Diosun Abram katuxun nichinikiaki, na janchadan
12
Januxun betsatian Diosun Abram yunukin yuikin: “Min mae anua kainkainkin minabu xununbainkin paxkabainwen. Min mai jenekin min epan enabu jenekin min epan jiwedi jenebainwen, jadi min jiwexanai anu en mia uinmaxanai anu kakinan. 2 Miwen taexun minabus pawakin nawa xukua betsa ichapa kushipa wakin en tadi jatu jiwemaxanaii. Pepawakin duawakin en mia medabewapakexanaii, min kena jatu unanma akeakekinan. Miandi min jatu pepawadiaxanaii. 3 Januxun tsuanda mia pepawaya en jatudi pepawaxanaii. Jakia tsuanda mia chakabuwakin yupuwaya jatu kupikin entsedi en jatu mia yupuxunkubainxanaii, manakukinan. Ja inun, miwen taexun nawa betsa betsapa mai jidabi anu xukua jiwebaunabu dasibi en jatu pepawadiaxanaii”, aka4-5 Diosun yuia ninkatan 75 año jaya Abram Harán anua kainkaini kakin jawen ain Sarai iyui inun jawen betsan bake Lot iyui inun jawen tsumabu midima ibu wakin binixun jawen jamapai tibi jatu bumai Harán anua Canaánkidi uxa ichapakunkaini bui 6 atimas mai pakea betsa Canaán anu jikitan surkidi bui Siquem maewan anu jikitan Moré ji xukua mapua dapixun januxun yushibu kenwanmisbu dapi jiwetushiyunibukiaki, janu Canaán nawabudi jabias maewan anu jiwediabu anudan. 7 Jehová Diosun Abram nichian kashian yuikin: “Na mai pakea jidabi minabu pakubainaibu ibu wamakin en jatu inanunbadiaii”, aka ma janu ana jaki nukuawen taexun Abramnen Jehová kenwanun, iwanan, mishki chi tapu wakin mishki ichawakin maspu watan janu chiwen kuakin chaxuwan bake bene pepa textexun jimi jaba watan januxun menukin keyukin Jehová Dios kenwanikiaki. 8 Janua badi juaikidi kai mati betsanu mati betsa Betel inun Ai mae betsa namakis jatun bichi tadi jiwe nichinshinabun januxun Abramnen ana Jehová Dios kenwanun ixun mishki ana manchinkin ichawatan Jehován kenawen ana kushipa yukakin kenwandianikiaki. 9 Janua jawen inapan piti basi benai surkidi unanxubida bui Néguebkidi janu eskadabes jiweabuanu bua ketanibukiaki.
Abram Egipto anu ka jiweyunikiaki, na janchadan
10 Janua ui ana ikamaken basi ana beneama Canaán anu janu jiwea anu piti yamaken Abramnen enabu bunijaidaibun Egipto anuabu piti jaya ninkatan Egipto anuxun piyutanun ika Abramnen jatu iyui 11 Egipto mai pakea anu nukui kai kemakin Abramnen jawen ain Sarai yuikin: “Uian, min ainbu jawenduajaidaki. 12 Egipto nawabun mia uinkin ea tenantan mia bitan mia besti jiwematidubuki. 13 Jaskaken jatu yuikin: ‘En puiki’, akin jatu ea yuixunxanwen, jau ea tenanyamanunbunan. Min jatu jaska wa ea duawaxankanikiki, ea deteamadan”, abaini
14 janua atimas Egipto anu jikishinken Egipto nawabun yuikin: “Ainbu jawenduaki”, ikaibun Abramnen yuishina keska wakin Sarain jatu yuikin: “En puiki”, jatu wa 15 Egipto nawabu xanen ibu bexmas betsa betsapan Sarai uinkin jatun xanen ibujaida Faraón yuikin: “Hebreo nawa ainbu jawenduajaidaki. Xanen ibu Faraónen jau binunwen”, iwanan, xanen ibujaida Faraónen jiwe anu iwexunabu
16 jaska wabainkin bimabu Saraiwen taexun Faraónen Abram duawakin chaxuwan inun, ina awa inun, asno inun, camello inun, ainbu dayadubu esclava inun, juni dayadubu esclavo inanikiaki. 17 Jakia Saraiwen taexun Egipto nawa xanen ibujaida inun jawenabus Jehová Diosun isin chakabu paepa jatu tenemaya xanen ibujaida Faraónen jatu yukabaunkin Sarai jawen ainkidi tapintan 18-19 Abram jatu kenama jua yukakin: “¿Min ea jaska wai? ¿Jaskakin min ea yuiama itushimamen, min ainkididan? ‘En puiki’, min ea wa en jiwe anu ea iwexunimabuki. ¿Jaskai min chani chakaimamen? Uinwen. Min ainki. Ana bitan iyui nenua kadiwe”, atan 20 jaki sinatakin jawen mekenikabu yunua Egipto anua Abram jawen ain inun, jawenabu inun, jawen tsumabu inun, dasibi inainmaya nichinibukiaki.