Pilatos anu Jesus iyunibukiaki, na hãtxarã
15
Ma penaya Deusbe nukunabu hãtxashunika shanẽ ibubu inũ Deusũ hãtxa kenenibu yusĩnanãmisbu inũ mae shanẽ ibubu Sinédrio hirabi itxashũ haska wakĩ Jesus tenãtikiri yubakatã Jesus meneshshũ Romano shanẽ ibu Pilatos anushũ txitenũ ishũ iyuabu
Marcos 15.1-32
—Miarã,
mĩ judeu shanẽ ibubu binu keyuamẽ?
— aka
Jesusũ yuikĩ:
—Hawaikika!
Habiari mĩ ea yuiaii— aka
3 Deusbe nukunabu hãtxashunika shanẽ ibu betsa betsapabũ hakiri txani yuikĩ txiteaibũ
4 Pilatõs ana Jesus yukakĩ:
—Ha mikiri betsa betsapa txakabu yuiaiburã,
mĩ hawa hatu yuiamamẽ?
— aka
5 Jesusũ hawa yuiama nikẽ:
“Haskai hãtxamamẽ?”
itã Pilatõs harakiri xinãtima tsaukẽ
Jesus hau tenãnũbũ Pilatõs hatu yununikiaki, na hãtxarã
6 Romano soldadobũ hatu atxishũ bitximabu bari tibi ha Páscoa nawaibutiã hau bestitxai tashninũ ha Romano shanẽ ibu Pilatõs beyawẽ taeshũ maẽ katuaya hatu kaĩmashũpakemiskẽ
7 habiatiãri huni betsa hawẽ kena Barrabás huni betsabube detenamekĩ hatũ shanẽ ibu detepaikĩ hatubetã huni betsa tenaĩmakẽ habũ atxishũ bitximabũ
8 hanua yurã kaiã Pilatos anu ana beshũ yuikĩ:
—Nawaibutiã huni betsa bari tibi mĩ nuku tashnimashũmis keska wakĩ natiãri huni betsa nuku kaĩmashũwẽ— akabu
9-10 Deusbe nukunabu hãtxashunika shanẽ ibubu Jesuski txani txakai haki sinatakĩ haska washũ maematima maemanũ ishũ iyuabu Pilatõs unãkĩ yurã kaiã yukakĩ:
—Judeubũ shanẽ ibu kayabi Jesus hawa wama matu nitxĩshũpa?
— ikaya
11 Deusbe nukunabu hãtxashunika shanẽ ibubũ yurã kaiã ana Jesuski sinatahairamakĩ hatu dasibiri sinatamakĩ keyukĩ:
—Hau Barrabás nuku kaĩmashunũ yuikãwẽ— hatu waibũ yurã kaiãnẽ habiaskari yuiaibũ
12 Pilatõs ana hatu yukakĩ:
—Ha huni:
“Ẽ judeubũ shanẽ ibuki”,
iki kenamisrã,
matu haska washũpa?
— hatu wa
13 hãtxa kuxipawẽ ana yuikĩ:
—Cruzki nuku mastashũwẽ— ikaibũ
14 ana Pilatõs hatu yukakĩ:
—Natunã,
hawa txakabuwaxinamẽ?
— hatu waya ana unãshubima hãtxa kuxipawẽ yuikĩ:
—Cruzki nuku mastashũwẽ —aki hawẽtxaĩs ikaibũ
15 haskaibũ Pilatõs yurã kaiã daewakĩ Barrabás hatu kaĩmashũtã Jesus hatu kakux kakux amatã hau cruzki hatu mastashũtanũbũ hatu yunua
16 hanushũ shanẽ ibu Pilatõs hiwe ewapa hemaĩtĩ anu soldadobũ Jesus iyushũ soldado habus haki shukui itxatã
17 shanẽ ibũ bemakia tari txaipa taxihaira Jesus sawemashũ musha maiti washũ maimatã
18 unãshubima hãtxa kuxipawẽ kashe wakĩ yuikĩ:
—Judeu shanẽ ibu kayabirã,
mĩ miaki— akĩ hawẽtxaĩs yuibetanã
19 hi siriwẽ makux makux atã haki kemu mitxutãtãkĩ haki dãti itã hãtxa pepawẽ yuishunikapaikĩ kashe wakĩ
20 keyutã bemakia tari txaipa taxihaira pekatã hawẽ tari kayabis Jesus sawemashũ cruzki mastakatsi kaĩmabainaibũ
Cruzki Jesus mastanibukiaki, na hãtxarã
21 hanua huni betsa Simão hawẽ mae Cirene anua hawẽ bakebu Alexandre inũ Ruforã,
bai anu dayatani hui hatuki nukuaya Jesusũ cruz hau iashũyubainũ soldadobũ yunua iashũbainaya
22 Gólgota anu Jesus hari iyukĩ mapematã,
haska yuiarã,
Bushka Shau Mati anurã,
23 uva vinho hene isĩ nemati dau muka husia amapayabu danãkĩ akamakẽ
24-25 ma bari hui nai putxinĩ dakakẽ Jesusũ tari peka keyutã mastashũ cruzki nitxĩtã soldadobũ xinãkĩ yuikĩ:
—Tsuã hawẽ tari tibi biaĩmẽkaĩ?
Akãwẽ— ishũ hawẽ beyusti putapakekĩ hawẽ tari pashkatã
26 hawẽ taeshũ hatu tenãmai unãti hi besha tuashki kenekĩ:
“Judeubũ Shanẽ Ibuhairaki”,
aka beshũ Jesus mamaki ha hi tuashki kenea mastariashũ
27-29 habianuri habe huni yumetsu daberi cruz dabeki mastashũ betsa hawẽ yusiuri nitxĩshũ betsa hawẽ yusmauri nitxĩriabu hunibũ daĩbaĩkĩ buri buri ikĩ yuikĩ:
—Uĩwẽ.
“Deus kẽwãti mixki Templo tekekĩ purekĩ keyutã shaba dabe inũ besti kaya ẽ ana benishanaii”,
mĩ ixiãki.
30 Mĩ ha kuxipa hayarã,
ha cruz anua mimebi pashai buturiwe,
mawamarã— akaibũ
31 Deusbe nukunabu hãtxashunika shanẽ ibubu inũ Deusũ hãtxa kenenibu yusĩnanãmisbũri Jesus kashe wariai yuinamekĩ:
—Huni betsabu merabewabiamis hamebi pashatirumaki.
32 Haskakenã,
haska Israelbũ Shanẽ Ibu Cristo kayamẽkaĩ cruz anua butuai uĩkĩ na habiatiã nũ ikũwãtiruki— ikaibũ ha haska waibu nĩkatã huni yumetsu dabe habe mastariaburi hãtxa txakabukĩ Jesus yuãriaibũ
Jesus mawanikiaki, na hãtxarã
33-34 hanua bari mananãbibiakẽ bari nuka mexua itsa daka manaibũ ma bari nai putxinĩ dakakẽ bepenakainaya habiatiãri Jesusũ hui kuxipawẽ yuikĩ:
—Eloí,
Eloí,
lemá sabactâni?
— ikirã huni kuĩ hãtxarã,
“Ẽ Deusuũ,
ẽ Deusuũ,
haskakĩ mĩ ea heneamẽ?”
ikaya
Marcos 15.33-47
35 ha namã hatiri mapushũ betsabũ nĩkatã yuikĩ:
—Nĩkakãwẽ,
Deusũ hãtxa yuishunika Elias kenaikikirã— ikaibũ
36 hanua ha namã mapuabu betsa kuxikirã hanu hawẽ tsiniti vinho muka pu atã tawaki ustãshũ beshũ amanũ,
iwanã,
sanãshũkĩ xinãkĩ yuikĩ:
—Ẽ daka manakayuti Eliasĩ buteyui huimẽkaĩ— itã nikẽ
37 hanua Jesus ana unãshubima bis itã mawaya
38 Templo merã tari dĩtu wakĩ kebẽnibu hamebi manaũria dis iki keyuaya
39 soldado Romano capitão Jesusũ besuuri nishũ uĩkĩ Jesus bis itã mawaya yuikĩ:
—Ikũ kayaki.
Na hunirã,
Deusũ bakeki— ikaya
40-41 hanua aĩbuaibu Galiléia anuabũ Jesus Galiléia anu ka habũ duawakĩ txibãmisbũ uĩaĩbũ hatubetã uĩriaiburã,
Josẽ betsa mashku Tiago ha dabetũ ewa Maria inũ,
Salomé inũ,
Maria Madalenã habũ benãtashũ uĩaĩbũ hanua aĩbu betsa betsapabu Jerusalém anu Jesusbe bexiãbũri hatubetã Jesus mawai uĩnibukiaki.
Jesus mawa maiwati merã hananibukiaki, na hãtxarã
42 Hanua ma bari kaya habiatiãri judeubu sábadotiã huĩrukũkatsi bebũkiri piti pewamisbukẽ
43 hanua judeu Sinédriobube hatube shanẽ ibumis betsa José Arimatéia anua kaĩnitũ Cristo Shanẽ Ibushanai manakubaĩxina hawa dateama Pilatos anu kashũ Jesus maiwakatsi hawẽ yura yuka
44 Pilatos e itã yukakĩ:
—Ma hawaira haskatã mawashumẽ?
— ishũ soldado capitão kenashũ yukakĩ:
—Jesusrã,
hatiã ma mawashumẽ?
— aka