Abram inun Lot paxkanibukiaki, na janchadan
13
Janua Egipto anuxun nichianbu kai nortekidi Abramnen jawen ain inun, jawen betsan bake Lot inun, jawen tsuamabu inun, jawen jamapaiya kakin jatu iyui Négueb mai pakea anu chintunikiaki, 2 Abram mabuwanyan mane oro tashi chaxakapa inun, mane plata juxupa chaxakapa mane juxupa inun, mabu ichapa inun, inabu ichapaya buidan. 3-4 Janua ana nortekidi Betelkidi bui jiwekunkainkin uxe tibi nichinkubaini bui atimas janu dukun Canaán mai pakea anu jatun bichi jiwe nichini anu Dios kenwankin mishki manchinkin ichawatan januxun dukun kenwani anu ja mae dabe Betel inun Ai namakis anu ana jikitan jabianuxundi Abramnen ana Jehován kena yuikin kushipa yukatushinikiaki.5 Janua Lot Abrambe kayama jadi mabuyai jawen inabu ichapa inun jawen tsumabu ichapa jabe jayaken 6 dasibi ja dapi jabe jiwexun jatun inabu ichapatun basi jawaida pikin keyuaibun jatun tsumabun jawen inabu jania pimatima 7 Abramnen tsumabun inun Lotin tsumabun inabu pimanun ika yaushinain jatube ja iki detenameaibun jabianudi Canaán nawabu inun Ferezeo nawabu jabias maewanu jatun inaya jiwediabun jaskawen taea basi ichapa jayabia damaken 8 januxun jawen betsan bake Lot Abramnen yuikin: “Epaan, min enabi kayabiki. Jaskawen taea ja ikadan, chakabuki. Jaskayamananwen, nukun ina mekenikabu mina inun enabubedan. 9 Jaskaken mai jamen ikikiki. Nuku dapikea jadatuda mai pepa uintan katuwe, janu tadi jiwetanxunan, ea dapaxkabainan. Janua min nortekidi kaya ea kaidan, surkidi en kaxanaii. Janua min surkidi kaya ea kaidan, nortekidi en kaxanaii. Mianan, ja dukun mian janu min unanuma jiwexanai benabaunkin uinbaunkin jadatuda mian dukun katuwe”, aka
10 Lot nixun benakin uinbaunkin Jordán jene napanpa Sóar mae pishta anu dapi uinkin basi inun jene pepa bechinikiaki, Egipto paxku kexa bai pepa keskadan. Ja jabiatianan, Diosun Jordán jene napanpa mae dabe Sodoma inun Gomorra nai anua chiwen menudiamaken 11 Jordán jene napanpa bechipaikin katutan Lotin jawenabu badi juaikidi jatu iyunikiaki, jatu janu jiwemakinan. Jaskai Abram inun Lot paxkanibukiaki, tadi jiweidan. 12 Canaán mae anu mananan Abram jiwea Sodoma dapi napanpa anu Lotin jawen tadi jiwe watan jiweyunikiaki. 13 Janua Sodoma nawabu jiweabudan, junibu chakabu atimapajaidakin Jehová Dios danain chakabukubainibukiaki.
14 Lot ma kaken Jehová Diosun Abram yuikin: “Janu min nia anuxun uinbaunwen, nortekidi inun, surkidi inun, badi juaikidi inun, badi kaikidi uinkinan. 15 Ja mai jidabi min uiain inankin en mia ibu wamaxanaii, mina inun minabu paibudan. 16 Ja inun, ean minabu pakubaini midimaibu mashiti tsuan tanatiduma keska en waxanaii. Minabu pakubainaibu tsuan jatu tana keyutiduma inunbadikanikiki. 17 Janua benia nixun mai jidabi uinbaunwen, jawen jaxpa inun jawen chaipadan. Ja min uiainan, en mia ja ibu wamakin inanxanaii”, aka 18 janua Abramnen jawen tadi jiwe jawen tsumabu pekamatan bekubidankin Mamré ni xukua medan jatun tadi jiwe ana nichintan jiwenibukiaki, mae Hebrón dapidan. Januxun mishki chi tapu wakin mishki ichawakin maspu watan Abramnen januxun Jehová Dios kenwanikiaki.