3 hari hatu iyui Deusbe nukunabu hãtxashunika shanẽ ibubu inũ fariseububetã hatu yunuabu hatiri Templo mekenikabu inũ Romano soldadobu shuku betsa Judasĩ hatu iyua hatũ detetiya mesebaini bĩ dekutã txasha dakabainaibũ

4 Jesus atxi beaibu dasibi ma unaĩwẽ taea nuku bebũ Jesus nitã hatu yukakĩ:

—Mã tsua benai bekanai?

— hatu wa

5 habũ atxi beaibũ betsã Jesus kemakĩ:

—Jesus Nazaré anuarã— akaya

Jesusũ ana yuikĩ:

—Habia ẽ eaki— hatu waya Judasĩ hatu atximai kai hawairakaĩ ma habe nikẽ

6 haskai Jesus hãtxai nĩkatã txishtekiri shekibaini di ikaibũ

7 Jesusũ ana hatu yukakĩ:

—Tsuaraka mã benai bei ikanai?

— hatu wa ana habiaskari habũ yuikĩ:

—Jesus Nazaré anuarã— akaibũ

8 —“Habia ẽ eaki”,

akĩ ẽ ma matu yuishuki.

Mã ea besti benaiwẽ taeshũ ẽ haibuaibu hatu meyamakãwẽ,

hau bunũbunã— hatu wa

9 bebũkiri Jesusũ yuikĩ:

“Epaã,

mĩ ea yununi ẽ tsua hatu benuamaki”,

akĩ Jesusũ yuishuwẽ taeshũ:

“Ẽ haibuaibu meyamakãwẽ”,

akĩ Jesusũ hatu nemaniki.

10 Hanushũ Simão Pedrõ hawẽ nupe txaipa sitã Deusbe nukunabu hãtxashunika shanẽ ibuhairatũ tsuma Malco mapeshpaikĩ maebaĩ pabĩki yusiuria pashteaya

11 nemakĩ Jesusũ Pedro yuikĩ:

—Ana hatu meama mĩ nupe ana hawẽri usũwẽ.

Ẽ Epã haska ea yununi habiaskari wakĩ ea yumãwãkanikiki.

Ea yauxiyamawe— aka

12 hanushũ hatũ shanẽ ibu capitãobetã Romano soldadobu inũ Templo mekenikabũ Jesus atxishũ meneshtã

13 iyukĩ ha dukũ hatũ shanẽ ibu Anásĩ hiwe anu iyuabũ hawẽ dais Caifás na bari bestitxai Deusbe nukunabu hãtxashunika shanẽ ibuhairatũ

14 bebũkiri judeubu hatu yuikĩ:

“Nukunabu hau pashkai sa iyamashanũbũ huni bestitxai nukunabu mawashunaya mã pepakũkaĩshanaii”,

akĩ hatu yuimanurã,

15 Jesus iyuaibũ Simão Pedro inũ eã hune txipu kakĩ nũ Jesus txibãkubaini shanẽ ibu Anásĩ enabũ ea unaĩbuwẽ taea hanu itxamisbu dĩtu anu Jesusbe ẽ hikiaya

16 hakia Pedro unãbumawẽ taeshũ nemakĩ niti akabu hikiama bai kesha Pedro nikẽ hanua hemaĩtĩ kene hanu hikiti shui anu ana kashũ shui mekenika aĩbu yukashũtã Pedro ẽ bitxiaya

17 shui mekenika aĩbũ Pedro yukakĩ:

—Ha hunĩ tsuma betsarã,

habia mĩ miamẽ?

— aka

—Earã,

ẽ hamaki— akaya

18 hanua ma matsi beaya hanu dayamisbu inũ Templo mekemisbũ hemaĩtĩ txi keti watã yui mapubaunabu hatube naxui ika Pedrori yuaya

19 hanushũ Deusbe nukunabu hãtxashunika shanẽ ibuhaira ikũkainima ma tashnima anu Anásĩ hiwe anu bitxiabu hawẽ tsumabukiri inũ hawẽ yusĩakiri Jesus yuka taewa

20 Jesusũ kemakĩ:

—Nĩkaibũ ẽ hãtxakũkaĩmiski.

Hanu itxati hiwe tibi inũ Templo hemaĩtĩ anushũ nukunabu itxamisbu anushũ shabakabi dasibibũ berubi ẽ hatu yusĩmiski,

hune hatu yusĩamarã.

21 Ea yukama habũ ẽ hãtxa nĩkamisbu hatu yukawe.

Hawara ẽ hatu yusĩmis unãhairakanikiki— ikaya

22 hari Jesusũ kemaya Templo mekenika betsa Jesus dapi nishũ mekẽ petxiuri kepais akĩ yuikĩ:

—Nukũ shanẽ ibuhaira haska yuiyamawe— aka

23 Jesusũ yuikĩ:

—Ẽ yui txakayarã,

ea unãmawe.

Hakia ẽ pe yuibiaya haskakĩ e iskaũ mĩ ea deteai?

— aka

24 hãtxawẽ binutiruma unãtã Anásĩ hatu yunua Jesus meneshekea habiaska Deusbe nukunabu hãtxashunika shanẽ ibuhaira Caifás anuri iyuaibũ

25 ha haska waibũ Simão Pedro hatube txĩ yui naxui ika yuaya betsabũ yukakĩ:

—Mĩ hamamẽ,

ha hunĩ tsuma betsarã?

— abaunabu

Pedrõ hatu parãkĩ yuikĩ:

—Ẽ hamaki.

Ẽ eamabĩ!

— hatu wa

26 hanushũ shanẽ ibuhaira binuatũ tsuma betsa Pedrõ patsãka hawenabũri Pedro yukakĩ:

—Mibã shuku anushunã,

Jesusberã,

ẽ mia uĩyama ikirãshumẽ?

— aka

27 Pedrõ ana hari parãkĩ:

—Ẽ hamaki— itanayas hawaira habiatiãri takara keui taeaya

28 hanushũ Caifásĩ Jesus yukakĩ keyutã penaya Romano shanẽ ibu Pilatõs hiwe ewapa anu Jesus hau iyutanũbũ Romano soldadobu yunuaya judeu shanẽ ibubũ xinaĩ:

“Nawã hemaĩtĩ anu hikia Moisés nuku yusĩniwẽ taea nawã detsiswẽ txakabutã ana Páscoa nawai besikĩ ẽ pitirumaki”,

iki pepai nawayukatsi hikiabuma

29 haskaibũ hatũ beya unãtã hatu anu Pilatos kaĩtã hatu hãtxa wakĩ yukakĩ:

—Na huninã,

hawa txakabu axiã mã hakiri yuiai?

— hatu wa

30 —Huni txakabumakenã,

mianu nũ iweama ikeanaii.

Unãti watã nuku kupishũwẽ— akabu

31 Pilatõsri hatu yuikĩ:

—Iyushũ haska matũ shenipabũ matu yusĩpauni keska wakĩ matũmebi unãti watã kupitãkãwẽ— hatu wa

judeu shanẽ ibubũ yuikĩ:

—Nũ tenãpanã mĩ nuku nemamiski.

Hau tenãnũbũ miã besti mĩ yunutiruki— akaya

32 haska wakĩ tenãshanaibu Jesusũ nuku yuixinarã,

unãmabia habiaskari hatu amaya

33 nĩkatã hawẽ kene merã ana hikishũ Pilatõs Jesus kenashũ yukakĩ:

—Miarã,

mĩ judeu shanẽ ibubu binu keyuamẽ?

— aka

34 Jesusũri yukakĩ:

—Mimebi mĩ ea yukai?

Huni betsã mia ekiri yunuaraka mĩ ea yukai ikai?

— aka

35 e itã Pilatõs yuikĩ:

—Earã,

ẽ judeumaki,

haska mĩ ea yuipananã.

Minabu judeubu inũ mĩ shanẽ ibubu Deusbe hãtxanikabũ mia ea inãkãshuki.

Mĩ hawa txakabu mexinamẽ?

— aka

36 kemakĩ:

—Earã,

ẽ Shanẽ Ibu kayabiki.

Mia yuinũ nĩkawe.

Nenua hunibu shanẽ ibumisbu keskai ẽ shanẽ ibuamaki.

Hakia ẽ kuxiparã,

na nenu mai anua yurabũ xinaĩ hiweabu keskamaki.

Hakia na,

mai anua ẽ shanẽ ibuaya judeubũ ea atxishũ mia anu ea iweyamanũbũ ẽ tsumabu ewẽ taea nemakanai hatube detenamekeãkãshuki.

Haskakẽ earã,

ẽ Shanẽ Ibu kayabiki,

nenuamarã.

Ẽ hawa txakabu hayamaki— aka

37 hanushũ Pilatõs ana yuikĩ:

—Haskakenã,

txanima mĩ shanẽ ibu kayabiraka— aka

Jesusũ ana yuikĩ:

—Mĩ haska hari yuiairã,

ẽ Shanẽ Ibu kayabiki.

Haskanũ ika yurabube hiwei ẽ tashnikiraniki,

hatu txanima kayabi meshtãmairã.

Tsuabũra txanima hãtxa abukĩ ẽ hãtxa nĩkamisbuki— aka

38 Romano shanẽ ibu Pilatõs yuikĩ:

—Txanima hãtxarã,

hawamẽ?

— itã

haska wa hanu judeu shanẽ ibubũ manaibu anu ana kaĩkirã Pilatõs hatu yuikĩ:

—Ha huni ẽ unãti washurã,

hawa txakabu hayamaki.

39 Páscoatiã bari tibi huni bestitxai hawa wama ẽ matu nitxĩshũmis keska wakĩ,

judeu shanẽ ibu kayabi Jesus hawa wama matu nitxĩshũpa?

— hatu wa

40 dasibibũ hui kuxipawẽ yunukĩ:

—Ha nuku ashũama ha huni betsa Barrabás yumetsubiakẽ nuku ha kaĩmashũwẽ— akaibũ