—Eadan, en juni betsaki, en matunabumadan. Jakia en matube jiweyuaiwen taexun ea ninkakanwen, matu yuinunan. En ain mawashina en uinkatsi ikamaki, en maiwakatsis ikaidan. Janu en maiwai matun mae peiwen janu maiwati ea inankin ibuwamakanwen— jatu wa 5-6 Hitita nawabun kemakin:

—Xanen ibuun, eskaki. Nuku ninkawe, mia yuinunan. Min xanen ibu betsa pepaki, nukube jiwea min Diosunadan. Nukun mishki tanpe jadatuda pepa anu min ain min maiwatiduki, tsuan nun mia nemamakidan— akabu 7-9 ana Abraham benikauan jawen juinti pepa jatu unanmakin jawen beya chibain beti itan benitan jatu yuikin:

—En ain mawashina en maiwatidudan, ¿man ea inankin ibuwamakatsi ikimenkain? Ea medabewakanwen. Sóharin juni bake Efrón jawen mishki tanpe janu maiwati keyatapa jawen bai depi jayaki. Ja tanpe mishki kena Macpeláki. Ja bai ibu ea jancha waxunkanwen, jau ea inankin ibuwamanunan. En peiwen jatida kadu depia pakaidan, matun man unainan. Jaskawen taea matube enabu mawa maiwati tanpe mishki en jayapakexanaii— jatu watan ana tsauaya 10-11 Hitita nawa Efrón jawenabu Hitita nawabu namakis tsaua jau dasibibun pe ninkanunbun benikaun Abraham kemakin:

—Jaskamaki. En jancha ninkawe. Ja bai inun mishki tanpe en mia jamen ibuwamaii. Enabun ninkaibun en mia inankuiaiin, janu min ain min maiwanunan— atan tsauken 12 janua Hitita nawabun ninkaibun benitan jawen beya chibain beti itan benixun 13 ichabu bebunxun Abrahamnen Efrón ana kemakin:

—Ea ninkawe. Jaska en mia yukai en pei biwe, peiwen jawen kadu dasibi en mia pakaii. Biwe. Min ikaya ean ibu watan en ain jadi en mai wakatsis ikaidan— atan tsauaya 14-15 januxun Efrónen Abraham ana kemakin:

—Xanen ibuun, en jancha ninkawe. Ja en baidan, jawen kadudan, 400 plata jexe juxupaki. Jati jawen kaduki. Ana ja jaska shinain jawen nui janchayamananwen. Ja bai en mia ibuwamai bixun minabu mawa janu jatu maiwapakexanwen. Ikis min ain janu maiwadiwe— aka 16 pei Efrónen bikatsi ikaya Abrahamnen unankin dasibi uiainbun jaska yuiai keska dasibibun uiainbun pei tana pewatan 400 plata pei jexe pakaken 17-19 januxun mai pakea Canaán anu Hitita nawabu jatun maewan Mamré natian jawen kena bena Hebrón janu bai kaya dasibi jikimisbu anu dasibitun uiainbun badi juaikidi Efrónen bai Macpelá dasibi, jawen miban banati mai inun, jawen mai wati tanpe inun, jawen bai nemaki ji bana inun, tsisumen anu ji bana mapua ja dasibi xanen ibubun jawen unaki kenematan Abraham ibu wamaken januxun jaska wabu bitan chipu Abrahamnen mishki tanpe anu jawen ain Sara mawashina mai wanikiaki, mai pakea Canaán anudan. 20 Jaska Abrahamnen enabu mawa janu jau jatu maiwapakexanun peiwen Hitita nawabun bai inun mishki tanpe inanbu bitan jawena wanikiaki.