Deusũ Israelĩ enabu hatu yubanishũ ana hatu merabewanikiaki, na hãtxarã
41
“Mai pakea Mediterráneo Ianẽwã kesha anu hiweabuũ,hãtxama pestã ea nĩkakãwẽ.
Ana dateama huĩti kushipakãwẽ.
Haska mã sinatanamemisburã, neri itxai bekãwẽ,
haska ẽ matu amamiskiri nũ hãtxanũbunã.
2 Bari huaikiria ha shanẽ ibuhaira Cirõ nawa shukuabu tibi maemakubaĩmisrã,
tsuã yunumakĩ amakubaĩmismẽ?
Ha nawa shukuabu tibi hatũ shanẽ ibu babu watã
hatu tsuma wamakubaĩmisrã, tsuã amakubaĩyamamẽ?
Hatũ matxatu txaipa inũ hatũ kanũ piayabis tekekĩ mesi watã
petxux sa akawakinã, tsuã hatu amakubaĩyamamẽ?
3 Hatuki sinataibũ hatu txibãbiabainabu
hawa tsuã hatu meama unanuma hatu dete dete abaĩkĩ
hatũ taewẽ kati bai metsamaisma keska wakĩ,
tsuã hatu amakubaĩyamamẽ?
4 Dasibi haska watirubu daya amakinã,
tsuã hawẽ shinanẽ hatu taewamanimẽ?
Hanu yurabu dami wakĩ taewatã haska hau hiwekubaĩshanũbũ
hatu yunukubaĩkinã, tsuã hatu akubaĩmismẽ?
Earã, ẽ habia Senhor Deus ea besti Deus kayabitũ
ẽ hatu yunukubaĩmiski.
Ea dukũ ẽ ini inũ
hawẽ henei ẽ iriakũkaĩshanaii.
5 Ianẽwã Mediterráneo kesha anu mai pakea tibi anu hiwebaunabu
haskaibu uĩ date paepaibũ
mai hirabi kesuakea patxa sakui taka taka ikaya
dasibibũ txaimashũ uinũ ika beshãkanikiki.”
6 Habũ mabu wanikabũ hawẽ haibu mabu wanikari merabewakĩ
hatu shinã txãkãwamisbuki.
7 Dami wakĩ hi mabu wanikatũ hawẽ haibu ouro mane inũ prata mane wanikari benimawamiski.
Hawẽ mastatiwẽ mane dami wakĩ sapa wanikatũ
hatũ mane mabu txusha txusha anika benimawariamisbuki.
Hanushũ dami menekĩ ma keyutã
ha mane tsis anika yuikĩ: “Mĩ pehaira wamiski”, atã
hanushũ ha dami hau dabeke dabeke iyamanũ
pregowẽ mestẽwãkĩ mastamisbuki.
8 “Jacó enabu Israelbuũ, ea nĩkakãwẽ.
Ha betxipaikĩ ẽ katuni ẽ tsuma ẽ haibu Abraão mã hawẽ bababuki.
9 Mai uke betsauria eã ẽ matu kenaniki,
txaihaira ianẽwã deshũ betsauria matu katukinã.
Hanushũ matu yuikĩ: ‘Maturã, mã ẽ tsumabuki’, akĩ
eã matu katunishũ ẽ matu danaĩsmaki.
10 Dateyamakãwẽ, ẽ matubekirã.
Dateyamakãwẽ. Earã, ẽ matũ Deuski.
Matu merabewakĩ ẽ kushipa ẽ matu inãmiski.
Ea kushipa binumamistũ matu tsumashũ
hawa matu heneama ẽ matu mekekubainaii.
11 Dasibi habũ matu danaĩbu ẽ hatu dakewa babushãkanikiki.
Habu matuki sinatakĩ matu detemisbu manakukĩ
ẽ matu hatu yamawashũshanaii.
12 Matuki sinatakĩ matu detemisbu ana hayamẽkaĩ ikĩ benai
mã hawa hatuki nukutiruma ishanaii.
Habũ matu atxitã hatiri matu detekĩ
hatiri matu ibu wabaĩmisburã,
hawa habũ matu haska wabuma ini keska mã hatukiri shinãshanaii.
13 Hakia earã, Senhor Deus ẽ matũ mekenikatũ
matu metsũtã yuikĩ:
‘Ana hawa dateyamakãwẽ, ẽ matu merabewakubainaiwẽ taearã’ ”, akĩ
14 Senhor Deusũ hawẽ hãtxa mestẽwãkĩ yuikĩ:
“Jacó enabu Israelbuũ,
ha mã tesheishtani mã babubiarã,
hawa dateyamakãwẽ, ẽ matu merabewairã.
Earã, Israelĩ Deus meribirã, ẽ matũ piskumanikaki.
15 Matuburã, hawẽ mai sheshabaĩti sheta benaya keska ẽ matu washanaii.
Mai sheshabaĩkĩ mati tibi pãpa wakĩ mã mishpu washanaii.
Mati mishtĩ shekiwã shaka keska mã washanaii.
16 Mã hatu beka beka aka niwẽ hatu bushanikiki.
Niwe shubi shubi ibirãkĩ sa abaĩshanikiki.
Ẽ matu haska waya matubu mã benimashãkanaii.
Israelĩ mekenika ẽ Senhor Deus meribiwẽ mã kẽshãkanaii.
17 Enabu nuitapai hawa pei hayabumã ũpash benabiai
ibubis betxiabumaki.
Ũpash manui hatũ hana tashkai tetsusĩbiaibũ
hakia ea Senhor Deusũ ẽ hatu amashanaii.
Israelĩ mekenika Deus eanã, henekĩ ẽ hawa hatu putabainama ishanaii.
18 Hanu tsua hiweabumanu mati keyatapa anua ẽ hene habamashanaii.
Napaku anu txatxa tibi ẽ tsaũshanaii.
Hanu tsua hiweabumanu iã pishta wakĩ ẽ newesh shanaii.
Mai metu anu ẽ pashku habamabirãshanaii.
19 Hanu tsua hiweabumanu mai metu anu hi tibi ẽ benemashanaii,
kusharã inũ olivarã, hi pepa betsa betsapa benemakinã.
20 Ẽ Israelĩ Senhor Deus Meribitũ dasibi dami wakĩ
ẽ kushipawẽ ẽ akeakeni
hau mai hirabi anu manibaũshũ uĩkĩ nĩkakĩ tapĩkĩ
hau unãshanũbũ ẽ haska wakeakekubaĩshanaii”, iniki.
Yushibu tibi kẽwainã, hamẽkiaki, na hãtxarã
21 Senhor Deus Jacó Shanẽ Ibuhairatũ yuikĩ:
“Damibuũ, beshũ matũ kushipakiri ea uĩmai bekãwẽ.
Hawara mã amis beshũ akĩ ea uĩmakãwẽ.
22 Matu nĩkanũ uatiã ishanai nukuki txanikãwẽ.
Uatiã ma iyamakiri nuku yusĩkĩ unãmakãwẽ.
Hamapai tibi ishanai nukuki txanikãwẽ,
haska kaĩtã keyushanai nũ uĩshanunã.
23 Haska txipu kaĩbirãshanai nuku banabimakĩ yuikãwẽ.
Haska txanima mã deusmẽkaĩ, nuku shabakabi uĩmakãwẽ.
Haska mã atiru pepa kasmai txakabu nuku ashũkãwẽ,
matuki date paepai nũ mesenũbunã.
24 Eã ẽ matu uianã, matuburã, mã kushipa hayamahairabuki,
mã hawa dami betsa watirumahairarã!
Habu unaĩsmapakĩ mã dami katumisburã,
mã peirakãwã!
25 Shanẽ ibuhaira Pérsia bari huaikiri hiwea ẽ kena nortekiria tashnikirãshanikiki.
Shanẽ ibu betsabu hatu atxikĩ
hawẽ taewẽ pupus pema pema abirãkĩ akawashanikiki,
mai mabu wanikatũ hawẽ taewẽ mapu pewakĩ katarãkĩ biyu biyu amis keska wakinã.
26 Haskai nũ uinũ barinũ bebũkirihaira ha shanẽ ibukiri,
tsua hatuki txaninimẽ?
Ha hunĩ ashanai txanima bebũkiri yuini haskawẽ taeshũ
nũ e itã unãtiruburã, tsuã animẽ?
Damipaã, hawa betsa taska mã txaniama iniki.
Mã ha shanẽ ibukiri hãtxai hawa hãtxa mã yuiai
tsuã hawa nĩkamahaira iniki.
27 Hakia ea Senhor Deusũnã, bebũkiri Sião anuabu
hatuki txanikĩ ẽ hatu unãmaniki.
Jerusalém anu ẽ hãtxa yuishunika ẽ yununiki,
ha Israelĩ enabu hawaira txĩtũshanaibu hau hatu yuinunã.
28 Eã ẽ uianã, hawa dami yushĩ betsa tashniamaki.
Haratura yushĩ damipã merabewakĩ hunibu yusĩtirumaki.
Matũ yushĩ dami ẽ hatu yukabia ea hawa kematirubumaki.
29 Ha yushĩ dami tibirã, hawama hamẽki.
Hawa dami watirubumahairaki.
Hawa kushipa hayama dami bestibuki.”