Caín inun jawen betsa Abelkidi eskai jiwenibukiaki, na janchadan
4
Edén bai anua jatu kainma kaxun junin jawen ain Eva chutakin bakewa jawen bake tue bena kaian ja dukun bake nanea juni bake kainxun kenakin: —Caínki— iwanan shinankin: —Diosun ea medabewaiwen taexun juni bake en kainxuki— inikiaki. 2-3 Janua chipu ana jawen benen bake betsa wa juni bakedi kaian kenakin: “Abelki”, anikiaki. Ja dabe yumewabu ewatan Abel chaxuwan yumewanika ikaya Caín bai wanika inikiaki. Janua betsatian janu Jehová Dios kenwainbutian inankuinkatsi ikin Caínen jawen bai anua yunu bexun inanyan 4-5 jabiaskadi wakin inankuinkatsi ikin Abelin chaxuwan bake xua pejaida bexun Dios inan Diosun Abel inun jawen inankuin jatuna besti bechipaijaidakin jakia Caínena dananyan Caín benimama amua sinatajaidaya6 januxun Jehován Caín yukakin:
—En mia yusian ninkai min benimaxanaii— atan ana yuikin:
—En yusian danain min pepamaken chakabu miki jikia sinata paen mia achitan kanemakatsis ikikiki, inu pubein keskaidan. Jakia min chakabun mia maemapaya min chakabudan, nemaxanwen— aka
8 ja ninkabiashina chipu xaba betsatian Caínen jawen betsa Abel yuikin:
—Unu kayunuwe— abaina jabe ka bai anu jikixun Caínen jawen betsa kushakin tenanken 9 Jehová Diosun unantan chipu Caín yukakin:
—Min betsadan, ¿jania?— aka
—¿Min jaska washinamen?— iwanan —Min betsan jimi mai anu jabai sai ikin jau en mia kupinun ea yuikiki. Min betsadan, min tenanshinaki— iwanan 11-12 —Maiwen en mia yupuaii. Min betsan jimi maiki jabai mechashinawen taexun en mia chakabuwaya min yunu banabia min miban ana jukuanma ipakexanikiki. Jaskaken mai jidabi anu datei min jiweakeakexanaii— aka 13-14 Caínen yuikin:
—Mia anua ea nichinkin en mae anuadi min ma ea kainmadiaxuki— iwanan, ana yuikin: —Mai jidabi anu en jawauma kakunkaini kauanaya min ea datepaketi waxuki. Enabu tibi eki nukua en dateaya ea debu waxankanikiki. Min ea kupia bikajaidadan, jaska tenei en jiwetidumaki— aka
15 —Jaskamaki— iwanan, Jehová Diosun yuda dasibi unanmakin yuikin:
—Tsuanda Caín tenanyanan en kupijaidaxanaii— atan, jau ja uintan jau deteyamanunbun Jehová Diosun unanti wakin Caínen betunkuki kene netanikiaki.
Caín jawenabuya eskai jiwenibukiaki, na janchadan
16 Jehová Dios anua Caín taxnia Edén anua badi juaikidi ka Nod mai pakea betsa anu jiwexun 17 Caínen ainbu bitan jabe jiwexun chutanamekin bakewaima juni bake kaian kenakin: “Henocki”, atan janua jawenabu pai mae ewapajaidaibun kenakin jawen baken kenakidi kenakin: “Henocki”, adianikiaki.
18 Henocin bake betsadan, Irad inikiaki. Iradin bake betsadan, Mehujael inikiaki. Mehujaelin bake betsadan, Metusael inikiaki. Metusaelin bake betsadan, Lámec inikiaki. 19 Lámecin ainbu dabe ainwan jatun kena Adá inun Silá inikiaki. 20 Adáki bake wa juni bake kaian kenakin: “Jabalki”, anibukiaki. Jabalin bababun bichi jiwe watan jawen jiwebaunkin ina awa yumewapaunibukiaki. 21 Adán ja kachu bake bia juni bake kaian kenakin: “Jubalki”, anibukiaki. Jubalin bababun arpa mimawati dispiya inun tepedewe mawanika ipaunibukiaki. 22 Silá dikabitun bake bia juni bake kaian kenakin: “Tubal-caínki”, anibukiaki. Tubal-caínen bababun mane bronce inun hierro mabu betsa betsapa chaxa bexmas wamisbu ipaunibukiaki. Tubal-caínen pui kaian kenakin: “Naamáki”, anibukiaki.
23-24 Xaba betsatian Lámecin jawen ain dabe jatu yuikin: “Adáan, Siláan, man en ain dabeki. En jancha ninkakanwen. Juni bedunantun ea kushakin ea tenanpanan ean en tenanxuki. Juni betsan Caín deteaya 7ki kupitidubuki. Jamen, eadan, juni betsan ea deteadan, 77ki kupixankanikiki”, jatu anikiaki.
Adánen bake betsa Set kainikiaki, na janchadan
25 Ana Adánen jawen ain Eva chutakin bakewaima ana juni bake kaianyan kenakin: “Setki”, iwanan, shinankin yuikin: “Caínen Abel debu waimawen taexun Diosun juni bake betsa ea inanxuki”, inikiaki. 26 Set ewai ainyantan bake bawaima juni bake kainxuna kenakin: “Enóski”, akimaxun jabiatiandi Jehová nukun mekenika Dios ea akin kenwankin taewakubainibukiaki.