—En puiki— jatu wa jawen ain yuxabubia Sara jawenduajaidaken ainwankatsi ikin Guerar nawa xanen ibu Abimélecin jawen tsumabu Sara jatu iwematan mediama 3 janua uxa namaya Diosun Abimélec yuikin:

—Uinwen. Ainbu min jatu iwemadan, juni betsan ainki. Jaskawen taea min mawaxanaii— aka 4-5 jakia ja ainbu mekin chutadiamawen taexun Abimélecin Dios yuikin:

—En Xanen Ibuun, ea ninkawe. ¿Tsuada pepa jawa chakabuwamabiaken min tenain? Abrahamnen ea yuikin: “En puiki”, akin ea yuimaki. Ainbu dikabitun: “En puiki”, akin ea yuidiaimaki. Abrahamnen: “En ainki”, ea wadan, en jiwe anu en jatu iwemama ikeanshinaki. Jakia jawa chakabu shinan chakama en jaska washinaki— aka 6 namayuaya Diosun ana yuikin:

—Jaa, jawa chakabu shinanma unanuma min ainbu jatu iwemashinadan, en unaiin. Jaskaken min ainbu chutapanan en mia nemashinaki. Min chutamawen taea min jawa chakabumaki, ebedan. 7 Jaskaken ja jawen ain Abraham ana nichinxunwen. Abraham en jancha ea yuixunikawen taexun Abraham ebe mia janchaxunaya min jiwea min mekexanaii. Jakia min nichinxunamadan, min mawaxanaii, minabus inun miadan— aka

8 jaska namapan uinshini penaya xanen ibu Abimélec butuxun jawen tsumabu jatu kena ichabu uxa namaya dasibi Diosun yuishinai Abimélecin jatu yuia jaska ninkatan datejaidaibun 9 januxun Abimélecin Abrahamdi kena jikia yuikin:

—¿Jaskakin min nuku chakabuwatushimamen? ¿Jaskakin en mia chakabuwamabia min nukuki chanichakaimamen, nukun chakabuwen atimapawanun ikadan? Jaska min ea waimadan, jaskatimajaidaki. 10 Nuku padain: “En puiki”, iaketainan, ¿min jaskada shinain ikimamen?— aka 11 januxun Abrahamnen yuikin:

—Ean shinankin: “Nenua man Dioski meseabumaki”, ika “Ea tenantan en ain bitidubuki”, ixun jaskawen taexun matu yuikin: “En puiki”, akin en matu yuitushimaki. 12 Jakia chanima en puiki. Nukun epa jabiaski. Janua nukun ewa besti betsaki, jasmadan. Nun jaskabia nukun beya chibankin jawa chakabumaken en Sara ainwaniki. 13 Ja dikabi en epan enabu anua Diosun ea iweaya en ain yuikin: “Ea duawakin ea mekekin janida betsabu anu jikixun jatu yuikin: ‘En puiki’, akin jatu ea yuixunxanwen”, en waniki— ikaya

14 jaska yuikin Abimélec inun Abraham jabun kaneshina daenamei petan jawen ain Sara ana yunutan januxun Abimélecin jawen chaxuwan inun, ina awa inun, jawen esclavo dayadubu juni inun ainbu inankuintan ibu wamakin 15 yuikin:

—Uinwen. En mai pakea jidabi anu uinbaunwen, jaska janu min bechipaiai anu min jiwetidukidan— atan 16 januxun Saradi yuikin:

—Uian. En miwen taexun 1,000 plata pei jexe kadujaida min pui en ma inanki. Jaskawen taexun en jatu uinmaidan, en pepaki, en mia jawa meama ishianan. Ja dikabi mibe mapumisbun ja peiwen unantidubuki. Miadi min ebe jawa chakabuwama ishianan, mikidi jawa chakabu yuikin mia yuanma ixankanikiki— anikiaki.

17-18 Abimélecin Abrahamnen ain Sara biken jawen taexun jawen ain inun jawen jiwe anu dayamisbu chutanamebiabu jau ana bake biyamayununbun Diosun jatu bexteimaken januxun Abimélecin Abraham jawen ain ana inanken Abrahamnen Dios yukaxunkin yuikin:

—Diosuun, Abimélec inun jawen ain inun jawen jiwe anu dayamisbu jatu xuxa wakin ana jatu bake bimaxanwen— akin yukaxuna samama jatu xuxa wakin ana jatun bake nanti pewanikiaki.