6 janua ana 40 día xaba binuaya januxun uinti xui waima Noén bepentan 7 yuinaka betsa peiya meshupa nichian nuya atankin jau jene netsutan taxkayunun manai ana juamaken 8-9 januxun Noén ana shinantan: “Ma mai tsusinmenkain, jau jatundi uintanun”, iwanan, Noén deiwan nichian nuyakauankin uian dasibi mai anu netsudiamaken jani bututima ana chintunkidani xaxu nunuti anu ana juaya Noén jawen meken sananxuna jaki tsaua nunuti medan ana bichitan 10 januxun ana 7 xaba Noén manatan deiwan ana nichian ka 11 badi kai meshuaya ana deiwan chintunkidankin ni pei bei Noéki nukuaya uinkin yuikin: “¡Jabaa! ¡Ni pei bena tukunbidanibikain!” jatu wa jaskawen taea: “Mai tsusinki”, ikin jene ma netsuai Noén unankin 12 ana 7 xaba manatan deiwan ana nichian ka ana juama jadibi niti inikiaki.

13 Janua Noé 601 año ma jayaken jatian jene netsui keyuken ja jaskaidan, badi bena uxe ja dukun día iki taeaitianan, jawen xaxu nunuti jawen mabepu pekakin bepen keyutan mai ma tsusian uintan 14 ana jabias badi uxe 2 día 27 tian mai ma tanki keyuken 15-16 jabiatiandi Dios Noébe janchakin yuikin: “Nunuti anua kaindikanwen, mia inun, min ain inun, min bakebu inun, min babawanan. 17 Yuinaka pitibu inun, pitibuma inun, jabu man ina waisma inun, jabu man ina wamis yuinaka betsa betsapa tibi inun, nutawen xadai mapumisbu inun, peiyabudan, dasibi kainmadiwe, jabudi mai jidabi anu jau bua jadia bakeyai paditanunbunan”, aka 18 Noé jawenabube kaianyan 19 yuinaka mani betsa tibi xaxu nunuti medanua jabiaskadiai kainbainibukiaki.

20 Januxun Noén Jehová kenwankin eska wanikiaki. Mishki chi tapu wakin mishki ichawakin maspu watan yuinaka pitibu betsa betsapa tibi bixun tesenxun chi tapu anuxun menukin kua keyuaya 21 jawen kuin nue maiai Jehová Diosun xetekin benimakin shinankin: “Junibu ewadiama shinan chakabui taemisbuki. Junibu ewatan jabiaskadi ikubainmisbuki. Jaskabiaken jatu kupikatsi ikama en ana mai jatu chakabuwaxunama ixanaii, kupikinan. Jenewen en jaska waimadan, mai anu jiweabu dasibi en ana jatu tenanma ixanaii.