Jawen beden Lot achibainshinabu Abram mebikinantanikiaki, na janchadan
14
1-2 Na jabiatianan, Sinar nawa xanen ibu Amrafel inun, Elasar nawa xanen ibu Arioc inun, Elam nawa xanen ibu Quedorlaómer inun, Goím nawa xanen ibu Tidal jatun piayabube jatuki dasitan sinatakin Sodoma nawa xanen ibu Bera inun, Gomorra nawa xanen ibu Birsá inun, Admá nawa xanen ibu Sinab inun, Seboím nawa xanen ibu Seméber inun, Bela mae jawen kena betsa Sóardan, xanen ibu tibi jatun piayabubetan jatu detei bekin 3 Sidim napanpa anua jawen kena Mar Muerto, nukun janchawen Ianenwan Batapa, dapi ja 5 xanen ibubu jatun piayabube ichaxun mananibukiaki. 4 Quedorlaómerin 12 año ka xanen ibukin dasibi jatu tsuma wanixun ana badi betsatian jatu ichakawaya ana xanen ibu wakatsi ikama ana duawabuma 5-6 ana badi bestichai ka Quedorlaómer inun xanen ibu betsa 3 jatunabubetan shinantan nawa betsa betsapabu detenamekin 5 mae maemakin detetan ja tibi jatu tsuma wanibukiaki. Astarot Carnaim anu kaxun Refaíta nawa tsuma watan Ham mae anu kaxun Zuz nawa tsuma watan Savé-quiriataim mae anudi kaxun Emita nawa tsuma watan Seír Mati anu kaxun Horeo nawa tsuma wakin detekin jatu chibanbaini El-parán anu jadi tsua jiweabuma anu dapikea 7 jadi chintuntani bekin Quedorlaómer inun jabun medabewaibu En-mispat jawen kena betsa Cadés anu jikitan tsuada Amalec nawabuki nukutan jatu dete keyutan Hasesón-tamar mai pakea anuxun tsuada Amorreo nawabukidi nukutan jatudi dete keyunibukiaki.8-9 Januxun 5 mae xanen ibubun jatun piayabubetan Sodoma nawa xanen ibu inun, Gomorra nawa xanen ibu inun, Admá nawa xanen ibu inun, Seboím nawa xanen ibu inun, Bela nawa xanen ibu medabenamekin detekin jatu nemakatsis iki napanpa Sidim anu ichaxun manaibun janua Quedorlaómer inun, Tidal inun, Amrafel inun, Arioc besubukuan mapuabu jabu 4 xanen ibun maedan, Elam inun, Goím inun, Sinar inun, Elasardan, jabu jatun piayabube bei detenamenibukiaki. 10 Janua Sidim mae anu janu napanpa ja medibi bui chaxka xantu ewapa ichapa jayanikiaki. Janua detenamekin jatu maemabu Sodoma nawa inun Gomorra nawa xanen ibu ja dabe uinun ika kushibaini ja xanen ibu dabe paxai ja kini ja medibi bui chaxka xantuki pukua mawaibun xanen ibu betsabu mati anuadi ni medan paxai idudianibukiaki. 11 Jabun jatu detekin maemaxu Sodoma inun Gomorra mae anu jikitan jatunabu betsa achitan jatun mabu pepa inun jatun piti biantan 12 Abramnen betsan bake Lot jawenabube jiwea jatu achidiatan jawen mabu inun jawen inabuya jatu buanibukiaki. 13 Janua Mamré Amorreo nawa xanen ibu jawen mae Mamré ni xukua medan jiwea Mamré inun jawen betsabu Escol inun Anerdan, Abram jatun jaibuwen taea janua juni bestichai june paxa juxun jaska detenamebainshinabu Abram Hebreo nawa yuinikiaki. 14 Janua jaska Lot achidiabainshinabu Abram banabima ninkatan Abramnen jawen tsumabun bake pawaimabu jawenabu keska detenamenikabu jatuki chiti ikain mebikinantanun ixun jau jabun medabewanun 318 junibu jatu ichawatan jawen jaibuaibudi Amorreo nawa detenamenikabu jabu dikabi ichawadiatan Lot ibukin jatun tae tanabaini bukin Dan mae anua june jatu bechitan 15 janua meshu medan jatu binuxun kushibidan janu maniabu anu jikixun jatu deteaibun datepaepai jatidi betsabu kushibainaibu jatu chibanbainkin detekubainkin Hobá mae Damasco mae ewapa besuudi nortekidi jatu chibankubainkin jenetani 16 Abram junibun jatu putamatan Lotin mabu inun jawenabu ainbu inun juni iyushinabu jatu mebinkinantan januxun mae dabetunadi jatun mabu inun jawenabu mebikinantan ana jatu iwenibukiaki.
Melquisedecin Abram duawakin pekidi yuinikiaki, na janchadan
17 Quedorlaómer inun xanen ibu betsabu dete keyutani Abram ana chintunkidanaya Sodoma nawa xanen ibu kai Savé napanpa anu jawen kena Xanen Ibun Napanpa janu Abramki nukua 18 Salem xanen ibu Melquisedec Dios dasibi binu keyuabe jawenabu janchaxunika jadi jawen tsumabu kadiakin misi inun uva vino buxun Abram inun jawen jaibuaibu jatu pimatan 19 Abram Melquisedecin pepawakin yuikin:
“Dios dasibi binu keyua nai inun mai jidabi damiwanitun
jau mia duawakin pepawakubainunwen.
20 Dios kushipajaida dasibi binuatun miki sinataibu
min jatu maemanun mia binumakin medabewashina
ja besti kenjaidawananwen”,
aka Abramnen mabu mebikinanshina Melquisedec inanun, iwanan, mabu betsa betsapa jusia décima parte Melquisedec jamen inankuian binikiaki. 21-24 Januxun Sodoma nawa xanen ibun Abram yuikin:
—Mabu dasibidan, minaski. Janua yudabudan, jabu besti ea inanwen— aka Abramnen kemakin:
—Jaskamaki. Dios kayabitun nai inun mai jidabi damiwani ma en jabe yubakakin: “Jatun mabu en biamaki”, en ishianki. Januxun min jawada en mia bianyamawen taexun min ekidi yuikin: “Abram en mabuwanyan wayamaki”, iwanan, min jatu ekidi yuitiduki. En mia nemaii. Mabudan, en bikatsi ikamaki— iwanan, yuikin: —Jawada enabun ma piabu inun en jaibuaibun ebetan deteshinabu jatun manakuti jau jabun binunbunwen, Aner inun, Escol inun, Mamrénan, jabunadan— anikiaki.