—Uian. “Bai ji bimi betsa betsapa tibi piyamaxankanwen”, akin ¿Diosun matu nemashinamen?— aka 2-3 ainbun yuikin:

—Bai ji bimi nun pitiduki. Jakia Diosun nuku nemakin: “Bai nekia ji bimi betsa kemukin piyamaxankanwen. Meyamakanwen. Piadan, man mawaxanaii”, nuku ashianki— aka 4-5 dunun ana yuikin:

—Jaskamaki. Man mawama ixanaii. Diosunan, chanima unan keyuikiki. Man ja keska iyamanun ja ji bimi pepa inun chakabu unanti man piyamanun matu nemashinaki, man ja keska itidukenan— aka 6 ainbun shinankin:

—Ja ji bimi piti shadabuki. Jawenduaki. Jawen unantikiaki— ixun tsekaxun pixun jawen benedi ma jua inan jatundi pitan 7 xabakabi unankin tadiuma unantan yuinamei:

—Nun jawawen juneamaki, nukun yudadan— ixun dakekin ni higuera pei kexea jawen chiabukutan 8 badi matsiaya mapuabun Jehová Dios bai neki juai jawen bana ninkatan bai chaka medan juneabun 9 Jehová Diosun juni kenakin:

—¿Min janimen?— aka

10 taxnibidan kemakin:

—Bai nekia min juai ninkatan tadiuma datejaidai en junexuki— aka

11 —¿Min tadiumadan, tsuan mia yuixumen?— atan —¿Ji bimidan, “Piyamawe”, en mia ashian min pixumen?— aka 12 junin yuikin:

—Jatun ea medabewati ainbu min ea inanshinatun ji bimi ea inan en pixuki— aka 13 Jehová Diosun ainbu yukakin:

—¿Min jaskakin jaska waxumen?— aka ainbun yuikin

—Dunun ea padan en pixuki— aka 14-15 Jehová Diosun dunu yuikin:

—Min jatu padanxunwen taexun yuinaka dasibi medanua en mia chakabuwaii. Na jabiatian badi tibi jiwei nutawen kakin min mai putu pipakexanaii— atan —Mia inun ainbu, min bababu inun jawen bababu en sinatanamemapakexanaii— jatu watan Satanás dunu medan jiwea yuikin:

—Min jawen tae chichuku keyukin isin wanbia maemakin ainbun baban binukin min buxka buchushkin xepa wanun badikiki— atan 16 ainbudi Diosun yuikin:

—Min bake kaiain tibi isinjaidawakin ana en mia tenemapakexanaii. Jakia: “Isinjaidaki”, min ibiakin min bene bechipai min jabe chutanamepakexanaii, min benen mia mekekin ibu wadan— iwanan, 17-19 junidi yuikin:

—“Ji bimidan, piyamaxanwen”, en mia wabiashina min ainen jancha ninkatan min pixuki. Jaskawen taexun mai ichakanika en mia waxuaiin. Badi tibi jiwea min piti mai anua bixun pi min dayajaidapakexanaii. Min yunu banabia muxa inun chaka main mia benemaxunpakexanikiki. Min mai putudiama min piti pi dayajaidai min niskanpakexanaii. Mai en mia damiwa min mawadan, min ana jawendi maixanaii— akaya

20 —Januxun na yudabu dasibi jau jawen jiwexanunbun, iwanan, shinankin junin jawen ain kenakin: “Evaki”— anikiaki, nukun janchadan: “Dasibi jiwexanaibun jatun ewa wakinan.” 21 Jehová Diosun juni inun jawen ain bichi tadi waxuntan jatu sawematan 22 janua Dios jamebi yuinamekin:

—Uian, junidan, nuku keskatanan, pepa inun chakabu unantan jiwepakemati ji bimi bixun pitiduki. Jaskai juni inun jawen ain jiwepakexankanikiki, mawamadan— itan 23 Edén bai ewapa anua jatu kainmatan januxun ja janua mai juni dami waima anua taxnimakin nichinkin jamebi jau bai wanun nanta yununikiaki. 24 Diosun juni kainmatan janua jiwepakemati ji bimi janu kati bai anu jau jadi ana tsua kayamanun mekemakin yunukin badi juaikidia Edén bai jikiti xui anu jawen nai tsuma punyan peiyabu nichintan jawen meketi nupe chaipa chi jedeya dabekekaunkin chaxakaunkin jau mekenunbun jawen nemakin Jehová Diosun jatu mekemanikiaki.