Hawẽ tsuma katunikiri Senhor Deus hatuki txaninikiaki, na hãtxarã
42
Deus hatuki txani: “Uĩkãwẽ. Ẽ tsuma ẽ katunirã,ẽ betxipaiai ea benimawamiski.
Ẽ Yushĩ kushipa ẽ yunua merabewaya
ha ẽ tsumapã hawẽ yunuti kushipa pepakiri
yurabu shukuabu tibi yuibaũshanikiki.
2 Hawẽ hui kushipawẽ hawa hãtxama
unãshubira hãtxai hawẽ hãtxa kaiaĩ
bis bis ikamakẽ bai namaki mapushũ nĩkama ishãkanikiki.
3 Txanimahaira hawẽ yunuti kushipawẽ txakabu maemakĩ binuriama
yurabuwẽ nuikĩ tawa yushtu puaka keskabu
huĩti babubiabũ hatu danãma ishanikiki,
bĩ pahi ibubis nukabiaya nukawama keska wakinã.
4 Hanushũ hawẽ yunuti kushipawẽ txakabu binuriama
hawa huĩrukuãma inũ hawa punu nukai unãyamasama ishanikiki.
Nawa shukua betsa betsapabu Ianẽwã Mediterráneo kesha anu hiweshũ
ẽ tsumapã hãtxa nĩka pewashãkanikiki”, aka
5 Ha Senhor Deusũ nai hirabi dami wakĩ kaĩmani inũ,
mai dami wakĩ tashnimani anu haki hamapai benemisbu inũ,
yurabu haki hiweabu hiwea hatu inãkĩ hatu huĩsinamamistũ
hawẽ tsuma yuikĩ:
6 “Ea Senhor Deusũ ẽ mekẽnẽ mia metsũshũ ẽ mia kenaniki,
hau mia ikũwaĩ mĩwẽ taea ea anu piskushanũbunã.
Mia haska wamakatsi mĩwẽ ẽ yubakaniki,
nawa shukuabu tibi unãti wati bĩ peshea keskakĩ
mĩ hatu txasha washanunã.
7 Haska wakĩ beshushbu mĩ hatu uĩmashanaii.
Bitxiti hiwe merã hatu bitxiyamabu mĩ hatu tashnimashanaii,
tsuabura meshu anu hiwea keska hatu tashnima keska wakinã.
8 Earã, ẽ Senhor Deuski, ẽ kena kayabirã.
Hau tsuara betsã ẽ kushipa hawena keska wakĩ
hau marias duawayamanũbũ ẽ hatu yunuismaki,
hãtxa pepawẽ ea besti duawakatsi ikama
dami yushĩ duawaibuwẽ taeshunã.
9 Uatiã ẽ matuki txaninirã,
dasibi bebũkiri ẽ yuini ẽ ma akĩ keyuaki, menekinã.
Na habiatianã, ana haskashanai bebũkiri kaka bena ẽ matu tapĩmaii,
matu bebũ tashniriama bebũkiri mã unãkubaĩshanũbunã.
Deus kẽwaĩ kãtai hawẽruakĩ benimawatikiaki, na hãtxarã
10 Kãtati bena betsawẽ Senhor Deus kãtashũkãwẽ.
Nenumahaira mai kesua anushũ kẽwãbaũkãwẽ.
Tsuabura mã ianẽwã shashuwãwẽ mapuabu inũ,
mã ianẽwã merã yuinaka hiweabu inũ,
mai pakea tibi ianẽwã kesua anu mã yurabu hiweabunã,
Deus kẽwãkãwẽ.
11 Mai tsusĩ hawama anu inũ ha maewã wanibu,
hau benimanũbũwẽ.
Quedar nawabu hatũ tari hiwewẽ hiweabu
hau benimarianũbũwẽ.
Mae tibi anu hiweaburã, shinã txãkaĩ hau kãtanũbũwẽ.
Ha dikabi mati keyatapa betsa binu keyua mamaki mapeketã nia mĩ huiwẽ
benimakĩ mimawakãwẽ.
12 Ianẽwã kesha mai pakea tibi anushũ
Senhor Deus pepawakĩ shabakabi duawakĩ hau kẽwanũbũwẽ.
13 Senhor Deus hawa dateama mẽtsisipa keskai kaĩkirãshanikiki,
hatu maematanũ ika detenamenika keskai bebukainirã.
Hatu maemanũ ika bui hari sai sai ibaĩmisbu keskakĩ
hawẽ hui tashnimashanikiki,
haska kaĩkĩ haki sinataibu yamawanũ ikarã.
14 Senhor Deusũ ana yuikĩ:
“Hatishuĩra ẽ nishma dakani inũ ẽ pes dakanirã,
ẽ hui ẽ ana meketirumaki.
Hakia natiã aĩbu bake kainũ ika bis imis keskai inũ,
ana teneama tsekerẽ imis keskai ẽ haskashanaii.
15 Mati keyatapabu inũ mati hatiubuma yamawakĩ
dasibi ni hukũmisbu ẽ tsusĩwãkĩ keyushanaii.
Dasibi hene netsukĩ mai tsusĩwãkĩ ẽ hawa hayama washanaii.
Iã tibiri ẽ netsu keyuriashanaii.
16 Beshushbu hatu iyukinã, bai tanamabaĩkĩ
hanu uĩ buisbuma anu ẽ hatu iyushanaii.
Meshu anu buaibu hatu bebũshũ bĩ hatu txashawashũkĩ
mai txakabu pãpa wakĩ bebũkiri hawamawakĩ ẽ hatu pewashũshanaii.
Na habu haska tibirã, hawa yupatirubuma ẽ hatu ashũshanaii.
17 Ẽ hatu haska wabainaya dami yushĩ inũ hawẽ kẽwãti tibi tsuabũra hatu yuikĩ:
‘Maturã, mã nukũ deusbuki’, hatu amisburã,
haburã, hatũ damiki dakekĩ henebaĩshãkanikiki”, itã
Israelburã, beshush keska inibukiaki, na hãtxarã
18 Deusũ ana hatu yuikĩ:
“Patabuũ, nĩkakãwẽ.
Beshushbuũ, shinãkĩ unãkãwẽ.
19 Israel ẽ hãtxa bunika wakĩ ẽ katubiani
yura betsabu tsua haskamabiakẽ
Israelbu ẽ hãtxa bunikabubia
mã beshush keskabu inũ mã pata keskabu mã ẽ tsumabuki.
20 Ẽ betsa betsapa matũ berubi ẽ ashuaĩ uĩbiakubirani
ha shinãkĩ mã uĩkatsi ikabumaki.
Nĩkabiakĩ mã hawa nĩka pewabumaki.
21 Ẽ matũ Senhor Deus piskumanikatũ
ẽ yusiã hawẽruawẽ ẽ matu e imati ewapa ashũbiakubaina
22 hakia mã Israelburã, matuki sinataibũ matu anua yumetsukĩ inũ
matũ hamapai mebĩ keyubaĩkĩ
matu atxitã dasibi matu bitxikĩ iyumisbuki.
Hari matu bitximabu tsua matũ merabenã kashũ
matu kaĩmakĩ bepẽshuĩsmaki”, ikaya
23 hanushũ Isaíasĩ hatu yuikĩ:
“Matu haska wabia,
haskakĩ uĩtã mã shinã betsa waisbumamẽ?
Hamẽ haskashanaiburã,
tsuã haska nĩkakatsis ikimẽkaĩ?
24 Jacó enabu, Israelburã, hau hatu atxitã bitxishanũbũ
tsuã hatu yununimẽ?
Txanimẽ, Senhor Deusũ hatu anirã? Txanimaki.
Habu Deuskiri txakabuhairakĩ
hawa txibã pewama bai kayatapia hatu unãti wamabiakubaina
hawa hawẽ yusiã nĩkakĩ txibãshunabumaki.
25 Haskawẽ taeshũ Deus habuki sinatakĩ kupikĩ
detenamenikabu Deusũ yunua hawairabirã txiwẽ hatu kuaniki.
Hatu haska wabia hawa betsã taska uĩtã tapĩkatsi ikama inibuki.