—En mia yuiai ea dapi juwe. Diosun nuku uianwen taexun en mia yubamaii. Nukun beya chibankin ea unanti wamakin tsitsaukain ea kishwakewe, min ea jaska waya en mia yuiaidan. Canaán nawabu nun jatube jiweabu anua ainbu Isaac en bimakatsi ikamaki. Jakia janua en juni anu kaxun enabu anua ainbu en bake Isaac ixuntanxanwen. Jehová Diosun nai inun mai damiwanitun nuku uianyan jaska en mia yunuai inun en mia yubamai ea axuntanwen— aka 5 jawen tsumapan yuikin:

—Jamen ainbu ebe jukatsi ikamakenan, ¿en jaskaxanai? ¿En daka janu minabu jiwe anu min juni bake jatu iyuxuntanxanti?— aka 6-7 Abrahamnen nemakin:

—Jaskamajaidaki. Min ea jaska watidumaki. Uindawe. Janua en juni anu en bake en nichintidumaki. En epan enabu jiwenibu anua Jehová Diosun nai mekenikatun ea nichiniki. Januxun ea jatu jenemabidankin Diosun nenu ea iwenixun ebe janchakin yuikin: “Na mai pakea minabu jatu ibu wamakin en jatu inanxanaii”, ea wani jabiastun mia medabewakin jawen nai tsumadi mia bebunkidi yunuxunxanikiki. Mia jaska wa jadia ainbu en bake iwexuntanxanwen. 8 Janua ainbu jukatsi ikamaken iweama jenebidanxanwen, en mia yuikin yubamaxu ana shinanmadan. Jaska en mia nemai jadi en bake jatu iyuxuntaskayamaxanwen, enabu anudan— aka 9 jaska wa ninkatan Abrahamnen tsumapan kishwakexun yubakin yuikin:

—Jehová Diosun ea ninkaya min ea yunuxu en mia axuin kaii— atan 10 januxun jawen jatu daewati inankuinti ichawakin Abrahamnen camello ichapa anua 10 katuxun jawen mabu pepa ichapadi katudiaxun kukiki nanexun camello kamaki kuki jawen tsumabu bexematan kai Mesopotamia mae pakeakidi kai uxa ichapakunkaini Abrahamnen betsa Nahorin mae dapi nukutan 11 ma badi kaya unpax bana kini dapi camello juindukunmakin jatu beumaken jabiatiandi chipashbu bexun unpax biaibun 12-14 jau ea unanmanun ixun Abrahamnen tsumapan Diosbe janchakin ea akin yuikin:

—En tsuma Abrahamnen mekenika Dios Jehováan, en tsuma min duawamis keska wakin eadi medabewakin uinmakin ea tapinmawe. Uinwen. Unpax bana kini dapi en niken unpax bi chipashbu ibidan ibidanaibu unanti wamakin chipash betsa en yukakatsi ikaii: “¡Min shumu butexun unpax ea amawe!” en aka ja chipash min ma katua ebe janchai: “Awe, unpaxdan. Min camellodi en mia amaxunaii”, akin ea yuiai en unankatsis ikai ja chipash min ea katuxunaidan, Isaacun ain jau ixanunan. Jaskawen taexun en tsuma Abraham min ana duawai en unankatsis ikaii— akaya 15-16 jancha menediamaken Betuelin ainbu bake Rebeca jui jawen xanu Milcá inun jawen juchi Nahor Abrahamnen betsadan, chipash jawenduajaida junin mekin pesadiama shumu ia jui unpax bana kini anu butukain jawen shumuki unpax matawatan mapekeaya 17 jakidi Abrahamnen tsuma kushikain bebun tetan yuikin:

—Chipashaan, unpaxdan, ea amawe— aka 18-19 chipashan yuikin

—Awe, xanen ibuun— atan jawaida jawen shumu butetan unpax sananxuna akin menetan xetsekeaya Rebecan ana yuikin:

—Min camello dikabi en mia jatu amaxunbauna unpax netsuaya ana bitanxun en mia jatu keyu amaxunkatsis ikaii— atan 20 jawen camello amakin jawen amatiki unpax jawaida juxkexuntan ana unpax bitan bitankin jatu dasibi amakin keyuxunaya 21 Abrahamnen tsumapan jaska waxuain janchama Rebecakidi shinankin:

—Jehová Diosun ea duawakin ¿ja ainbu ea inainmenkain?— itan 22-23 jawen camellon unpax ma akabun janua jawen deu oro mane chaxakapa jawen xankama 7 gramo inun jawen mebi oro dabe jawen xankama tibi 100 gramo bixun Rebeca inankin sawemaxun yukakin yuikin:

—Min tsuan bakemenkain ea yuiwe. ¿Janu enabube en uxatidudan, min epan jiwe anu teke xaka jayamen?— aka

24 —Eadan, en Betuelin bakeki. En epan ibubudan, en xanu Milcá inun en juchi Nahor ma mawanibuki. 25 Camello piti basi ichapa inun uxati dintu ichapa nun jayaki— aka 26-27 jawen beya chibain danti iki beti ixun Jehová Dios kenwankin yuikin:

—Jehová pepa duapajaida en tsuma Abraham min jawen mekenika Dioski. Mia besti jabe duawanamei min jabe putanameismaki. En tsumapan ea yunushina keska ea mekebidankin ma jawenabu anu min ea bichixuki— akaya

28 Rebecan jaskai ninkabaini kushikain jawen ewan jiwetan kaxun unpax biti anu ka ja junin jaska waxu dasibi jatu yui keyua 29-30 Rebecan pui Labánen ninkatan jaska bestima ja deu sawemaxu inun mebi dabedi sawemaxudi uintan ja junin jaska waxu uintanun ika ja unpax bana kinikidi kushikaini kaxun Abrahamnen tsuma benakubainkin jawen camello ichapabube nia jawa paxkadiama bechitan jaki nukutushikin 31 yuikin:

—Miadan, Jehová Diosun mia duawamiski. Janu niama nukun mae anu kayuwe. Mia inun min tsumabu nun ma jiwe mia pewaxunxuki. Ja dikabi min camello janu maniti nun pewaxundiaxuki. Ebe bekanwen— aka 32 Abrahamnen tsuma jatun jiwe anu kai jikiaya Labánen camello kamakia jawen mabu butexuntan jau pinunbun basi adumis tsusin bixuntanxun inankin manchinxuntan januxun Abrahamnen tsuma inun jawenabu jau jawen juchukinunbun unpax jatu inan juchukiaibun 33 janua piti jatu pewaxuntan jatu tsaunxuna pidiama Abrahamnen tsumapan jatu yuikin:

—En piyuamaki. Jaska en juxu matu yuikin taewayunun ea ninkakanwen— jatu wa

—Peki. Nuku yuiwe— Labánen aka 34 januxun jatu yuikin:

—Eadan, en Abrahamnen tsumaki. 35 Jehován en tsuma duajaida wakin xanen ibu wamiski, dasibi betsa betsapa inankinan. Chaxuwan midima inun, ina awa midima inun, plata mane inun, oro mane inun, jawen juni inun ainbu dayadu esclavo ichapa inun, camello inun, ina betsa asno ichapa inanmis jayaki. 36 En tsumapan ain Sara yuxabujaidabia juni bake bima kaini ma juni ewaken jawen ibu Abrahamnen jawen mabu ichapa yunuima ma ibuwakubainikiki. 37 Jaskaken en tsumapan ea yubamakin yuikin: “Nenu Canaán nawabu dapi nun jiweadan, Isaacun ain nenua min bixunyamanun jaska nemakin en mia yunuaii. 38 Jakia en epan enabu anu kaxun en bake Isaac ain benakin ea ixuntanxanwen”, ea wa 39 ean yuikin: “Jamen ainbu ebe jukatsi ikamakenan, ¿jaskaxanpa?” en wa 40 ea ana yuikin: “Jehová Diosun ea mekeaya en jawen jiwekunkainmiski. Jatun jawen nai tsuma mibe yunua mia medabewabaina ainbu en epan enabu anua en bake Isaac min iwexunxanaii. Ainbu enabu anua min iwea min ebe yubakaxu jaska wakin min keyua min benimaxanaii. 41 Jakia enabu anu min jikia ainbu mia inanbuma min ebe yubakaxu ana jawa shinanma jenebidanxanwen”, akin ea yuishinaki. 42-44 Jaskaken en jua unpax bana kini anu nixun en juinti medan shinankin yuikin: “En tsumapan mekenika Dios Jehováan, min Abraham medabewamiski. ¿Min eadi medabewatidumen?” atan “Uinwen. Unpax bana kini dapi en nia janua unpax bi chipash jua en yukakatsis ikaii: ‘Min shumu butexun unpax ea amawe’, en wa ea yuikin: ‘Awe. ¿Min camellodi mia amaxunpa?’ ikai ja en tsumapan baken ain mia Jehován min katua en unanxanaii”, iki 45 janchai en menediamaken Rebeca jawen shumu tetsaumekidan unpax bitan kaya ean yukakin: “Min unpax biwanaidan, ewen nuikin ea amawe”, en wa 46 jawaida jawen shumu butetan ea yuikin: “Awe. Min camello dikabi en mia unpax amaxunaii”, ea wa ea unpax amatan en camellodi ea amaxuna 47 ean yukakin: “¿Min tsuan bakemen?”, en wa ea yuikin: “Eadan, en Betuelin bakeki. En xanu Milcá inun en juchi Nahor ma debunibuki”, ea waya januxun deu inun mane mebi dabe sawematan 48 janua danti iki beutan yuikin: “En tsumapan medabenan Dios kenwankin yuikin: ‘Enabu anu chipash ainbu jawen bake Isaac en ixuniyuaya ea medabewakin pe iwekin Jehová Diosun min ea medabewaxuki’ ”, en ikidanxuki. 49 “Natian en tsumakidi en matu yuixu jaskada man jakidi duawati shinainmenkain, ea yuidikanwen”, iwanan, “Ja dikabi chipash Rebeca man ebe nichinkatsi ikama ea yuidiakanwen, man ea jaska wamaken jiwe betsanua en benaxunaii, chipash betsadan”, jatu wa 50-51 Labán inun jawen epa Betuelin ninkatan kemakin:

—Na dasibi Jehová Diosun mia yuishina ma peki. Jaskawen taexun pepa inun chakabu shinankin nun mia yuitidumaki. Jehová Diosun nuku jaska waxu nun betsa watidumaki. Rebecadan, na tsaua iyuxunditanxanwen. Min iyua min tsumapan baken ain wanxanikiki— akabu 52 jatun jancha ninkatan Abrahamnen tsumapan jawen beya chibain beti ixun Jehová Dios kenwantan benixun 53 jawen inankuin mabu apaxun plata mane mabu juxupa inun, oro mane chaxajaida mabu inun, tadi pepa kainmaxun Rebeca inantan mabu betsa pepa jawenduadi jawen pui Labán inun jawen ewa inandiatan 54 jawen camello uinikabu jawen tsumabu betsabetan piti tsaunxunabu pikin menetan janua uxashini penaya bestenkauan jatu yuikin:

—En tsumanu ma en kakatsis ikaii. Nuku nichindikanwen— jatu wa 55 jawen pui inun jawen ewan yuikin:

—Chipash nun manuxanai ana 10 xaba niti ixun nuku uinmayukanwen. Jati binuaya chipash min iyutiduki— akabu 56 ana jatu yuikin:

—Ea jatixuinda ea niti ayamakanwen. Jehová Diosun ea matu duawamashinaki. En ma chintuain ea nichindikanwen, en tsumanu chipash iyuxuni en ma kaidan— jatu wa

57 —Chipash kenaxun nun yukaii— axun 58 Rebeca kenabu juai yukakin:

—¿Ikis min jabe kakatsi ikai?— akabu

—Jeen. Ja junibe en katiduki— ikaya 59-60 jatun pui Rebeca inun, jawen tsuma ainbu jatun yumewakubainai inun, Abrahamnen tsuma inun, jawen camello uinikabu inun, jawen tsuma betsabu jatu nichinun, iwanan, Rebeca jau unanuma pe jiwexanun duawakin yuikin:

—Ichuun, jau minabu midimajaida ipakexanunbunwen. Jabu jatuki sinataibu jau jabun jatu maemakubainxanunbunwen— atan jatu nichianbu 61 janua Rebeca benikauan jawen tsuma ainbuaibube camello kamaki jatu katsauanbu Abrahamnen tsumapan jatu iyui bebui kainkainaya chibain jachun buaibun

62 jabiatiandi ja chacha kini jawen kena: “Jamebi Jiweatun Ea Uinmistun Chachaki”, anibu anu jukin jawen chaxuwan jatu pima atain mai pakea jawen kena Négueb anu Isaac jiwea 63 xaba betsa badi kaya shinain basi neki nixun camellowen beaibu bechitan uianyan 64-65 Rebecandi unuxudi uinkin Isaac nia bechidiatan camello kamakia Rebeca bututan Abrahamnen tsuma yukakin:

—Tutudi bai tanabidani jui nukuki nukuyuaidan, ¿tsuamen?— aka kemakin:

—Jabia en tsumapan bakeki— aka jaska ninkatan Rebeca jawen madakukuti saweawen bepukuaya 66 jatuki nukua jaska Diosun axunshina Abrahamnen tsumapan Isaac yuia 67 ninkatan Rebecaki nukutan jawen ewan tadi jiwe anu Rebeca iyuxun bikin ainwantan bechipaijaidai:

—Rebecawen taea en ana benimajaidaii— ikin Isaacun shinain jawen ewa mawaima ana jaskaida shinanma jawen ainki bana ana jaskaida nuiama inikiaki.