2 hanua penayahaira domingotiã maiwati anu bui ma bari kaĩyuaya

3 yuinamekũkaĩkĩ:

—Ha mixki beputi ewaparã,

tsuã nuku bepẽshũkĩ tarãshũtirumẽ?

— ikubaini

4 hakiri besukaĩkĩ uĩkĩ ha mixki ewapawẽ bepuxinabu ma hamauri tarãmea betxitã

5 ha maiwati kini merã hikitã uĩkĩ habianuri huni berunã tari hushupa txaipa sawea yusiuri tsauwa uĩ e ikaibũ

6 hatu yuikĩ:

—Jesus mastaxinabu mã benai hua ẽ unaiĩ.

Dateyamakãwẽ.

Haska bebũkiri matu yuixina keskai ma bestẽkainaki.

Ana nenumaki.

Hanu datãxinabu hikishũ uĩbaini

7 bushũ Pedro inũ hawẽ tsuma betsabu menã hatu yuiritãkãwẽ:

“Harã,

matu bebũkiri Galiléia anu kashuĩkiki.

Haria matube ana itxai benai kaikiki,

haska matu yuixina keskairã”— hatu wa

8 aĩbuaibũ nĩkatã maiwati kini anua kaĩkaini saki saki iki kuxibirani dateyabi bekĩ hatu daĩkubirãkĩ tsua yuiama benibukiaki.

9 Penayahaira domingotiã Jesus bestẽkaini hatuki nukutanũ ika kai ha dukũ Maria Madalena ha sete yushĩ txakabu haya kaĩmayamaki nukua

10 hanua benimakaini hatu banabimai kakĩ habũ Jesus txibãmisbu pes mania Jesus manui kashaibuki nukushũ

11 haska Jesus hiwea uĩbaĩ hatu yuia hawa ikũwãma ikaibũ

12 hanua Jesusũ tsumabu dabe bai tanabainaibu haska uĩmisbu keskama hatuki Jesus nukua uĩbirani

13 beshũ habũ txibãmisbu itxapabu hatu banabima nĩkatã habũ hãtxari hawa ikũwãma iriaibũ

14 hanua Jesus hawẽ 11 tsumabũ pi maniabuki nukua uĩ huĩti kuxikĩ Jesus besteã uĩbirã hatuki txanibiabu hawa hatu ikũwãma ibayaibũ Jesusũ hatu ha atã

15 hatu yunukĩ:

—Mai hirabi anu bukĩ Deusũ kakape ekiri dasibibu hatu yusĩkubaĩshãkãwẽ.

16 Habũ ea ikũwaĩ henewẽ mã hatu naximaya ẽ hatu mekeshanaii.

Hakia habũ ea ikũwãkĩ xinã betsa wabuma ẽ hatu kupishanaii.

17 Haska inũ,

tsuabũra ea ikũwaĩ haskakubaĩshanaibu matu yuinũ nĩkakãwẽ.

Ẽ kuxipa hayashũ ẽ kenawẽ taeshũ yushĩ txakabu kaĩmashãkanikiki.

Ha inũ,

hãtxa bena tapĩriamawẽ hãtxashãkanikiki.

18 Ha inũ,

dunu pianã meabu hawa hatu piama ishanai inũ,

hawara mawati dau hatu amabiabu aka hawa hatu txakabuwatã tenãma ishãkanikiki.

Ha inũ,

isĩ teneaibu hatu meabu shushashãkanikiki— hatu watã

19 Shanẽ Ibu Jesus hatube hãtxai meneaya hanushũ Deusũ nai anu ainitã hawẽ yusiuri tsaumaya

20 hanua Jesusũ tsumabu kaĩbaini bukĩ mae tibi anu yusĩkubaunaibũ nukũ Shanẽ Ibu Jesusũ hatu merabewakĩ hawẽ kuxipawẽ hawara unãti dami atimaska ikũ hatu uĩmakubainibukiaki.

Marcos