“Yuda dasibibube min jiwebia mia besti min pepaki, en jancha ninkai jiwekunkainidan. Jaskawen taea nunuti medan minabuyas jikidiwe”, atan 2-3 ana yuikin: “Pitibu yuinaka betsa betsapa tibi, 7 yuxan inun 7 bene nanekin jatu bichixanwen. Ja dikabi peiyabu bene 7 inun yuxan 7 nanekin jatu bichidiaxanwen. Pitibuma yuinaka betsa betsapa tibi yuxan bestichai inun bene bestichai nanekin bichidiaxanwen, jabu mawama mekei jau mai anu mibe ana jiwexanunbunan. 4 Januxun ana 7 xaba keyuaya mai anu ui en tueaii. Jakia taewakinan, 40 xaba inun 40 yame tanamakin ui nesewama en imaxanaii. Jaska wakin mai anu en damiwani en jawen yamawaxanaii, jiweabu dasibi jasakin tenan keyukinan”, aka 5 dasibi Diosun jaska yunua Noén akin keyunikiaki.

6 Noé 600 badiyaken jene matai taenikiaki. 7 Jeneki datei jawen ainbe inun, jawen juni bakebube inun, jawen babawanbube Noé jawen nunutiki jiki taenikiaki. 8-9 Pitibu yuinaka inun pitibuma yuinaka betsa betsapa tibi jatube jikidianibukiaki, yuxan inun benedan. Dasibi jaska Diosun Noé yunua jawen jancha chibain jikinibukiaki.

10 Ana 7 xaba keyuaya jene matai taeaya 11 Noé 600 badiya jiweken janua ja baditian ma 2 uxe inun 17 díatian mai anua jene tuekeaya nai udia ui baxnekei tuekediaya 12 40 xaba inun 40 yame tanamakin mai anu ui imanikiaki, Diosunan.

13 Jabiatiandi ui iki taeaya Noé inun jawen ain inun jawen bakebu dabe inun besti Sem inun, Cam inun, Jafet inun, jawen babawan dabe inun besti xaxu nunuti medan jikiaibun 14 pitibu yuinaka inun pitibuma yuinaka inun jabu nun ina waisma inun jabu nun ina wamis yuinaka betsa betsapa tibi inun nutawen xadai mapumisbu inun peiyabudan, jati jatube jikinibukiaki. 15-16 Dasibi juinsinamisbu mai anu jiweabu tibi Noébe nunuti medan jikibainbainaibun jaska Diosun yunua yuinaka yuxan inun bene jiki keyuaibun xaxu nunuti medan Jehová Diosun ibubis jatu bepunikiaki. 17 Janua 40 xaba ui iki jenediamaken ana jene ewakin matawakin jawen nunuti nuntankin taewaya 18 janua jene ana matai ewakunkainkin mai dasibi binumaya xaxu nunuti nunukaunaya 19 jenen mai binumajaidakin mati keyatapa dasibi achimakin 20 7 metro ana matakin ni binumakin mati dasibi achikin mabidis akin keyunikiaki. 21 Jaskaya yuinaka inun yudabu mawai 22 dasibi jamapai shadabu jabu juinsinamisbu mai anu jiweabu mawai keyunibukiaki. 23 Jaska wakin mai anu jiweabu Diosun dasibi keyu tenankin yudabu inun yuinaka yamawaken jakia jatibu Noébe besti nunuti medan jikiabus jawa mawabumaken 24 janu ui ma neseken jene netsudiama dasibi bepukin keyua netsuyuama ana 150 xaba iyunikiaki.