—Eadan, en mekenika kayabi Dios kushipajaidaki, dasibi binun keyuadan. Jaskaken en bedubi en mia uianyan mianan, en jancha chibankubaini pepas aki jiwekunkainwen, chakabu meamadan— atan 2 Diosun ana jancha wakin:

—Uatian en mia jaska yubani min bababu wakin midimawakin en mia jatu pajaida wamaxunxanaii— aka 3-4 Abramnen Dios kenjaidawai jawen beyawen taea main beua beti ika dakaken Dios ana jabe janchakunkainkin yuikin:

—Ninkawe, en mibe yubakaidan. Eanan, en mia yubaii. Miwen taexun minabu xukua betsa betsapabu ichapajaida en jatu pajaidawaxanaii. Janua miadan, min jatun xenipabu inunbadiaii. 5 Jaskaken min kena Abram mia ana jawen kenabumaki. Minabu xukua betsa betsapabu en mia bawama min jatun xenipabu ixanaiwen taea min kena betsa bena wakin: “Abrahamki”, akin mia kenaxankanikiki. 6 Minabu pa wakinan, midimajaida jatu wakin jatu paxkakubainkin xukua betsa betsapabu en mia jatu bawamaxanaii, jatidi xanen ibu kushipabu wakinan. 7 Mia inun min bakebu inun min bababu inun dasibu minabus ipakexanaibu en jatukidi yubakadiaii, niti ikamadan. Ikis en min mekenika Dioski. Min ma mawaken chipu en jabun Dios idiaxanaii, jatu medabewakubainidan. 8 Canaán na janu min ikadan, mai pakea jidabi janu min jiweadan, jabiadi mia inun minabu en jatu ibu wamaxanaii, inankin yunukibi yunukinan. Min mawaken en jatun mekenika Dios ipakexanaii, jatu medabewanun ikadan— iwanan,

9 Diosun Abraham ana yuikin:

—Mianan, ninkawe. Jaska en mia yuiai chibanpaketi ninkawe, mia inun minabus, jau apakexanunbunwen, kaneama niti ikamadan. 10 Eska en matu yubaii, ja chibankin man apakexanunbunan. Juni tibi jawen jina kubichi nupewen bikin jau mextekubainxanunbunwen. Min jatu jaska waiwen taexun minabundi chibankin jau apakediaxanunbunwen. 11 Mia dukun min jina kubichi jau mia mextenunbunwen, bikinan. Man jaska waiwen taexun en jancha man chibankatsis ikai en unanxanaii, jawen matu unanti wai en matube ketaxameadan. Jaska wapakexankanwen. 12-13 Na jabiatian unudi man jiwekainaitianan, matun juni bake kaian manakin ma 8 xaba kaken jau jawen jina kubichi mextekin bikubainunbadinunbunwen, minabun bakebu inun matun dayadubu esclavon bakebudi jabiaskadi wakinan. Ja inun, ikis matun dayadubu jaya inun chipu nawa betsa anua peiwen taexun man bia matun dayadu esclavo jabudi jau jawen jina kubichi mextekin bidiakubainxanunbunwen. Jatun jina kubichi biaibuwen taexun jaska en mia jatube yubaxu minabu en unanti wai shinandiakubainxankanikiki, niti ikamadan. En mibe jaskai jiwekunkainxanai jawen unanti wati en mia yubaxuki. 14 Janua tsuada matube jiwea junin jawen jina kubichi mextekin biamaken jau janu matube jiweyamanunbun jatu nichinxankanwen, en matube yubakani akin chibanmakenan— atan

15 —Min ain Saraidan, ana jawen kenawen kenayamawe. Na jabiatian taewakin jawen kena bena watan kenakinan, Sara wakin kenakubainwen. 16 Sara duawakin en pepawaxanaii. Jaki en mia juni bake inanxanaii. Januxun duawakin Saran bakewen xukua betsa betsapabu jawenabu wakin en jatu waxanaii, xanen ibu ichapabu kushipa wakinan— aka 17 Abrahamnen ninkatan main beua beti ixun ikunwanma juinti medans usan tenea dakaxun shinankin: “¿Juni 100 badiyatun ana bake en bawatidumen? ¿Janua Sara 90 badiyatun bake bidiatidumen? Jaskatan nun jaskatimaki”, itan 18 jawen bake Ismaelkidi shinankin Dios yuikin:

—Jaskaken en bake Ismaelkidi min yubatiduki, jiwekainkin min pepa jau chibanunan— aka

19 Diosun ana yuikin:

—Jaskakidi min shinainkidi en janchamaki. Min ain Sara kayabitun bake bixanikiki. Bake bia juni bake kainxanikiki. Januxun kenakin: “Isaacki”, axanwen. Jabe besti en yubakaxanaii. Jawenabu pakubainaibu jatu medabewapakexanun ika Isaacbe besti yubakakin en kanetimawaxanaii. 20 Ismaelkidi min ea yuiai en ninkaxudan, uinwen. Ismaeldan, en tadi duawadiaxanaii. Jawenabun bakebu jatu pawakin ichapajaida jatu wadiakin 12 xanen ibubu kushipa idiaxankanikiki, jawen taea jawenabu ichapa kushipa tadi jayadiaidan. 21 Jakia min ain Saraki min bake waima badi betsan juni bake kaianan, Isaac bestibe en yubakadiaxanaii— akin 22 jancha keyutan Dios Abraham anua kainkainaya

23 jabias xabatian Diosun Abraham yubaxu Ismael inun, juni dasibi jatube jiwea juni bake kainmisbu inun, peiwen jatu bitan jatu esclavo wani Abrahamnen jatu ichawaxun jatubetan jatun jina kubichi mextekin ichapa jatu bipakenikiaki, jaska Diosun yunushina chibankinan. 24 Janua Abraham 99 badiya inun, 25 Ismael 13 badi jayakenan, 26-27 januxun jabiatiandi Abraham inun jawen juni bake Ismael jatun jina kubichi bitan juni dasibi Abrahambe jiweabudi jatun jina kubichi mextekin jatu bidianibukiaki.