Dios Noébe yubakai eskanikiaki, na janchadan
9
Diosun Noé inun jawen bakebu duawakin yuikin eska wanikiaki. “Bake ichapa bawai ana pai mai anu ana iake iakebaunxankanwen, jiwebaunidan”, iwanan ana yuikin: 2-3 “Yuinaka pitibu inun pitibuma matuki datei dakenunbadikanikiki. Peiyabu nuyaibu inun, main mapuabu inun, jenen jiweabudan, ja yuinaka dasibi en matu ibu wamaii, dasibi matun piti wakinan. Ja dukun yunu besti en matu inaniki, man pinunan. Janua ikis yuinakadi inun yunu en matu inaiin, matun pitidan, ja pi man jiwepakexanunbunan. 4 Eska besti en matu nemaii. Yuinaka nami jimi kauanama piyamaxankanwen. Jamen jiminan, yuda jiwemamiswen taexun nami jawen jimiyabi piyamaxankanwen. 5-6 Eadan, en Dios en yushin itsa keska wakin yudabu en matu damiwaniwen taea tsuada pubenkin yuda kasmai yuinakapan yuda betsa tenankenan, manakukin juni betsandi jau ea tenanxunxanunwen. Jabun matu tenanbu unankin jakimama en jatu unanti wakubainxanaii”, itan 7 ana jatu yuikin: “Jakia matu jiwekinan, bake ichapa bawakin ana ichai pakunkainkin mai jidabi matakin ibu wapaxankanwen”, iwanan,8-9 Noé inun jawen bakebu ana yuikin: “Matu inun jabia matuwen pakubainxanaibu chanima en matu yubaii, jawa matu padanma matu jenetima wakinan. Ninkakanwen. 10 Pitibu inun pitibuma yuinaka jabube en matu yubadiaii. Na man jabu paxaima en dasibi matu yubaii, matube xaxu nunuti anua kainshinabubedan. 11 Jaska dasibi matu inun jabu yubakin maiwen jiweabu dasibi jenewen en ana matu tenanma ixanai en yubakaii. Jaska en akima keska wakin mai anu jiweabu jenewen en yamawaima keska wakin ana jabiawendi en ana akama ixanaii.
12-13 Nawan bai tapinkin en yubaka unanti wakin en nai anu sintanpakekin en kainmapakexanaii. Jaskawen taexun mai anu jiwebaunabu dasibibun uinkin: ‘Nuku yubaniwen taexun jenewen Diosun nuku ana tenankin keyuama ixanikiki’, ikin shinanpaketidubuki. 14-15 Jaska biamawakin nai kuinwen en mai achimaya nai anua butui nawan bai sintanpakeaya en matu inun yuinakabube yubakani jakimama en shinankubainxanaii. ‘Jenewen jiweabu dasibi en ana tenankin keyuamaki’, axun 16 nawan bai sintan tapinxun uinkin mai anu yudabu inun yuinaka jiweabu dasibi en jatu yubani jakimama en shinankubainxanaii. 17 Nawan bai sintan en jatu pakexunaya mai anu jiweabun en jatuki yubakani uinkin yudabun ea shinankubainxankanikiki”, jaskai Dios Noébe yubakai janchanikiaki.
Noé inun jawen bakebu jiwei eskanibukiaki, na janchadan
18 Noén juni bakebu Sem inun, Cam inun, Jafet xaxu nunuti anua kainmabu chipu Camnen juni bake bawaima kaian kenakin: “Canaánki”, anikiaki. 19 Noén juni bake dabe inun besti mai anu pakunkaini ana ichai iake iakekubainibukiaki.
20 Janua nunuti anua kainbidanimaxun Noén bai wakin taewaxun uva tacha banaimaxun 21 jawen vino buspuai aka paejaida jawen tadi jiwe medan tadiuma uxa dakaken 22 Canaánen epa Cam jikikain jawen epa Noé tadiuma paean uxa daka uintan kainkidan kaxe wakin jawen betsa dabe jatu yuia 23 Sem inun Jafetin jawen dakukuti bitanxun june uianma jamaudi besukain jatun epa tadiuma daka yabutan kainbidanabun 24 Noé paean bestentan bepe ikai jawen bake maxkun kaxewaxu yuiabu tapintan 25 jawen baba yupukin yuikin:
“Canaán inun jawen bababu duawama ichakawakin
jatunabun jatun dayanika jawen esclavo jatu wakubainxankanikiki, dayamakinan”,
“En mekenika Dios Jehován
jau Sem inun jawen bababu ikubainaibu
jau jatu duawakubainxanunwen.
Ja inun, Canaánen bababudan,
jau jawen dayadu esclavo ikubainxanunbunwen,
Sem dayaxunidan.
27 Jaska inun, Diosun jatu pa waya
Jafetin bababun Semnen bababu jatu mebintan
jatun mae jau ibu waxanunbunwen,
Canaánen bababu jatu esclavo wadiakinan”,
akin Noén jatu yuinikiaki.