Yudabun Diosun jancha ninkama chakabui eskai jiwenibukiaki, na janchadan
6
Yudabu jiwei pai mai anu nati iki taekin ainbuaibu yumei ewaibu 2 Dios kenwainbun Dios kenwanbuman ainbu bake uinkin shinankin: “Ainbuaibu jawenduabuki”, ikin betsa betsapa shadabu katuxun ainwanibukiaki.3 Januxun Jehová Diosun jatukidi shinankin: “En yushinen jatu medabewapaibia yudabun ea shinanma chakabukubainkin jatun yuda besti shinain jiwekanikiki. Jaskaibuwen taea ana jatixuinda junibu jiwetidubumaki. Jaskakubainaibu ana 120 badi besti yudabu jiwetan debuxankanikiki”, inikiaki.
4 Jabiatiandi yudabu keyatapa kushipa ewapajaida jiwedianibukiaki. Jabunan, Dios kenwanikabun ainbuaibu jabun Dios kenwanbuma jatu ainwantan chutanameakeakekin jatu bake wa bake ichapa kaian ewatan janua jabu dukun xenipabui bebunkidijaida xanen ibu kushipabu unanepa jidabibun unankin jatu kenwainbu jiwepaunibukiaki.
5 Jehová Diosun jatu unankin: “Mai anu yudabu chakabujaidakin jatun shinan chakabu jawa jeneabumajaidaki. 6 Mai anu yudabu en jatu damiwabiani jatun chakabuwen taea en juintinin en bika tenejaidaii”, ixun ana shinan chankanma 7 yuikin: “Yudabu en jatu damiwabiani ea sinatamakanikiki. Yudabu jatu tenankin yamawakin jabiaskadi yuinaka betsa betsapa inun, main xadaibu inun, peiyabudi mai anu en jatu damiwani dasibi en jabube tenan keyudiaxanaii. En jatu damiwabiani jatukidi en ma shinan betsa jayaki”, inikiaki.
Diosun Noé yunua xaxu nunuti bau keska ewapa wanikiaki, na janchadan
8-9 Jakia Noé pepa jiwekin Dios benimawakubaini eskai jiwekunkainikiaki. Jawenabube jiwea ja besti pepakin Noé bestitun Dios jaibuwakin jawen jancha chibain jiwekunkainkin 10 juni bake dabe inun besti bawaxun jatu kenakin: “Sem inun, Cam inun, Jafetki”, anikiaki.
11-13 Mai anu jiweabu chakabui detenamei ichakanikai jatun mae chakabuwapaunibukiaki. Jatun chakabu uinkin Diosun Noé yuikin: “Yudabun shinan chakakin akaibu uintan eska jatukidi en shinanshinaki. Mai anu ibubis chakabuwaibuwen taexun yudabu dasibi inun mai anuabu dasibi en jatu tenankin keyuxanaii, yamawakinan”, iwanan, 14 “Xaxu bau keska nunuti ewapa jene jikitiduma wawe, bau itsa dintuya wakinan. Jawen bexpa tibi buiwen buyakin puxakin keyuwe, pechiudi inun naxpaudidan”, atan 15 ana yuikin: “Jatixun waxanwen, 135 metro jawen chaipa wakin inun, 22 metro medio jawen jaxpa wakin inun, 13 metro medio jawen kexa keyatapa wakinan”, iwanan, 16 “Januxun jawen mabe buiwen puxakin keyutan jawen mabexanwen. Jaska watan uke medan tapu dabe wakin nabe dabeya waxanwen. Januxun jawen uinti xui pishta manaundi metro medio waxanwen, januxun janu jikiti xui namakis beputiya wakinan. 17 Min ma jaska wakin keyuken en jene yunukin tueaya yudabu dasibi mai anu jiwebaunabu achi keyua jenen jasai debui keyuxankanikiki. 18 Jakia en mia yubaii. Jawen nunuti min xaxu medan min ain inun, min bakebu inun, min babawanbube nunuti medan min jikia man benuyamanun en matu mekekubainxanaii”, akin 19 yuitan yuinakabudi jiwemakatsi ikin yuikin: “Jiwemakin bestibu dabe nunuti medan mibe bichixanwen, yuxan inun benedan, mia keskai jau jabudi jiwepakexanunbunan”, atan 20 “Piti inun pitibuma yuinaka betsa betsapa bestibu yuxan inun bene mianu ibubis beaibu en mia jatu mekemaxanaii. 21 Piti betsa betsapa bikin midimajaida ichawatan aduxanwen, minabu inun yuinakabubetan min jatubetan pixanaidan”, aka 22 jaska Diosun yunua Noén dasibi ninkashinxun chibankin akin keyunikiaki.