—Uinwen. Min ea bake wabiapanan Jehová Diosun ea bake bimama ea nemamiski. Jaskawen taexun en shinain en mia yuiaii. En dayadu esclava jayaki. Agar bixun ja chutakin ea jaki bakewaxunwen. Peiwen Agar en dayadu tsuma en waniwen taexun jatun bake bibia ena ixanikiki, jakia en juni bake jayatidumenkainan— aka jawen bene Abramnen jawen ain Sarain jancha ninkakin:

—Peki. Jaska min ea yunuai en mia axuntiduki— ikaya Sarain jawen dayadu esclava Agar jawen bene Abram yunuaiwen taexun 4 Abramnen Agar jubuntan bake wa Agarin bake bishinxun ma tuya unain: “Ma en bakeyaki”, ikin ja dayaxunmis Sarai ana bechipaiama danain: “En ma binuaki”, ika jaki padanai kaxeaya 5 janua Sarai Abramki sinatakin yuikin:

—En esclava Agar en mia yunuimadan, min ja bake waima ea danankin yuankin chakabuwaiwen taea min mia chakabuki, en dayadubia bake bimawen taea ea danainkikidan. ¿Jadatu nun chakabu itidumen? ¿Min miamenkain? ¿En eadaka? Jadatuda Jehová Diosun besti nuku unantiduki— aka

6 Abramnen jawen ain Sarai daewanun, iwanan, kemakin:

—Uinwen. Miadan, min en ain kayabiki. Min dayadu esclavadan, minaki. Jawada min jaska pe shinain keska wakin jaska wawe— aka januxun Sarain jawen esclava Agar danankin ichakawa uintan paxai 7-8 mae betsa Sur bai kawen kai janu tsua jiweabumanu Agar paxashina jadi ja chacha dapi tsauken Jehován nai tsuma jaki nukutan yukakin:

—Agariin, min Sarain dayadu esclavaki. ¿Jadakidia min juamen? ¿Jadakidi min kai?— aka yuikin:

—En tsuma Sarai anua paxai en junekidanshinaki— akin yuia

9 Jehován nai tsuman Agar ana yuikin:

—Jadidi ana kama nenua chintundikainwen. Min dayaxunmistun jancha ninkakin jawen yunua axundikubaintanwen— atan

10-11 —Dateyamawe. Min bakewen taexun minabu pakubainaibu en jatu ichapa wadiaxanaii, tsuan jatu tanatidumawadiakinan— atan —Uian, ja min tuyadan, min juni bake kainxanaii. Min tsumapan mia ichakawaya Jehován min bika teneai ninkaiwen taexun min bake kenakinan: “Ismael”, waxanwen. 12 Ja min juni bake ewatan tsuan mekin daewakin yudanwantiduma keska ixanikiki, yuinaka ni medan jiwea jawen yuda caballo keska pubenan. Jaska keskadiai dasibibuki jatuki sinataya jaki sinatadiakubainxankanikiki. Ja inun, jawenabu mestenepa wakin jatu kushipa Diosun waniken janua tsuanda jaki sinatabiakin jawa maematidubuma ipakexankanikiki— aka 13 Agar Diosbe janchaxu shinankin yuikin:

—Diosun ea uinbiaxu mawama en jiweyuaki. Jaskawen taexun na nenu kenakinan: “Diosun uiainki”— akin Agarin kenanikiaki. 14 Jaskawen taexun mae Cadés inun Béred ja dabe namakis unpax chacha kenakin: “Jamebi Jiweatun Ea Uinmistun Chachaki”, akin kenakin ani jaska yuimisbuki. 15-16 Janua Agar paxashina chintunkidan jawen tsuma Sarai anua jawen juni bake kaian Abram 86 badiyatun kenakin: “Ismaelki” anikiaki.