Isaac kain eskanikiaki, na janchadan
21
1-4 Jehová Diosun Abraham yubaimaxun Sara shinankin jatu medabewaya januxun Abraham mestebujaidabiatun jawen ain Sara chutakin bakewaima jaska Diosun yubakin yuima keska Sara juni bake bimaima kaian Abrahamnen kenakin: “Isaacki”, ashinxun 8 xabatian jawen jina kubichi bikin mextenikiaki, jaska Diosun yunuima chibankinan. 5 Janua Abraham 100 año jayaken Sara Isaac kaintan 6 Saran shinankin: “Diosun ea benimawakin ea usanmaxuki. Jaskaken en juni bake kainshina jabun ninkatan benimadiaxankanikiki, ebetan usandiaidan. 7 En benen ea bakewaima kainxuntan en chuchu amaxuntidudan, tsuan bebunkidi shinantidumajaida ikimaki. Jakia en bene mestebujaidabiatun ea bakewaima en juni bake kainxunshinaki”, inikiaki.Agar inun jawen bake Ismael jatu jiwemabiaxun Abrahamnen jatu nichinikiaki, na janchadan
8 Janua ja jawen bake Isaac ewaya jawen beya chibankin chuchu jenemakin taewaken jabiatiandi Abrahamnen jawenabu piti ichapa waxun jatu pimakin benimawaya 9 jawen ain betsa Egipto nawa Agarin bake Ismael jaki bepadamekin dayuikin Isaac ichaya jawen ibu Saran uinxun 10 sinatakin Abraham yuikin: “Min dayadu esclava Egipto nawa jawen bakebe nichindiwe, en ana jatu bechipaiamakidan. Janu nuku nun mawaya nukun mabu inun, nukun inabu inun, nukun dayadubu Ismael jau Isaacbetan paxkayamaxanun, en bake kayabi Isaac bestitun ibu wakin bixanikiki. Jaskawen taexun jatu nichindiwe”, aka
11 Ismael jawen bake ma bedunanwen dabanan Abrahamnen shinain jawen nui pes dakaken 12-13 januxun Diosun Abraham yuikin: “Min dayadu Agar inun min bake Ismaelwen dabanan ikin shinain pesyamawe. Jaska Saran mia yunuai keska jatu wawe. Jaska en mia yubanidan, Isaacwen taea minabu kayabi besti inunbadixankanikiki. Jakia min dayadu esclavan bake min bakediwen taexun Ismaelin enabu ichapajaidadi en mia jatu axundiaxanaii”, aka
14 jaska washina penamajaida Abraham butuxun bichi bishtuki unpax maneshina inun misi Agar jawen dayadu inankin jau jaya butanunbun peumatan jawen juni bake bedunanbe nichian bui Beerseba mai pakea janu tsua jiwediabumanu iaketani 15 jawen unpax inun jawen piti keyui ma netsuken jawen bake Ismael unpax manujaidai ma babuken ni utapan naman jau dakayunun yunua dakaken 16 jenebaini uin benanta tsauxun shinankin: “En bake mawai en uinkatsi ikamaki”, ika jawen bakekidi pechitan tsauken jawen bake kaxaya 17 janua jawen baken jui Diosun ninkaya nai anuxun Diosun nai tsuman Agar kenakin yuikin: “Agariin, ¿min jaskai ikai? Min bake ni utapan naman daka kaxai Diosun ninkaxuki. Miadan, dateyamawe, man mawamakidan. 18 Benitan min bakedi metsunxun jeneyamawe, min bake Ismael duawakin jawenabu ichapa en jatu wadiaxanaidan”, atan 19 janua Diosun Agar unpax inankin chacha uinma kaxun bikin bichi bishtuki chacha unpax mata waxuntan jawen bake amanikiaki. 20 Diosun medabewakubainaya jawen bake Ismael ewai pia kuinwen tsaka mebeyai dekuyakunkaini 21 Parán mai pakea betsa janu tsua jiweabumanu jawen ewabe jiweaya chipu jawen ewan Egipto anuabu ainbu iwexun ainyan wankin ainbu bimanikiaki, jawenabu kayabi bimakinan.
Abimélec Abrahambe yubakanamenibukiaki, na janchadan
22 Jabiatiandi Guerar nawa xanen ibu Abimélec jawen detenamenikabu xanen ibu betsa Ficolbe Abraham anu juxun yuikin:
—Min Diosun jaibuki. Dasibi min akai Diosun mia medabewakubainmiski. 23 Eskawen taea Diosun nuku uianyan ma mae anua en mibe yubakaii, ea inun, en bakebu inun, enabu pakubainaibu mia inun minabu jau nuku chakabuwayamaxanunbunwen. Ea yubawe. Min nuku dapi jiweaya en mia duawaima keska wakin ea inun enabu na mai pakea anu nun jiweabu jabiaskadi wakin nuku duawadiapakexankanwen— aka 24-25 Abrahamnen ninkatan kemakin:
—En mia yubatiduki. Jakia mia yuinun, ninkawe, ea jaska waimabudan. Min tsumabun en unpax kini ea mebinmabuki. En mibe yubakaya minabu nuku ana jabiaska watidumaki— aka 26 januxun Abimélecin Abraham ninkatan kemakin:
—¿Tsuabun mia akimamen? Jaska mia waimabu natian en jawa unanmaki. Min ea yuiama ikima en dama ninkaii— aka 27 janua chaxuwan ichapa inun ina awa ichapa Abrahamnen Abimélec inan jabe yubakai padananantima ja dabe yubakanametan jabias xabatian 28 januxun Abrahamnen jawen chaxuwan bake yuxans 7 katuxun paxkatan tadi nichinken 29 jaska wai Abimélecin uinkin yukakin:
—Ja chaxuwan bake 7 en mia inan min bixuwen taexun chanima dasibitun unankin: “Ja unpax kini Abrahamnen jatu pukinmaniki”, akin unanxankanikiki— aka Abimélecin chaxuwan bikin:
—Peki— itan ibuwaya 31 janua ja dabe yubakaibuwen taexun ja unpax pukin anu mae kenakin: “Beersebaki”, anibukiaki. 32 Beerseba anua yubakanametan jawen detenamenikabu xanen ibu Ficol inun Abimélec jawen mae Filisteo nawabu jiweabu anu chintunbainibukiaki. 33 Januxun Beerseba anu jawen unpax kini dapi ji betsa tamarisco Abrahamnen banatan janua Jehová Dios jiwea ikibi ikabe janchakin kenwanikiaki. 34 Janua jaskai Abraham Guerar nawabu anu jatu dapi bai kani jawenabube jiwepaunikiaki, badi ichapa janu Filisteo nawabu jiweabu anudan.