GÉNESIS
Diosun mai damiwakin bawakin taewaken yudabu jiwei eskai taekubainibukiaki
Diosun mai jidabi damiwanikiaki, na janchadan
1
Diosun nai inun mai dami wakin eska wakin taewanikiaki. 2 Mai jayadiama jawa jayamajaidaken Diosun uian dasibi jenewans uke medan dasibi meshui keyua dakaken jabiatiandi Diosun Yushin Pepa jene mamakixun tunkax akaya3 Diosun shinankin yuikin:
“Jau xabanunwen”, aka ma jawaida xaba inikiaki. 4-5 Jaska watan Diosun uian xaba pejaida dakaken januxun meshudi paxkatan ja dabe kenakin: “Xabaki”, axun meshudi kenakin: “Yameki”, atan ja dukun 1 día xabatian jati Diosun damiwakin taewanikiaki.
6-7 Ja kachu Diosun damiwakin ana yuikin:
“Natukan watan jene paxkakin medibi watan jau jaskanunwen”, anikiaki. Diosun jaska watan natukan wakin jenedi paxkatan jaska waxun medibi natukan naman jene waxun manaundiadi nai anudi jene wadianikiaki. 8 Jaska waxun natukan Diosun kenakin:
“Naiki”, atan jaska wakin 2 día xaba Diosun damiwakin taewanikiaki.
9 Jaska washinxun Diosun ana yuikin:
“Nai namanu jau jenen ichayununwen, mai metui uinubisidan”, aka nai namanua jene janus ichai keyuken 10 mai metu yenken dakaken Diosun ja kenakin:
“Basi inun yunu jexeya inun ji jawen bimi jexeya ja mai metu anu jau dasibi benei keyununwen”, axun 12 jaska wa main basi benemakin yunu jexeya bestibu benemakin ji bestibu bimi jexeya benemakin dasibi ma benemaken Diosun uian peken 13 jaska wakin 3 día xaba Diosun damiwakin taewanikiaki.
14 Jaska dayakunkainkin Diosun ana yuikin:
“Xaba inun meshu tadi medibi paxkakin nai anu jau chaxati inunwen, xaba inun, yame inun, badi inun, betsa betsapatian tanakin unanmatidan. 15 Nai anua mai jidabi anu chaxapakexankanikiki”, ixun 16 Diosun chaxati ewapajaida dabe, badi inun, uxe inun, bishi ichapa damiwaxun ewapatun jau xaba duawanunan, jatiumatun jau yame duawanunan, 17-18 mai jidabi anu chaxapakemakin xaba duawamakin yame duawamakin xaba inun yame tadi xekakin medibi wakin nai anu Diosun jaska janakeakexun uian peken 19 jaska wakin 4 día xaba Diosun damiwakin taewanikiaki.
20 Jaska dayakunkainkin Diosun jene yunukin:
“Jabu jene medan jiweabun dasibi damiwakin ja jamen imaxanunwen”, iwanan, “Nai natukan anuadi manaundiabu peiyabudi jau nuyabaununbunwen”, ixun 21 jene medan jiweabudi ewapabu bestibu damiwakin baka betsa betsapa bestibu damiwakin peiyabu betsa betsapa bestibu damiwakin jaska waxun uian peken 22 pepawakin Diosun jatu yunukin:
“Bake wakin jau pa wapakexanunbunwen. Jene tibi medan jau mataxanunbunwen. Mai jidabi anu peiyabu betsa betsapadi jau papakexanunbunwen”, jatu watan 23 5 día xaba damiwai dayanikiaki, Diosdan.
24 Jaska wabaishinxun Diosun mai yunukin:
“Jamapai betsa betsapa bestibu main jau jabu damiwayununwen, piti yuinaka inun, pitibuma yuinaka inun, ina wati yuinaka inun, ina watima yuinaka inun, taeyabu inun, tae jayabumadan”, 25 jaska piti yuinaka inun pitibuma yuinaka Diosun damiwaxun dasibi uian peken 26 Diosun ana yuikin: “Yudabu damiwananwen, nuku itsadan, nukun yushin keska wakinan, mai jidabi anu baka inun, piti yuinaka inun, pitibuma yuinaka jau jatun ibu waxanunbunan”, ixun 27 ja itsa juni inun ainbu jatu damiwaxun 28 jatu duawakin yunukin yuikin: “Matun bakebu bawakin jatu pa wapakexankanwen. Jiweakeakebaunkin mai jidabi anu matuna wakin ibu wai xanen ibupakexankanwen, jene anu baka inun, manaundia peiyabu inun, yuinaka dasibi main xadaibu dikabi ibu wakinan”, iwanan, 29 “Uian, yunu jexeya inun ji bimi jexeya mai jidabi anu en matu inaiin, matun pitidan. 30 Jamen yuinaka dasibi jiweaibu puben inun pubenbumadan, peiyabu inun main xadaibu dasibi ni maxu inun ni bimi en jatu inaiin, dasibi yuinakapan pitidan”, jaska waxun 31 dasibi ma damiwa uian pejaidaken 6 día xaba dayanikiaki, Diosdan.