4-5 Nai inun mai jidabi Dios, jawen kena kayabi Jehován, jatun damiwaken eskakubainibukiaki. Jabun bai uduti juni jayadiamaken mai anu Diosun ui imadiamawen taea piti yunubu benediamaken 6 janunkain basnun mai anua kainkin mai bemecha waya 7 Jehová Diosun mai mishpu bitan damiwakin ja keska wakin juni jiwemanun ixun jawen dekin anu xun aka juni jaskai jiwei taenikiaki.

8-9 Jadidia badi juaikidi estekidia Edén anu Jehová Diosun bai banakin mai anua ji jawenduabu inun ji piti bimiyabu benemaxun, bai nekia miban ji bimiya ja pia jiwepakemati pepa inun chakabu unanti ji benemadiaxun ma juni damiwa iyuxun jadi jiwemanikiaki. 10 Bai mecha wai Edén anua jene taxni jabai taei jene tibi texexai 4 jene jabai taenikiaki, jeneidan. 11-12 Jene ja dukun jawen kenadan, Pisón inikiaki. Janua Havilá jidabi datanbauna janu oro mane tashipa pepajaida inun, bedelio mane inun, ónice meshupa jayanibukiaki. 13 Jene xexa betsa jawen kenadan, Guihónki Cus jidabi datanbauna inikiaki. 14 Jene ja dabe inun besti jawen kenadan, Tigris inikiaki. Janua badi juaikidia Asiria datanbaina inikiaki. Janua jawen jenei jene dabe inun dabe Éufrates inikiaki.

15-17 Edén bai anu Jehová Diosun juni iyuxun bai ibu wamakin mekemakin yuikin: “Na bai anu ji betsa betsapa bimi min pitiki. Jakia pepa inun chakabu unanti ji bimi betsa mepakeyamaxanwen. Jamen min kemukin piadan, min mawaxanaii”, iwanan, yuitan 18 ana shinankin: “Juni ja mesti jiweadan, pemaki”, ixun, “Jau jatun medabewapakexanun, en damiwaxuaiin, ja itsadan”, ixun 19 janua mai anua yuinaka daniyabu inun peiyabu damiwashinxun: “Jau junin jadakidida jatu kenanun”, ixun Jehová Diosun uinmakin iwea jamapai yuinaka shadabu bestibu ja junin jatu kenakin keyua jadidi jatun kena inibukiaki, ikibi ikidan. 20 Jaska inabu yuinaka inun peiyabu inun inabuma yuinaka junin kenakin keyutan jakia ja keska jatun medabewapakexanai jayamaken 21 Jehová Diosun jawen kushipawen juni uxan uxajaidaken jawen pishi bestichai tsekaxun namiwen xui buatan 22 Ja pishi ainbu wakin damiwaxun juni uxanu iyua juni bestentan 23 yuikin: “Nadan, jawen nami en namiki. Jawen xau en xaudiki”, iwanan, “Juni anua tsekawen taexun kenakin: Ainbuki”, anikiaki. 24 Jaskawen taea junin jawen ibubu dapaxkabain ainyainan, jawen ainbe jiwei yuda bestichai keskati waniki. 25 Janua juni inun jawen ain tadiuma dakeama jiwei taenibukiaki.