Adánen enabu pai jiwei eskanibukiaki, na janchadan
5
1-2 Ja dukun juni Adán inun jawenabu jiwei taei eskakubainibukiaki. Diosun yudabu damiwakin jawen yushin itsa ja keska juni inun ainbu jatu damiwanikiaki. Jaska waxun jatu kenakin yuikin: “Yudabuki, juni inun ainbudan”, akimaxun jatu medabewakubainikiaki, duawakinan. 3 Ja dukun juni Adán jiwekunkaini 130 badiyatun juni bake betsa bawa jawen yuda keska ja itsa kaian kenakin: “Setki”, anixun 4 ana 800 badi Adán jiwekunkainkin juni bakebu inun ainbu bakebu bawakubaini 5 930 badiya mawanikiaki.6 Set 105 badiyatun juni bake bawaima kaian kenakin: “Enóski”, anixun 7 ana 807 badi jiwekunkainkin juni bakebu inun ainbu bakebu bawakubaini 8 912 badiya mawanikiaki.
9 Enós 90 badiyatun juni bake bawaima kaian kenakin: “Cainánki”, anixun 10 ana 815 badi jiwekunkaini juni bakebu inun ainbu bakebu bawakubaini 11 905 badiya mawanikiaki.
12 Cainán 70 badiyatun juni bake bawaima kaian kenakin: “Mahalalelki”, anixun 13 ana 840 badi jiwekunkainkin juni bakebu inun ainbu bakebu bawakubaini 14 910 badiya mawanikiaki.
15 Mahalalel 65 badiyatun juni bake bawaima kaian kenakin: “Jéredki”, anixun 16 ana 830 badi jiwekunkainkin juni bakebu inun ainbu bakebu bawakubaini 17 895 badiya mawanikiaki.
18 Jéred 162 badiyatun juni bake bawaima kaian kenakin: “Henocki”, anixun 19 ana 800 badi Jéred jiwekunkainkin juni bakebu inun ainbu bakebu bawakubaini 20 962 badiya mawanikiaki.
21 Henoc 65 badiyatun juni bake bawaima kaian kenakin: “Matusalénki”, anixun 22 ana Henoc 300 badi jiwei Diosun yunua axuin jabe jaibunamekunkainkin juni bakebu inun ainbu bakebu bawakubaini 23-24 Diosbe jaibui jabe nia 365 badiya mawama jau jabe jiwei kanun nai anu Diosun iyuken jawenabun benabu mai anu yamanikiaki.
25 Matusalén 187 badiyatun juni bake bawaima kaian kenakin: “Lámecki”, anixun 26 ana 782 badi jiwekunkainkin juni bakebu inun ainbu bakebu bawakubaini 27 969 badiya mawanikiaki.
28 Lámec 182 badiyatun juni bake bawaima kaian 29 kenakin: “Noéki”, iwanan, “Ja dukun juni damiwa ninkamaken Diosun mai yupumaniwen taea nukun daya bikajaidaken nuku jatun daya meputakamakin juindukunmakin nuku medabewaxanikiki”, ani 30 ana 595 badi jiwekunkainkin juni bakebu inun ainbu bakebu bawakubaini 31 Lámec 777 badiya mawanikiaki.
32 Noé ma 500 badiya jawen bakebu jawa ainbu bakebu bikin jusiama juni bake dabe inun besti jayanikiaki, jatun kenadan, Sem inun Cam inun Jafetdan.