—Abramneen, dateyamawe. En min mekenantun benimawakin en mia duawakin ewapa waxanaii— aka 2 Abramnendi yuikin:

—Jehová Diosuun, ¿ea medabewakin jawa min ea inantidumen, ea benimawakinan? En ain kayabi anua juni bake min ea inainsma en jawa jayamaki. Jaskakenan, en tsumabu mekenika Eliézer jawen mae Damasco anua enabumabiatun en mawaken ena dasibi ibu waxanidaka, xanen ibukinan— iwanan, 3 ana yuikin:

—Uinwen. En ain kayabiki min ea juni bake inanmaken en tsuma en jiwe anua kainitun en jamapai dasibi ibu waxanikiki, xanen ibukinan— aka

4 ana Jehová Diosun kemakin:

—Jaskamaki. Madiastun min jamapai ibu wama ixanikiki. Jakia juni bake min bawa kaian ewatan jatun dasibi ibuai xanen ibuxanikiki— iwanan,

5 ana taxnimabain jemaintin Abram iyuxun Jehová Diosun yuikin:

—Nai beiskin bishi tanawe. Min tana keyutidumaki. Jabiatidi minabu pakubaini jaskanunbadikanikiki— aka

6 Abramnen Jehován jancha ninkakin ikuainwen taexun Jehová Diosun jakidi shinankin yuikin: “Abram juni chakabuma pepaki”, itan

7 ana yuikin:

—Eadan, en Jehováki, Diosdan, na mai min bixanun mia inankatsi ikin min mae Ur Caldea mai pakea anua en mia iweniki— aka

8 —Jehová Diosuun, na mai en ibu waxanaidan, ¿min ea jawawen unanti wamakin mestenwanmai en jawen unanunan?— aka

9 Diosun ana yunukin yuikin:

—Ina awa yuxan babupa 3 año jaya inun, cabra yuxan 3 año jaya inun, chaxuwan bene 3 año jaya inun, deiwan inun dei kudu katutan ea bexunwen— aka

10 jaska yunua axunkin Abramnen Dios kenwankin inankatsi katutan yuinaka bexun tesentan jabu tibi namakis bais abainbainxun kekunbainkin ukedi janakin ukedi janakin namakis bai tapintan janua peiyabu bais akama tenyenxke bestixun janaxuna 11 ishmin bunikin pinun ika butuaibun januxun Abramnen jatu bamaya 12 janua badi ma jiki chaxakaini meshuaya Diosun Abram uxanchakayama namakin uianyan meshun achibidana datejaidaya 13 Jehová Diosun Abram ana yuikin:

—Minabu eskai jiwexanaibu bebunkidi en mia unanmai ninkawe. Nawabun mai pakea betsa anu buabu jadixun jatun bakebu esclavo waxankanikiki. Jatu jaska watan jadixun jatu ichakawakin 400 año minabu jatu dayamaxankanikiki. 14 Jatu jaska waibu uintan eandi jatu unanti watan en jatu kupixunxanaii. Jabun jatu ichakawaibu nawabu en jatu kupixunaya minabu kainbaini paxaxankanikiki, jatun mabu ichapa bibaini buidan. 15 Jamen mia ikidan, jaskadiabuma unanuma jiwea anibujaidai min mawa mia maiwabu minabuki min jatuki nukuxanaii. 16 Jakia ja mai pakea anu minabu jikitan jatun ibuwen 4 xenipabu pakea tibi jiwekubainaibutian jabun bakewakubainaibu ewatan jabiatiandi 400 año binukainaya minabu jadi jiwea jatu ichakawabu en jatu paxawa minabu Canaán anu nenu jabianudi ana jiwei chintunbidani benunbadikanikiki. Janua Amorreo nawabu na nenu jiweabudan, jatun chakabu pikujaidadiabumaken en jatu kupinunbadiai en manayukubainxanaii— aka

17 ma badi ka meshujaidaya ina yuinaka detea bais axun manchinbaina namakis chi jede keska kuinjaida taxnitan jede ji ji ichakayamai binu binu ikaya 18-21 jabiatiandi Jehová Diosun Abram yubakin yuikin:

—Egipto anu paxkuwen pakea inun jene ewapa jawen kena Éufrates namakis na mai jidabi minabu en jatu inankin ibu wamanunbadiaii. Quenita nawabu inun, Quenizita nawabu inun, Cadmoneo nawabu inun, Hitita nawabu inun, Ferezeo nawabu inun, Refaíta nawabu inun, Amorreo nawabu inun, Canaán nawabu inun, Gergeseo nawabu inun, Jebuseo nawabudan, jabu jiwebiabun jatu kainmakin mebintan minabu janu ja mai en jatu ibu wamaxanaii— anikiaki.