Noén enabu jatu tanakubainibukiaki, na janchadan
10
Janua jidi jenen jatu achitan netsuniken Noén bakebudan, Sem inun, Cam inun, Jafet jabudi jiwekainkin jatun bakebu inun jatun bababu bawai jiwei pai eskanibukiaki. 2 Jafetin juni bakebu kenakinan: “Gómer inun, Magog inun, Madai inun, Javán inun, Tubal inun, Mésec inun, Tiráski”, anibukiaki. 3 Gómerin juni bakebu kenakin: “Asquenaz inun, Rifat inun, Togarmáki”, anibukiaki. 4 Javánen juni bakebu kenakin: “Elisá inun, Tarsis inun, Quitim inun, Rodanimki”, inibukiaki. 5 Jafetin jawen bakebu ianenwan kexa betsa anu buxun dasibibun ibu wai xuku tibi jatun jancha betsa wakin jatu paxka akeakenibukiaki.6 Camnen juni bakebu kenakinan: “Cus inun Misraim inun Fut inun Canaánki”, anibukiaki. 7 Cusin juni bakebu kenakin: “Sebá inun, Havilá inun, Sabtá inun, Raamá inun, Sabtecáki”, anibukiaki. Raamán juni bakebu kenakinan: “Sebá inun Dedánki”, anibukiaki. 8-9 Januxun ana Cusin juni bake bawaima kaian kenakin: “Nimrodki”, ani Nimrod ewatan ja dukun xanen ibui taei kushipai Jehován medabewaya Nimrod dekuyajaidakin yuinaka ichapa tsakapaunikiaki. Jabiatiandi Nimrodkidi shinankin juni betsan jawenabu kenwankatsis ikin yuikin: “Jehován mia medabewaya min dekuyajaidadiakunkainxanaii, Nimrod keskaidan”, akin jatu yuipaunibukiaki. 10 Sinar mai pakea anu Nimrod xanen ibui taekin jawen maewan tibi Babel inun, Érec inun, Acad inun, Calné ibu wanikiaki. 11-12 Sinar anua maewan betsa Asur anu kaxun mae bena wakin kenakin: “Nínive inun, Rehobot-ir inun, Quélah inun, Resenki”, aka Resen mae ewapajaida Nínive inun Quélah namakis ketaxameakiaki.
13-14 Camnen bake Misraimnen juni bake ichapa jatu bawakubainima jabu pai jawen bababu xukukubainaibu kenakin: “Ludeo nawabu inun, Anameo nawabu inun, Lehabita nawabu inun, Naftuhíta nawabu inun, Patruseo nawabu inun, Casluhíta nawabu inun, Caftorita nawabuki”, anibukiaki. Casluhíta nawabu pakubaini jatu anua xuku betsa maei Filisteo nawabu paxkai keyuni pakubaini jabianudi jiwekubainkanikiki.
15-18 Janua Camnen bake betsa Canaánen juni bake dabe bawani ja dukun Sidón inun ja kachu Het inibukiaki. Jawen bababu betsa betsapa jiwea akeakexun bake bawai xukui pajaidanibukiaki, Jebuseo nawabu inun, Amorreo nawabu inun, Gergeseo nawabu inun, Heveo nawabu inun, Araceo nawabu inun, Sineo nawabu inun, Arvadeo nawabu inun, Semareo nawabu inun, Hamateo nawabu wakinan. 19 Janua Canaánen baba betsa betsapabu jatun maewan kexa kesuakea Sidón mae ianenwan kexa betsa dapi anua kai Guerar binui Gaza anu yusmaudi chintunkauan Sodoma inun Gomorra anu ana yusmaudi chintunkauan Admá inun Seboím binui Lesa anu ana yusmaudi chintunkauana anu maewan Sidón anu jikia janu jiwepaunibukiaki. 20 Jaskai Camnen baba ikubaini jatun jancha betsa betsapawen taea mae xukua betsa betsapai paxkabaini bui mai pakea tibi ibu wakeaketan janua pai jabias yudabu jiwekubainmisbuki.
21 Ja dikabi Jafetin juchi Semnen bakebu bawanidan, Éberin bakebudan, jatun xenipabu Sem inikiaki. 22 Semnen juni bakebudan: “Elam inun, Asur inun, Arfaxad inun, Lud inun, Aramki”, akin jatu kenanibukiaki. 23 Semnen bake Aramnen juni bakebudan: “Us inun, Hul inun, Guéter inun, Maski”, jati jatu kenakin tananibukiaki. 24 Semnen bake betsa Arfaxadin juni bake bawaima kaian kenakin: “Sélahki”, anikiaki. Ja ewatan Sélahin juni bake bawaima kaian kenakin: “Éberki”, anikiaki. 25 Ja ewatan Éberin juni bake dabe bawa ja dukun kaian mai jidabi anu yudabu paxka akeakenibuwen taexun jawen bake kenakin: “Pélegki”, axun ana juni bake bawaima ja kachu betsa kaian kenakin: “Joctánki”, anikiaki. 26-29 Joctán ewatan 13 juni bakebu bawakubaini jatun kenadan: “Almodad inun, Sélef inun, Hasar-mávet inun, Jérah inun, Hadoram inun, Uzal inun, Diclá inun, Obal inun, Abimael inun, Sebá inun, Ofir inun, Havilá inun, Jobabki”, inibukiaki. 30 Joctánen juni bakebu dasibi Mesá mai pakea anua badi juaikidia Sefarkidi mati matipanua pai jiwepaunibukiaki. 31 Janua Semnen enabu jaskai jatun jancha betsa betsapawen taea mae betsa betsapa anu jiwenun ika paxka akeakenibukiaki.
32 Jidi jenen jatu achini ma netsuniken jaskai Noén bababu pai xuku betsa betsapai mai jidabi anu jiwenun ika paxka akeakenibukiaki, jancha betsa betsapawen jancha akeakeidan.