—Xanen ibuun, ¿min juai?— jatu wa dami yuda kayabitan ja medanua Dios janchai:

—En juaii— ikaya Abrahamnen nemakin yuikin:

—En min tsumadan, ea bechipaikinan, ea binunbaini jawaida kayamawe. 4 Man jaska bechipaiaidan, ¿man juchukinun unpax matu bixuntanpa? Jaskatan ja ji utapan naman tsauyukanwen, juindukuinan. 5 En jiwe anu man ma juxuki. Eadan, en matun tsumaki. Man ana punu kushinun piti bixun matu pimayunun manakanwen, janua juindukuntan ana butankanxunan— jatu wa

—Jaska min nuku waidan, peki— akabu 6 jawaida jawen jiwetan jikitan jawen ain Sara yunukin yuikin:

—Menan jawaida 20 kilo xekiwan dudu pepa bitan misi ea waxunwen— aka 7 janua jawaida ina awa mapua anu kushikaini kaxun jawen bake pepa babupa bechitan achitan bexun jawen tsumabu yuikin:

—Jawaida bawakanwen— iwanan jatu inan 8 jawaida bawaxunabu awa chuchu inun, misi inun, nami bexun jatu tsauxuntan ji utapan naman nixun jatu uian pikin menetan 9 Abraham yukakin:

—¿Min ain Saradan, janimen?— akabu

—Tadi jiwe uke medanki— jatu wa 10 ana betsan yuikin:

—Chanima ana badi betsa binutan juxun en mia medabewaya min ain kayabi Saran juni bake bixanikiki— aka

11-12 Abraham mestebujaida inun jawen ain Sara yuxabujaida ana jimi ikamawen taea uke medan tadi jiwe medanua dayakin janchaibu Saran ninkatan jawen juinti medans jawen shinanen usain:

—En bene mestebujaidaki. Eadan, en yuxabuki. ¿Jaska dabe ana benimai chutanamekin nun bake bitidumen?— ikaya 13-14 januxun jaska Saran shinain Jehová Diosun unankin Abraham yuikin:

—¿Jaskai Saran nuku ikunwanma usanmenkain: “¿En yuxabubia en bake bitan kainxanai?” ikidan? Eadan, en jabia matun mekenika Dioski. Eadan, Jehová kushipajaidatun jamapai shadabu en atiduki. Chanima en mia axuntiduki. Ana badi betsatian ana juxun en matu uinyuaya en kushipawen Saran juni bake bitan jayaxanikiki— aka 15 Sara datekin padantidu dabanen yuikin:

—¡En usanmadukain!— ikaya januxun Jehová Diosun ana kemakin:

—Jaskamaki. En unaiin. Min usanxuki— akin Sara yuinikiaki.

16 Janua ja junibu benitan Sodomakidi uin bui jadidi buaibu jatu uinmanun ika Abraham jatube kai bai puchininxun buaibu jatu nichin kaya 17-18 janua Jehová Diosun shinankin: “Abrahamnen enabu pa wakin en jatu ichapa waxanaii. Abrahamwen taexun yuda xukuabu dasibi en jatu pepawaxanaii. Jaskawen taexun jaska Sodoma inun Gomorra anu en aki kai en Abraham junetidumaki. 19 En Abraham katuawen taexun chipu jatundi jawenabudi en yunua chibankin jatu yunua pepakin kaneama chibainbu jaska en janchaxu eandi Abrahamwen taexun en jatu medabewakin axunpakexanaii”, itan 20 januxun Jehová Diosun Abraham yuikin:

—Chanima Sodoma nawabu inun Gomorra nawabu chakabujaidamisbuki. Jabu ichakanikanamei kunyan iki sinatanamemisbukiaki. 21 Jaskamisbu en ninkamis en jadi uin kaii. Jatun chakabu chanimamenkain en uinxanaii— aka

22-24 juni dabe besti Sodomakidi buaibun Jehová Diosun besuudi Abraham nixun jatukidi nemakin yukakin:

—¿Chakabubu inun pepabu jusia min jabiati jatu kupi keyuxanai? 50 juni pepabu besti Sodoma anu jayatidubuki. ¿Jati pepabu jayabiaken dasibi jabuya min jatube kupikin yama wai kai? 25 Min jatu jaska wayadan, chakabubu inun pepabu jabiaskas chakabu wamisbu keska wakin ¿min jatu tenan keyuxanai? Mianan, min jatu jaska watidumaki, juni chakabubu inun pepabu jabiaskas kupi keyukinan. Min mai jidabi anu uinikaki. Min pewanikawen taexun min jatu jaska yunuismaki— aka 26 Jehován yuikin:

—Peki. Sodoma anu 50 juni pepabu jayaken jabuwen taexun dasibi en jatu tenan keyuama ixanaii— aka 27 Abrahamnen ana yuikin:

—Uian. Min en Xanen Ibuken en jawaumajaidabia jatuwen nui en ana mibe janchaii. 28 50 juni pepabu jayama jakia 45 besti jayaken ¿dasibi min jatu yamawaxanai?— aka ana kemakin:

—Peki. 45 juni pepabu jayaken Sodoma nawabu jabuwen taexun en jatu kupiama ixanaii— aka 29 shinankubainkin Abrahamnen ana yuikin:

—40 juni pepabu besti jayamenkain— aka ana Jehován kemakin:

—Peki. 40 yuda pepabu jayaken jabuwen taexun en jatu kupiama ixanaii— aka 30 ninkamas ana ea akin:

—Eki sinatayamawe. Ana ea akin en mia ana yukaidan, ¿30 pepabu besti jayaken jabuwen taexun dasibi min jatu kupidiaxanai?— aka Jehován ana kemakin:

—Peki. 30 pepabu jayaken en jatu akamaki, kupikinan— aka 31 ana ea akin:

—Uinwen. En Xanen Ibuun, mia chikishwabiakin en mia ana ea akaii. ¿20 pepabu besti jayaken min jatu jaska waxanai?— aka Jehován ana kemakin:

—Peki. 20 pepabu jayaken jatuwen taexun Sodoma en kupiama ixanaii— aka 32 ana ea akin:

—Eki sinatayamayuwe. Ana bestiwakin ea akin en mia yukaii. 10 pepabu besti jayaken ¿jaskada min jatu wai kai?— aka Jehován ana kemakin:

—Peki. 10 pepabuwen taea jabuwen taexun Sodoma nawabu en jatu yamawama iki kaii— atan 33 Jehová Dios Abrahambe jancha menetan kaken jawen tadi jiwe anu Abraham chintunkidanikiaki.