnen inan kaian jati inibukiaki, Zimránan, Jocsánan, Medánan, Madiánan, Isbacan inun Súahdan, jati inibukiaki, jatun kenadan. 3 Janua Abrahamnen juni bake betsan Jocsánen juni bake dabe bawatan jatu kenanidan, Sebá inun Dedán inibukiaki. Janua Abrahamnen baba Dedánen juni bake dabe inun bestidi bawadiadan, ma ewatan paxkatan paidan, jatunabudan, Asur nawabu inun, Letuseo nawabu inun, Leumeo nawabu jati inibukiaki. 4 Januxun Abrahamnen bake betsandi Madiánen juni bake 5 bawadiatan jatu kenakinan, Efá inun, Éfer inun, Hanoc inun, Abidá inun, Eldaádan, jati inibukiaki. Jati dasibi Queturán enabu inibukiaki, jawen juni baken inun jawen juni bakebun bababudan.5,6 Ja dukun Abrahamnen dasibi jawena jawen mabu inun, jawen inabu inun, jawen tsumabu dasibi paxkaxun januxun peiwen jatu bini jawen ain betsa tibibun juni bakebu Abraham bebunkidi jatukidi yubakaimaxun jawen mabu jatu paxkaxuntan jatu ibu wama akeaketan januxun jau Isaacbe ketaxameama benanta jiwetanunbun badi juaikidi jatu nichinpakenikiaki. Jatida jatu inan keyuama ichapa jawen bake Isaac yunu keyutan Abraham mawadiama Isaacbe jiwenikiaki.
Abraham mawa mai bini anu mai wanibukiaki, na janchadan
7-8 Jaskai jiwea ma anibujaidai mestebui 175 badiya mawa Abraham jawen xenipabu mawa bumisbu anu kadianikiaki, jatuki dasidan. 9-10 Jaskaya jawen juni bake dabe Isaac inun Ismael bestitun Mamré mae badi juaikidi Macpelá anu mishki tanpe medan Abrahamnen yuda datankin mai watan bunibukiaki, jawen bai anua mishki tanpe Abrahamnen Hitita nawa Sóharin bake Efrón anua peiwen taexun bini anu jawen ain Sara dapi jabe maiwakinan. 11 Abraham mawaimaken Diosun jawen bake Isaac pepawakin duawaya ja unpax bana kini kenakin: “Jamebi Jiweatun Ea Uinmistun Chachaki”, anibu anu Isaac janu jiwepaunikiaki.
Ismaelin enabudi eskai jiwedianibukiaki, na janchadan
12 Saran Egipto nawa ainbu jawen dayadu esclava Agar Abraham yunua bakewanidan, jatun juni bake Ismaelin juni bakedan, ichapa jatu bawadianikiaki. 13-15 Ismaelin juni bakebu iyuatun jawen kenadan, Nebaiot janua Quedar inun, Adbeel inun, Mibsam inun, Mismá inun, Dumá inun, Masá inun, Hadar inun, Temá inun, Jetur inun, Nafís inun, Quedmá jati jatun kenadan, 16 Ismaelin juni bakebudan, 12 idianibukiaki. Ma ewatan paxkatan paidan, jabu tibi xanen ibui mai pakea tibi ibu wai januxun jatun tadi jiwe nichinbaunaibu jatun kena dabiki ibubis kenai pai ichapa jawenabubes midimajaida bestibu tibi jiwediapaunibukiaki.
17 Janua Ismael 137 año jaya mawa jawen xenipabu mawa janu bumisbu anu kadiai jatuki dasinikiaki. 18 Ismaelin enabu paidan xuku betsai Havilá mai pakea inun Sur mai pakea anu namakis ibu wai dasibi jiwea akeakedianibukiaki, Egipto badi juaikidi inun Asiria bai bui binubainmisbu anudan, jawen betsabubes unanuma pe jiweama detenameidan.
Rebeca bake bima Esaú inun Jacob nanea kainikiaki, na janchadan
19 Abrahamnen bake Isaac inun jawen bakebu jiwea tanakubaini eskapaunibukiaki. 20 Isaac 40 año jayatun Arameo nawabun Betuelin ainbu bake Rebeca, Labánen puidan, Padán-aram anua iwexuna ainwanken 21 Rebeca ma badi ichapa kabia bake biamasken Isaacun medabewakin Jehová Diosbe Rebeca ea axuna ninkatan jawen nuikin Jehová Diosun medabewa Rebecan tsupibu bake binikiaki. 22 Janua ewai jawen bake dabe naneawen taea pustu medanua detenameaibu unankin datekin Rebecan shinankin:
—En bakebu eskai detenamexankanimenkain. Eadan, ¿jaskai en jiwekunkainxanai?— ixun Jehová Dios yuka 23 Jehován kemakin:
—Ja bake dabe min pustu medanuadan, jabus jiwea yuda xukua dabe detenamexanaibu bebunkidi mia bika tenemaibu min jayaki. Juni bake dabe min kainxanaii, betsa kushipa inun betsa kushipa bexmasdan. Ja maxku kaiantun jawen betsa iyua tsuma waxanikiki— aka 24 tuya ewatan juni bake dabe kaian 25 ja dukun kainxu uianbu jawen yuda jidabi dani tashipa jayawen taexun kenakin: “Esaúki”, anibukiaki. 26 Janua maxkun iyuatun tae chichuku tsuma kaian kenakin: “Jacobki”, anibukiaki. Janua jawen ain Rebeca jawen bake dabe kainken Isaac 60 año jayanikiaki.
Esaún iyuatun kushipa jawen betsa maxku yununikiaki, na janchadan
27,28 Isaacun juni bake dabe yumei ewatan janua Jacob janchaisma pes jawen mae dapixun chaxuwan mekei besti dayaya jakia janu tsua jiweabumanu Esaú kaxun dekuyakin tsakanika metsapajaidakunkainkin jawen epa Isaac yuinaka nami tsakaxun pimamiswen taexun jawen epan Esaú ja bechipaijaidaya jakia jawen ewa Rebecandi Jacob bechipaijaidadiaya 29,30 jaskakubainaibun xaba betsa badi kaya Jacobun bawakin mabex waya Esaún tsakai chaijaida ka chintunkidani jikitan punu nukajaida bunijaidai mawakatsis ikin Jacob yuikin:
—Punu nukajaida jui en mawakatsis ikaii. Min mabex tashipa wa beatan menan ea amadiwe, ea medabewakinan— aka mabex tashipa yukaiwen taexun Esaún kena betsa wakin Edomki, nukun janchawenan, tashipadan. 31 Janua jabun beya chibankin jawen epa ma mawaken iyuatun jawen kushipa bi xanen ibumis inun jawena dasibi paxka ichapa inankin maxku eskadabes inanmisken Jacobun shinankin Esaú jaskabiaken: “Ean mebinun”, iwanan yuikin:
—En iyuabia buni chakayamai en mawa ja en epan kushipa en jayaxanai ikis ea jawa medabewatidumaki. Peki. En mia juchi waii— aka 33 Jacobun yuikin:
—Jaskabia Jehová Diosun nuku uinkin unanyan ja dukun jawaida ea yubawe, min ea yuba chipu en mia pimaidan— aka Esaú yukadanwan yuikin: