—¿Man juai?— jatu wa

—Nun juaii— akabu

—Matudan, en matu iyuxun beya wai en jiwe anu beyukanwen— jatu wabain —Ja jadi unpax tsaua jawen juchikikanwen. Janua en jiwe anu uxashini bestentan penaya ana man katiduki— jatu wa jabundi yuikin:

—Jaskamaki. Jemaintin anu nun uxaii— akabu 3 Lot jatuwen nuijaidakin jatu nemajaida jawen jancha ninkatan jawen jiwetan jikiabu misi ichapa inun piti shadabu jatu bawaxuna pitan

4 inadiabumaken Sodoma nawabun ninkatan juni ewabu inun bedunanbu dasibi Lotin jiwe dapi bea kexebaunxun 5 Lot kenakin daketapa wakin yuikin:

—Badi kaya ja junibu min jiwe anu bekanxukiaki. ¿Jania? Nun jatu chutai jatu nuku kainmaxunwen— akabu 6 Lot kainxun jawen jiwe anu jatu bichiama beputan datekin 7 jatu yuikin:

—En jancha ninkakanwen. Chakabu jatukidi shinanyamakanwen. 8 Jaskaken matu yuinun ninkakanwen. En ainbu bake dabe jayaki, junibe chutanamediamadan. Ja dabe en matu yunutiduki. Jakia ja juni dabedan, meyamakanwen. En jiwe anu jatu mekenun, iwanan, en jatu bichixuki— jatu wa 9 jabundi Lot yuikin:

—Nawaan, ukedi kawanwen. Jawada pepa inun chakabu nun amisdan, min nuku yuimiski. Ikis nun miadi ichakajaidawakatsis ikaii, ja juni dabe nun ichakawatidu binumakinan— atan achinun, iwanan, beputi tu anun ika beaibun 10 Lot jawen beputi kexa anu nia nai tsuma dabetun dintu medanxun mexunkain Lot tsumaxun bichitan xui bepukin mestenwantan 11 janu dasibi xanen ibubu inun xanen ibuma juni ewabu inun bedunanbu jaskaibu jatun kushipawen ichakawakin jatu bechexkin bekunwan beputi benai jikinun ika jaska jikitima Sodoma nawabu jin iki punu nukatan inun buabun 12-13 januxun ja nai tsuma dabetan Lot yuikin:

—Na mae anudan, ¿minabu betsa jayamen? Sodoma nawabu kaka chakabujaida Jehován ninkakubainaiwen taexun nuku yuikin: “Jatu yamawawe”, iwanan, nuku yunushinaki. Jaskawen taea min daisbu inun min bakebu ana betsa minabu nenua iyukin chai jatu paxawatanwen, Sodoma nawabu nun jatu yamawaidan— Lot akabu 14 janua Lot kainkaini ja junibu jatu dais wakatsi ikin jatu yubaima i kaxun jatu yuikin:

—Jehován na mae samama yamawaikiaki, jatun chakabuwen kupikinan. Bestentan nenua jawaida bukanwen— jatu wa jawen jancha ikunwanbuma jatu kaxe wai dabanen ikaibun

15 penaya Jehován nai tsumabun Lot nichinkin yuikin:

—Menan jawaida butudiwe. Bututan min ain inun min ainbu bake dabe na min jaya jatu paxa wai chai kaditanwen, na mae nun kupiaya man mawakatsi ikamadan— akabu 16-17 Lot jaska wabu kai yane kain kainama niti itan itanaya Jehová Lotwen nuiaya Lotin meken inun jawen ainin meken inun jawen bake dabetun meken nai tsumabun jatu metsuntan mae anua jatu taxnimabain nichintan yuikin:

—Man mawayamanun paxakanwen. Kai nasaukeama nedidi ana uianma inun napanpanan niti ikama butankanwen, matu yamawadiatidukidan. Ja mati anu paxai jiwei bukanwen— jatu akabu 18-20 datekin Lotin jatu ea akin:

—En xanen ibubuun, ea jaska wayamawe. Ewen nuikin ea duawakin man ea medabewaii, en mawayamanunan. Napanpa anua en paxatidumaki. Ja mati anu kai chakabun ea achiken en mawatiduki. Uinkanwen. Ja mati tenanman anu mae pishta jayaki, chaimadan. Janu en paxatiduki. En jiwea mekeidan, ¿ja mae pishta anu katanpa?— jatu wa 21-22 jabu betsan ana yuikin:

—En ninkaii. Jaska min shinankin nuku yukaidan, peki. Ja mae pishta en yamawatidubia en ja meamaki, jaska min nuku yukayadan. Janua miadan, menan jadi jawaida kainditanwen, paxaidan. Min jadi jikidiamaken ja maewan en meyuamaki— jatu anikiaki.

Jaskawen taexun ja maedan: “Sóarki”, akin kenanibukiaki, nukun janchawen yuikin: “Mae pishtaki”, jawen kenadan.

23 Ma badi chaxaya Lot Sóar anu jikiken 24 Sodoma maewan inun Gomorra maewan anu Jehová Diosun chi inun bui menuai ui keska watan nai anua jatuki puta 25 mae inun napanpa inun yudabu inun inabu inun miban dasibi yamawanikiaki, jatu menukin keyukinan. 26 Jakia jatu jaska waya Lotin ainen jawen bene chibain Diosun nai tsuman yuiai ninkabiabaina Lotin ainen uinkatsi iki nasaukekaun uiain jaskabiama jawen yuda dami tewenikiaki.

27-28 Jabias xaba penaya Abraham butukaini kai janua Jehová Diosbe janchashinanu kai jikia nixun Sodoma maewan inun Gomorra maewan anu napanpa dasibi uinbaunkin jawen chi kuin bai ichapa kuabu keska binuan kuinjaidai uinikiaki. 29 Januxun ja maewan dabe inun jawen napanpa menukin yamawadiama Abrahamkidi shinain jawen nuikin Diosun Lot jawen kupiti chakabuwen kupiama paxawaxunikiaki, ja mae anuadan.

30 Janua Sóar mae anu jiwea datei janu ikatsi ikama Lot kainkaini jawen ainbu bake dabebe ja mati anu paxaima yuda betsabu janu jayabumanu mishki kini tanpe medan jabu besti jiweyuabu 31-32 janua Lotin ainbu bake dabe yuinamekin yubakakin iyuatun shinantan maxku yuikin:

—Nukun ibudan, ma mestebuikiki. Na mae anu tsua juni jayamaki, nuku jatun ainwantidudan. Jaskas nun jiwetiduki. Nun bakeumaken nukun epan enabu jania patidumaki. Jaskaken nukun epa nun uva vino amatiduki, paenwantan nun chutamanunan. Jaskawen taea nukun epan enabu jau paxanunbunan— itan 33 januxun jabias meshu medan jatun epa vino amabu paenken jawen ainbu bake iyua dukun jikixun chutamatan kainkidanaya ainbu ma chuta Lotin jawa unanma ikaya 34 janua uxashini bestentan jawen bake iyuatun maxkudi yuikin:

—Uian. Ea dukun nukun epabe en chutanameshinaki. Ana na meshu betsatianan, ana vino amananwen. Januxun miandi jikixun chutamawe. Nuku dabetun bake wamananwen, jaskawen taea jau nukun epan enabu benuyamanunbunan— aka 35 ana meshu medan vino amabu ana paenken maxkudi jabe jikixun chutamatan kaianyan januxun betsa ashian keska wakin Lotin ana jawa unanmajaida idianikiaki. 36 Jatun ibu jaska wamai janubi ja dabe tuyaimabu 37 janua jaskaima iyua juni bake kaian kenakin: “Moabki”, anikiaki. Jaskawen taea na jabiatian jawenabu Moab nawabuki. 38 Janua maxkudi juni bake kaian kenakin: “Ben-amíki”, anikiaki. Jaskawen taea na jabiatian jawenabu Amón nawabuki.