Janua eskatian mai jidabi anu paxkadiabumajaida yuda dasibi janus jiweabutian jatun jancha jabianwens janchapaunibukiaki. 2 Badi juaikidi bukubainkin atimas Sinar anu mai pepaki nukutan bai wati pepa anu janu maewaima paxkadiama jiwea 3 yuinamekin shinankin: “Ja jiwe wati na mai bawananwen, chi ichapawen bawakin kushi wakinan”, ixun jiwe wati mishki yamaken mishki keska wakin jiwe wati mai bawa midimawaxun bui chaxkawen tsamakubainkin 4 ana yuinamekin: “Mae ewapa wanankanwen. Januxun mae namakis anu januxun uinti jiwe tapaitiya wabainkin keyatapajaida wakin tsamakubainkin nai medan jikiti wanankanwen, jaskawen taexun dasibitun jau nukun uinti jiwe jawendua jau shinankubainxanunbunan. Jaskai jiwei mai jidabi anu nun paxkama ixanaii”, ixun 5 dayakin nai anu jikiti keyatapa mai bawa tsamabainkin taewabainaibun Jehová Diosun jatun daya uinkin 6 yuikin: “Uian, dasibi jabias yudabudan, jatun jancha jabiaski. Ibubis unanepakin jaska daya taewaxun jamapai shadabu shinankin atidubuki, pepa inun chakabudan”, iwanan, 7 ana yuikin: “Jatu anu butuxun jatun jancha paxkananwen, jancha betsa betsapaya wakinan. Jaskawen taea jau ana janchai ana ninkakananyamanunbunan”, itan 8 jatu jancha paxkakin betsa betsapa wa mai jidabi anu jau paxkanunbun Jehová Diosun jatu betsa wa mae ewapa wabiai jatun daya jenebainibukiaki. 9 Januxun Jehová Diosun jatun jancha ninkatima wakin itimaska wa xuku tibibaini paxkabainibukiaki. Ja mae anuxun jatu jaska wawen taexun jatun mae kenakin: “Babelki”, anibukiaki, nukun janchawen yuiadan: “Jancha Betsa Betsapa Junea Ninkatimadan”, akinan. Januxun Babel mae jidabi anua Diosun jatu paxkakin nichian akeakenikiaki, Noén enabu pawakinan.