—Abrahamneen— aka

—En nenuki. Ea yuiwe— aka 2 yuikin:

—Min juni bakedan, ja min bechipaijaidaidan, min ain kayabin bake bestichai Isaacdan, Moria mai pakea anu iyuwe. Janu ja mati en mia uinmai anuxun min bake Isaac ea inanxanwen, ea daewakin ea menu keyuxunkinan— aka

3 ninkashina janua xaba betsatian penamajaida Abraham bututan jawen kuati kadu watan jawen asno kamaki kadu nanetan jawen bake Isaac inun jawen dayadu dabe jatu iyui janu Diosun yuishina anu jatube jadi kai 4 uxa dabekain Abraham nukutan janu Diosun yuishina bechitan 5 jawen tsuma dabe bashikin jatu yuikin:

—Nenu asnobe tsauxun nuku manayukanwen, nuku dabes kaxun Dios kenwantan nun ana juaidan— jatu watan 6 ja kadu bexu Isaac iamabainkin kenti chi tsistuyabi inun nupe bitan jati bui jabe kaya 7 januxun jawen bake Isaacun jawen epa Abraham yukakin:

—Epaan— aka ninkatan:

—¿Jawamen, epaan?— aka

—Uinwen. Chi inun kadu nun ma jayaki. Jakia chaxuwan bake ja menuti nun jayamaki. ¿Jania?— aka 8 Abrahamnen kemakin:

—Epaan, chipu Diosun chaxuwan bake nun ja menunun nuku inainkiki— abaini jawen bakebe kai 9 janu Diosun yuishina anu jikitan mishki chi tapu wakin mishki ichawakin maspu watan jaki kadu manchinxun jawen bake Isaac sebitan chi tapu anu kadu mamaki datanxun 10 jawen bake textenun, iwanan, Abraham mexunkain nupe bikin sitanaya 11 jawaida nai anuxun Jehová Diosun nai tsuman kenakin:

—Abrahaam, Abrahaam— aka ninkai teku iki e itan yuikin:

—En nenuki. Ea yuiwe— aka 12 nai tsuman yuikin:

—Min bake jaska wakin tenanyamawe. Dioski mesekin min bake bestichai min jaki jawa yaushiama en unaiin— akaya 13 januxun jawen pechiudi Abrahamnen jawaida uinkin chaxuwan bene jawen maxunki tsukuski bicha jawaida achitan neatan bexun jawen bake jana butetan pekatan januxun Dios kenwankin jawen xantukun chaxuwan bene tesenxun kuaxunkin menu keyunikiaki. 14 Jaska watan Abrahamnen ja mati kenakinan: “Na mati Jehován jatu yupa watidumaki”, anikiaki. Na jabiatiandi ikis yudabun jabiadidi kenadiakin jeneisbumaki.

15-17 Januxun nai anuxun Jehová Diosun nai tsuman Abraham ana kenakin yuikin:

—En tsuma Jehován mia yuikin: “En mia yuishina min ma axuki. Min juni bake bestichai min eki jawa yaushiamaki. Jaskawen taexun en mia yubaii. En kushipawen emebi en mia yubai ea ninkawe. Pepawakin en mia duawaxanaii, pa wakinan. Pa wakin minabu en midimawaxanaii, bishi min uiainti wakin inun ianenwan kexa mashiti wakinan, tsuan tanatiduma wakinan. Tsuabuda minabuki sinataibu minabun jatu maemakubainxankanikiki. 18 En mia yunushina min ea axunxuwen taexun minabu katuxun jatuwen nawa betsa betsapa mae jidabi anu en jatu duawakubainxanaii”, akin Jehová Diosun ea mia yuimaxuki— aka 19 ninkatan jawen tsuma dabe bashibidananu Abraham jawen bakebe ana chintunkidan jatuki nukua Beerseba anu jawen asnoya ana bui jikiabu janu Abraham jawenabube jiweyukunkainikiaki.

20-24 Jatianda tsuanda Abraham yuikin:

—Min betsa Nahor bake ichapa ma jayaki. Jawen ain Milcá 8 juni bakeyaki, jawen bake iyuadan, Us inun, ja kachu Buz inun, Quemuel inun, Quésed inun, Hazó inun, Pildás inun, Idlaf inun, Betueldan. Jatiki, jawen juni bakebun kenadan— anikiaki. Ja inun, jawen nantakea ain bikin pakatan bini ainbu betsa Reumádan, 4 juni bake jayadianikiaki, Teba inun, Gáham inun, Tahas inun, Maacádan. Jatikiaki, jawen juni bakebun kenadan. Chipu Nahorin bake betsa Quemuelin juni bake betsa bawani jawen kena Aram inikiaki. Ja inun, Nahorin juni bake betsa Betuelin ainbu bake betsa bawanidan, jawen kena Rebeca inikiaki.